- શિખર ધવને ઈન્સ્ટાગ્રામ પર પુત્ર જોરાવરની તસવીર કરી શેર
- ‘પાપા હંમેશા તમને યાદ કરે છે અને તમને પ્રેમ કરે છે: ધવન
- છેલ્લા ત્રણ મહિનાથી મને દરેક જગ્યાએ બ્લોક કરી દેવામાં આવ્યો
ભારતીય ટીમ હાલ દક્ષિણ આફ્રિકાના પ્રવાસે છે. આ પ્રવાસ પર આજે ભારતીય ટીમે બે મેચની ટેસ્ટ શ્રેણીની પ્રથમ ટેસ્ટ મેચમાં પ્રવેશ કર્યો છે. દરમિયાન, ભારતીય ટીમમાંથી બહાર રહેલો અનુભવી ઓપનર શિખર ધવન આજે ભાવુક જોવા મળ્યો હતો. આજે શિખર ધવનના પુત્ર જોરાવરનો જન્મદિવસ છે. શિખર તેના જન્મદિવસ પર તેના પુત્રને મળી શક્યો ન હતો અને તેણે એક ભાવુક પોસ્ટ શેર કરી છે.
ઇન્સ્ટાગ્રામ પર શેર કરી તસવીર
શિખર ધવને પોતાના ઓફિશિયલ ઈન્સ્ટાગ્રામ એકાઉન્ટ પરથી પોતાના પુત્ર જોરાવર અને પોતાની એક તસવીર શેર કરતા લખ્યું કે, ‘મેં તમને જોયાને એક વર્ષ થઈ ગયું છે અને છેલ્લા ત્રણ મહિનાથી મને દરેક જગ્યાએ બ્લોક કરી દેવામાં આવ્યો છે. હું તમારી સાથે સીધો જોડાઈ શકતો નથી પણ હું તમારી સાથે ટેલિપેથી દ્વારા જોડાઈશ. મને તમારા પર ખૂબ ગર્વ છે અને હું જાણું છું કે તમે સારૂં કરી રહ્યા છો અને સારી રીતે આગળ વધી રહ્યા છો.
ઇમોશનલ થયો શિખર ધવન
શિખર ધવને આગળ લખ્યું કે ‘પાપા હંમેશા તમને યાદ કરે છે અને તમને પ્રેમ કરે છે. હું હંમેશા હકારાત્મક રહું છું, હસતાં હસતાં એ સમયની રાહ જોઉં છું જ્યારે ભગવાનની કૃપાથી આપણે ફરી મળીશું. તોફાની બનો પણ વિનાશક નહીં, દાતા, નમ્ર, દયાળુ, ધીરજવાન અને બળવાન બનો. તમને ન જોયા છતાં, હું તને લગભગ દરરોજ મેસેજ લખું છું. હું તમારા રોજિંદા જીવન વિશે પૂછું છું. હું શું કરી રહ્યો છું તે કહું છુ. જોરા પાપા તરફથી તમને ઘણો પ્રેમ.
જોરાવરને મિસ કરી રહ્યો છે ધવન
શિખર ધવનની આ પોસ્ટ પરથી સમજી શકાય છે કે તે પોતાના પુત્ર જોરાવરને કેટલો મિસ કરી રહ્યો છે. ખરેખર, જોરાવર શિખર ધવન અને તેની પત્ની આયશ મુખર્જીનો પુત્ર છે. આયેશા અને ધવનના છૂટાછેડા થઈ ગયા છે. હાલમાં જોરાવર તેની માતા આયેશા સાથે છે. આવી સ્થિતિમાં ધવન તેને ખૂબ મિસ કરે છે.
