કોંગ્રેસને I.N.D.I.A.ગઠબંધનની ચિંતા જ નથી, કોંગ્રેસ પર વરસ્યા નીતિશ કુમાર

• I.N.D.I.A.ગઠબંધન લઇને નીતિશકુમારનું નિવેદન
  
• ગઠબંધનમાં કોંગ્રેસની ભૂમિકા પર ઉઠાવ્યા સવાલ
  
• કહ્યું કોંગ્રેસને કંઇ ચિંતા જ નથી
  

2024ની લોકસભા ચૂંટણીમાં ભાજપને સત્તા પરથી હટાવવા માટે એક મંચ હેઠળ એકત્ર થયેલા 28 પક્ષો દરાવતા INDIA ગઠબંધનમાં સ્થિતિ ડામાડોળ હોય તેમ લાગી રહ્યું છે. કારણ કે અંદરોઅંદર પાર્ટીઓ વચ્ચે પણ તણાવ જોવા મળી રહ્યો છે તેવામાં I.N.D.I.A.ગઠબંધનને લઇને બિહારના મુખ્યમંત્રી નિતીશ કુમારે કોંગ્રેસની ભૂમિકાને લઇને સવાલો ઉઠાવ્યા છે.

કોંગ્રેસને ગઠબંધનની ચિંતા નહી

બિહારના મુખ્યમંત્રી નીતિશ કુમાર I.N.D.I.A. મહાગઠબંધનમાં કોંગ્રેસની વર્તમાન ભૂમિકાને લઈને મોટી વાત કહી છે. તેમણે કહ્યું કે એવું લાગે છે કે કોંગ્રેસ પાર્ટીને હવે આની ચિંતા નથી. હાલ કોંગ્રેસ પાંચ રાજ્યોમાં ચૂંટણીને લઈને વધુ ચિંતિત છે. કોંગ્રેસ ચૂંટણી પ્રચારમાં જ વ્યસ્ત છે. I.N.D.I.A ગઠબંધન અને 2024ની ચૂંટણી અંગે કોઈ ચર્ચા નથી. નીતિશ કુમારે એમ પણ કહ્યું કે કોંગ્રેસ પાર્ટીને આગળ લઈ જવા માટે આપણે બધા એક થઈને કામ કરી રહ્યા છીએ પરંતુ કોંગ્રેસને તેની ચિંતા નથી.

પટનામાં વરસ્યા નીતિશ કુમાર

નીતિશ કુમારે પટનામાં ભાજપ હટાઓ દેશ બચાવો રેલી દરમિયાન આ વાત કહી. પટનાના મિલર ગ્રાઉન્ડના મંચ પરથી નીતીશ કુમારે કહ્યું કે, પાંચ રાજ્યોની ચૂંટણી પૂરી થયા બાદ શક્ય છે કે કોંગ્રેસનું ધ્યાન ગઠબંધન તરફ જાય અને પછી તે તમામ પાર્ટીઓને ગઠબંધનમાં બોલાવે, પરંતુ હાલમાં કોંગ્રેસને ચિંતા નથી. કોંગ્રેસના નેતાઓ માત્ર પાંચ રાજ્યોની ચૂંટણીમાં વ્યસ્ત છે.

‘ભાજપને હટાવવાનું કામ યોગ્ય રીતે થઈ રહ્યું નથી’

મહત્વનું છે કે નીતિશ કુમાર દ્વારા વિપક્ષી પાર્ટીઓની એકતાને I.N.D.I.A નામ આપવામાં આવ્યું હતું. આ અંગે વિપક્ષી દળોની ત્રણ બેઠકો જ થઇ છે. હવે બિહારના સીએમ કહી રહ્યા છે કે વિપક્ષી દળોના ગઠબંધનની સૌથી મોટી પાર્ટી કોંગ્રેસને જ તેની કશી ચિંતા નથી. આ ગઠબંધને ભાજપને સત્તા પરથી હટાવવા માટેનો સંકલ્પ લીધો હતો પરંતુ તે દિશામાં કોઇ કામ થઇ રહ્યું નથી.