- 24 કલાકમાં વધુ એક 10 વર્ષીય બાળકને કોલેરા ગ્રસ્ત
- એક જ દિવસમાં તાવ, મેલેરિયા અને ઝાડાના 619 કેસ નોંધાયા
- પાલિકા દૂષિત પાણીની લાઈનોનું ચેકીંગ કરી રહી છે
વડોદરા શહેરમાં કોલેરા અને ડેન્ગ્યુના કેસ સામે આવ્યા છે. જેમાં 24 કલાકમાં વધુ એક 10 વર્ષીય બાળકને કોલેરા ગ્રસ્ત જાહેર કરાયો છે. તેમજ બે દર્દીઓને ડેન્ગ્યુનું નિદાન કરાયું છે. એક જ દિવસમાં તાવ, મેલેરિયા અને ઝાડાના 619 કેસ નોંધાયા છે. તેમજ પાલિકા દૂષિત પાણીની લાઈનોનું ચેકીંગ કરી રહી છે. તથા ખાનગી હોસ્પિટલોના આંકડા મળે તો આંક વધુ ઉંચો આવે તેવી શકયતા છે.
ચોમાસું શરૂ થતાંની સાથે જ પાણીજન્ય રોગચાળાએ માથું ઉચક્યું છે
સમગ્ર રાજ્યમાં ચોમાસું શરૂ થતાંની સાથે જ પાણીજન્ય રોગચાળાએ માથું ઉચક્યું છે. ત્યારે આરોગ્ય વિભાગે 2 દિવસથી કોલેરાના 1-1 દર્દી પોઝિટિવ આવી રહ્યા હોવાનું સત્તાવાર જાહેર કર્યું છે. હાથીખાનાની 45 વર્ષની મહિલા કોલેરા પોઝિટિવ હોવાનું જણાવ્યું છે તેમજ આ વિસ્તારમાંથી 5 સેમ્પલ લેવાયાં છે. પાણીજન્ય રોગચાળાની સાથે મચ્છરથી થતા ડેન્ગ્યૂ-મલેરિયાના કેસ પણ પોઝિટિવ આવી રહ્યા છે. જેમાં શંકાસ્પદ ડેન્ગ્યૂનાં 15 સેમ્પલ લેવાયાં હતાં, જેમાં આરોગ્ય વિભાગે મકરપુરાનો 1 દર્દી પોઝિટિવ હોવાનું જણાવ્યું છે.
ઝાડાના માત્ર 48 દર્દી મળ્યા હોવાનું રિપોર્ટ જણાવે છે
જ્યારે મલેરિયાનાં લક્ષણો ધરાવતા 1166 દર્દીનાં સેમ્પલ લેવાતાં ભાયલી સુદામાપુરીનો એક વ્યક્તિને પોઝિટિવ આવ્યો હતો. બીજી તરફ ઝાડાના માત્ર 48 દર્દી મળ્યા હોવાનું રિપોર્ટ જણાવે છે.પાલિકા દ્વારા મચ્છરજન્ય રોગચાળો રોકવા 159 ટીમ દ્વારા 324 સ્થળોની મુલાકાત લઇને 34,083 મકાનની તપાસ કરાઈ હતી. જ્યારે 9081 મકાનમાં ફોગિંગ કરાયું હતું. સાથે 8 સ્કૂલ, હોસ્ટેલમાં પણ ચકાસણી કરાઈ હતી. કોલેરા એ આંતરડાનો તીવ્ર ચેપ છે જે મળથી દૂષિત ખોરાક અને પાણી દ્વારા ફેલાય છે. કોલેરા બેક્ટેરિયમ (વિબ્રિઓ કોલેરા) વ્યક્તિના આંતરડા પર હુમલો કરે છે અને તેના કારણે ઝાડા, ઉલટી થાય છે તેમજ ત્યારબાદ શરીરમાં પ્રવાહી ઘટી જાય છે.
