- પાકિસ્તાનમાં 8 ફેબ્રુઆરીએ સામાન્ય ચૂંટણી
- ઉમેદવારોની યાદી 11 જાન્યુઆરીએ જાહેર કરાશે
- ઈમરાનનું મિયાંવાલીથી ચૂંટણી લડવા માટેનું નામાંકન પત્ર રદ
પાકિસ્તાનમાં 8 ફેબ્રુઆરીએ થનારી સામાન્ય ચૂંટણી પહેલા પૂર્વ વડાપ્રધાન અને પાકિસ્તાન તહરીક-એ-ઈન્સાફ (PTI)ના વડા ઈમરાન ખાનને મોટો ઝટકો લાગ્યો છે. પાકિસ્તાનના ચૂંટણી પંચે ઈમરાન ખાનના તેમના વતન મિયાંવાલીથી 2024ની રાષ્ટ્રીય ચૂંટણી લડવા માટેનું નામાંકન પત્ર રદ કર્યું છે.
પાકિસ્તાનમાં 8 ફેબ્રુઆરીએ સામાન્ય ચૂંટણી
પાકિસ્તાનના ચૂંટણી પંચે શનિવારે ભૂતપૂર્વ PM ઈમરાન ખાનના 2024ની રાષ્ટ્રીય ચૂંટણી લડવા માટેના નામાંકનને નકારી કાઢ્યું હતું. પૂર્વ PMએ તેમના વતન મિયાંવાલીથી 2024ની રાષ્ટ્રીય ચૂંટણી લડવા માટે ઉમેદવારી પત્ર ભર્યું હતું. પાકિસ્તાનના ચૂંટણી પંચે જણાવ્યું હતું કે ખાનનું નામાંકન નકારી કાઢવામાં આવ્યું હતું કારણ કે તે મતદારક્ષેત્રમાં નોંધાયેલ મતદાર ન હતા. કોર્ટ દ્વારા તેને દોષિત ઠેરવવામાં આવ્યો છે અને ગેરલાયક ઠેરવવામાં આવ્યો છે. દરમિયાન, ઈમરાન ખાનની મીડિયા ટીમે પણ પુષ્ટિ કરી છે કે કમિશને મિયાંવાલીથી ચૂંટણી લડવા માટે તેમનું નામાંકન પણ નકારી કાઢ્યું છે. આ સાથે લોહારમાંથી તેમના ઉમેદવારી પત્રો પણ નામંજૂર કરવામાં આવ્યા છે.
ક્રિકેટરમાંથી રાજનેતા બનેલા આ વર્ષે ઓગસ્ટથી એક સાઇફર કેસમાં જેલમાં છે. તેના પર સત્તાવાર કાગળો લીક કરવાનો આરોપ હતો. પીટીઆઈના વડાએ માર્ચમાં પાકિસ્તાનના વોશિંગ્ટન દૂતાવાસ દ્વારા મોકલવામાં આવેલા ગુપ્ત રાજદ્વારી કાગળનો ખુલાસો કર્યો હતો. જો કે, પાકિસ્તાનની સુપ્રીમ કોર્ટે ગયા શુક્રવારે રાજ્યના રહસ્યો લીક કરવાના કેસમાં ખાનને જામીન આપ્યા હતા. હાઇકોર્ટે ચૂંટણીમાં ભાગ લેવાથી તેમની ગેરલાયકાતને સ્થગિત કરવાનો ઇનકાર કર્યાના એક દિવસ બાદ આ નિર્ણય આવ્યો હતો.
ચૂંટણી માટે 28,626 ઉમેદવારી પત્રો ભરાયા હતા
એક લેખિત આદેશમાં, સુપ્રીમ કોર્ટના ન્યાયાધીશોએ જણાવ્યું હતું કે તેમને પર્યાપ્ત ગુનાહિત સામગ્રી” મળી નથી જે રાજ્યના રહસ્યો લીક કરવામાં ખાનની સંડોવણીને સાબિત કરી શકે. સુપ્રીમ કોર્ટે તેમને ચૂંટણી લડવા માટે ગેરલાયક ઠેરવવાની અરજી ફગાવી દીધી હતી. જે બાદ પૂર્વ ક્રિકેટર ઈમરાન ખાન ચૂંટણી લડી શકે તેવી શક્યતાઓ હતી, પરંતુ હવે ચૂંટણી પંચ દ્વારા નામાંકન નકારવાને કારણે તેમને ફરી મોટો ફટકો પડ્યો છે. 71 વર્ષીય ભૂતપૂર્વ ક્રિકેટ સ્ટાર એપ્રિલ 2022 માં પાકિસ્તાનના વડાપ્રધાન પદ પરથી હટાવવામાં આવ્યા ત્યારથી તે અનેક રાજકીય અને કાનૂની લડાઈમાં ફસાઈ ગયો છે. ચૂંટણી પંચના અહેવાલ મુજબ, પાકિસ્તાનના ચૂંટણી પંચને આવતા વર્ષે 8 ફેબ્રુઆરીએ યોજાનારી સામાન્ય ચૂંટણી લડવા ઇચ્છુક ઉમેદવારો તરફથી કુલ 28,626 ઉમેદવારી પત્રો મળ્યા છે.
ઉમેદવારોની યાદી 11 જાન્યુઆરીએ જાહેર કરાશે
પાકિસ્તાનના ચૂંટણી પંચ (ECP) દ્વારા આપવામાં આવેલી માહિતી અનુસાર, તેમણે રાષ્ટ્રીય વિધાનસભાની આરક્ષિત બેઠકો માટે કુલ 459 ઉમેદવારી પત્રો અને પ્રાંતીય ધારાસભાની આરક્ષિત બેઠકો માટે 1,365 નામાંકન પત્રો મેળવ્યા છે.
ECP 11 જાન્યુઆરીએ ઉમેદવારોની યાદી જાહેર કરશે. ECP દ્વારા 13 જાન્યુઆરીએ ચૂંટણી ચિન્હોની ફાળવણી થાય તે પહેલા ઉમેદવારો 12 જાન્યુઆરી સુધી તેમના નામાંકન પરત ખેંચી શકશે.
