- પ્રતિબંધિત PFIની અરજી સુપ્રીમ કોર્ટે ફગાવી
- પ્રતિબંધને પડકારતી અરજી કરી હતી PFI
- સુપ્રીમ કોર્ટે અરજી સાંભળવાનો જ ઇન્કાર કરી દીધો
UAPA હેઠળ પ્રતિબંધિત સંગઠન પોપુલર જાહેર ઓફ ઇન્ડિયા (PFI)ને સુપ્રીમ કોર્ટ તરફથી ફટકો મળ્યો છે. ઉચ્ચ અદાલતે પીએફઆઇની અરજી સાંભળવાનો જ ઇન્કાર કરી દીધો. PFIએ અરજીમાં પ્રતિબંધને પડકારવાનું કાર્ય કર્યુ હતું. સુપ્રીમ કોર્ટે આ અરજીને સાંભળવાનો ઇન્કાર કરી દેતા કહ્યું કે આ મામલો પહેલા હાઇકોર્ટમાં જવો જોઇતો હતો.
PFIને હાઈકોર્ટમાં જવાની મંજૂરી
સુપ્રીમ કોર્ટે ‘પોપ્યુલર ફ્રન્ટ ઓફ ઈન્ડિયા’ (PFI) પર કેન્દ્ર દ્વારા લાદવામાં આવેલા પ્રતિબંધની પુષ્ટિ કરવાના ગેરકાનૂની પ્રવૃત્તિઓ (નિવારણ) અધિનિયમ (UAPA) ટ્રિબ્યુનલના નિર્ણયને પડકારતી અરજીને ફગાવી દીધી છે. જસ્ટિસ અનિરુદ્ધ બોઝ અને જસ્ટિસ બેલા એમ ત્રિવેદીની ખંડપીઠે કહ્યું કે પીએફઆઈ માટે ટ્રિબ્યુનલના આદેશ સામે પહેલા હાઈ કોર્ટનો સંપર્ક કરવો યોગ્ય રહેશે. પીએફઆઈ તરફથી હાજર રહેલા વરિષ્ઠ વકીલ શ્યામ દિવાને કોર્ટના મત સાથે સહમત થયા કે સંસ્થાએ પહેલા હાઈકોર્ટનો સંપર્ક કરવો જોઈએ અને પછી સર્વોચ્ચ અદાલતનો સંપર્ક કરવો જોઈએ. આ પછી બેન્ચે અરજી ફગાવી દીધી . જો કે PFIને હાઈકોર્ટમાં જવાની મંજૂરી આપી છે.
PFIએ શું કરી હતી અરજી ?
ઉલ્લેખનીય છે કે પીએફઆઈએ તેની અરજીમાં UAPA ટ્રિબ્યુનલના 21 માર્ચના આદેશને પડકાર્યો હતો જેમાં તેણે 27 સપ્ટેમ્બર, 2022ના કેન્દ્રના નિર્ણયની પુષ્ટિ કરી હતી. કેન્દ્ર સરકારે ઇસ્લામિક સ્ટેટ (ISIS) જેવા વૈશ્વિક આતંકવાદી સંગઠનો સાથે કથિત સંબંધો અને દેશમાં સાંપ્રદાયિક નફરત ફેલાવવાના પ્રયાસો માટે PFI પર પાંચ વર્ષ માટે પ્રતિબંધ મૂક્યો છે.
