અમદાવાદ બુલિયન બજારમાં સોના અને ચાંદીના ભાવોએ તમામ જૂના રેકોર્ડ તોડી નાંખ્યા છે. સતત બીજા દિવસે કિંમતી ધાતુઓએ તેમની ઓલ ટાઇમ હાઇ સપાટી પ્રાપ્ત કરી છે. મંગળવારે ચાંદીમાં એક ઝાટકે રૂ.7,000નો ભાવ વધારો નોંધાયો હતો. જેના કારણે ચાંદી પ્રતિ કિલોએ રૂ.2,12,000ની નવી ઐતિહાસિક સપાટીએ પહોંચી ગઇ હતી. બીજી તરફ સોનામાં પણ રૂ.2,500નો વધારો નોંધાતા 24 કેરેટ સોનાનો ભાવ પ્રતિ 10 ગ્રામે રૂ.1,40,500 થયો હતો. જે અત્યાર સુધીની સૌથી ઊંચી સપાટી છે.
વૈશ્વિક બજારમાં સોનું 74 ડોલર વધીને 4,484 ડોલર પ્રતિ ઔંસ થયું હતું. ચાંદી 56 સેંન્ટ વધીને 69.66 ડોલર પ્રતિ ઔંસ થઇ હતી. MCX માર્કેટમાં સોનામાં ફેબ્રુઆરી માસનો વાયદો રૂ.1,592 વધીને રૂ.1,38,336 થયો હતો. ચાંદીમાં માર્ચ માસનો વાયદો રૂ.3,015 વધીને રૂ.2,15,887 પ્રતિ કિલો થયો હતો. કોમેક્સ બજારમાં સોનું 49.70 ડોલર વધીને 4,519.10 ડોલર પ્રતિ ઔંસ થયું હતું. ચાંદીમાં 1.80 સેંન્ટ વધીને 69.64 ડોલર પ્રતિ ઔંસ થઇ હતી. મુંબઇમાં 24 કેરેટમાં સોનાનો ભાવ રૂ.1,38,390 થયો હતો. જ્યારે ચાંદીનો પ્રતિ કિલોનો ભાવ રૂ.2,15,430 થયો હતો.
ચાલુ વર્ષે સોના-ચાંદીમાં ભાવોમાં રેકોર્ડ સર્જવાની હોડ લાગી છે. વર્ષની શરૂઆતમાં રૂ.90,500 કિલો મળતી ચાંદી હાલમાં રૂ.2,12,000 રૂપિયાના ભાવે પહોંચી ગઇ છે જ્યારે રૂ.80,100 પ્રતિ 10 ગ્રામે મળતું સોનું હાલ રૂ.1,40,500ની નવી સપાટીએ છે. ધીમી પણ મક્કમ ગતિએ આ બંને ધાતુઓએ તેમની રેકોર્ડ ઉપર રેકોર્ડ સર્જવાની ચાલ ચાલુ રાખી છે. વેપારીઓ, રોકાણકારો અને ગ્રાહકો બધા આ ભાવ ઉછાળાથી અચંબિત છે.લગ્નસિઝન, તહેવાર અને રોકાણની વધતી માંગે સોના-ચાંદીની ખરીદીમાં વધારો થયો છે. ચાંદી હવે માત્ર દાગીના, વાસણો કે પુજાપાઠ પુરતી સિમિત રહી નથી પરંતુ ઔદ્યોગિક ધાતુ તરીકેની તેની ઓળખ મજબૂત બની રહી છે. ભાવોમાં સતત વધારો થતા નાના અને મોટા બંને રોકાણકારોમાં ઉત્સાહ જોવા મળી રહ્યો છે. ઘણા રોકાણકારો માને છે કે આવનારા સમયમાં સોના-ચાંદીના ભાવમાં હજુ વધુ તેજી આવી શકે છે. કેટલાક રોકાણકારો નફો બુક કરી રહ્યા છે. જ્યારે કેટલાક લાંબા ગાળાના દ્રષ્ટિકોણથી રોકાણ જાળવી રાખી રહ્યા છે. બજાર નિષ્ણાતોનું કહેવું છે કે, જો વૈશ્વિક પરિસ્થિતિ આવી જ રહી તો સોના-ચાંદીમાં વધુ ઉછાળો નકારી શકાય તેમ નથી. ભાવ વધારાથી સામાન્ય લોકોના ખિસ્સા પર પણ અસર પડી રહી છે. લગ્ન કે શુભ પ્રસંગ માટે દાગીના ખરીદવાનું આયોજન કરનારાઓને હવે વધુ ખર્ચ કરવો પડશે. બીજી તરફ પહેલેથી રોકાણ કરનારાઓ માટે આ સમય નફાકારક સાબિત થઇ રહ્યો છે.
