- કાશ્મીર ખીણ વિસ્તારમાં ભીષણ ઠંડીની 40 દિવસની અવધિ સમાપ્ત થઇ ગઇ છે
- ગુલમર્ગમાં તાપમાન માઇનસ સાત ડિગ્રીથી ગગડીને -10 ડિગ્રી નોંધાયું હતું
- દિલ્હીમાં વરસાદના કારણે ઠંડીમાં થોડી રાહત
કાશ્મીરમાં સોમવારે મોટાભાગના વિસ્તારોમાં તાપમાન શૂન્યથી નીચે જતું રહેતાં સમગ્ર ખીણ વિસ્તારમાં શીતલહેરનો પ્રભાવ વધી ગયો છે, તેમ અધિકારીઓએ જણાવ્યું હતું. હવામાન ખાતાના જણાવ્યા અનુસાર જમ્મુ-કાશ્મીરના ગ્રીષ્મકાલીન પાટનગર શ્રીનગરમાં લઘુતમ તાપમાન માઇનસ 0.4 ડિગ્રી સેલ્સીયસ નોંધાયું હતું. દક્ષિણ કાશ્મીરના પહેલગામમાં ખીણની સૌથી વધુ ઠંડી નોંધાઇ હતી. અહીં લઘુતમ તાપમાન માઇનસ 11.9 ડિગ્રી સેલ્સિયસ નોંધાયું હતું. આગલી રાત્રે અત્રે લઘુતમ તાપમાન માઇનસ 3.5 ડિગ્રી સેલ્સિયસ નોંધાયું હતું. ઉત્તરીય કાશ્મીરમાં ગુલમર્ગમાં તાપમાન માઇનસ સાત ડિગ્રીથી ગગડીને 10 ડિગ્રી નોંધાયું હતું. સત્તાવાર આંકડા અનુસાર દક્ષિણ કાશ્મીરના કોકેરનાગમાં માઇનસ 1.4, કાજીકુંડમાં માઇનસ 3.3 ડિગ્રી તાપમાન નોંધાયું હતું. જો કે હવામાન ખાતાના જણાવ્યા અનુસાર મંગળવારથી કાશ્મીરમાં હવામાનમાં સુધારો થવાની અપેક્ષા છે. નોંધનીય છે કે કાશ્મીર ખીંણ વિસ્તારમાં ભીષણ ઠંડી-ચિલ્લાઇ કલાં-ની 40 દિવસની અવધી સમાપ્ત થઇ ગઇ છે પણ તેમ છતાં કાશ્મીર ખીણમાં શીતલહેર ચાલું છે. હાલમાં ખીણ વિસ્તાર 20 દિવસની ચિલ્લાઇ ખુર્દની લપેટમાં છે તે પછી 10 દિવસનો ચિલ્લાઇ બચ્ચાનો તબક્કો આવશે.
દિલ્હીમાં વરસાદના કારણે ઠંડીમાં થોડી રાહત
દિલ્હીમાં સોમવારે સવારે પવનના સુસવાટા વચ્ચે લઘુતમ તાપમાનમાં સુધારો નોંધાયો હતો અને લઘુતમ તાપમાન સામાન્ય કરતાં ત્રણ ડિગ્રી વધારે 12.4 ડિગ્રી સેલ્સિયસ નોંધાયું હતું. હવામાન ખાતાએ જણાવ્યું હતું કે દિવસ દરમિયાન અધિકતમ તાપમાન 22 ડિગ્રી નોંધાયું હતું. નોંધનીય છે કે રવિવારે રાત્રે પાટનગરના કેટલાક વિસ્તારોમાં હળવો વરસાદ નોંધાયો હતો.
પાટનગરમાં આગામી બે દિવસ ગાઢ ધુમ્મસ રહેશે
હવામાન ખાતાના જણાવ્યા અનુસાર આગામી બે દિવસ પાટનગરમાં ગાઢ ધુમ્મસ રહેશે. આ દરમિયાન સોમવારે ધુમ્મસની સાથે આકાશમાં વાદળો છવાયેલાં હોવાના કારણે હવામાન ખાતા દ્વારા યલો એલર્ટ જાહેર કરવામાં આવ્યો હતો. અધિકારીઓએ જણાવ્યું હતું કે સોમવારે રાત્રે વાદળો વિખરાઇ જશે તેને પરિણામે મંગળવારે લઘુતમ તાપમાન ફરીથી ચાર ડિગ્રી સુધી ગગડશે. બુધવારે લઘુતમ તાપમાન સાત ડિગ્રી સુધી ગગડી શકે છે.
