- 1લી જાન્યુ.થી શરૂ થનાર ધો.10-12ની પ્રેક્ટિકલ પરીક્ષાને લઈ ગાઈડલાઈન
- એકવાર માર્કસ અપલોડ કર્યા બાદ તેમાં ફેરફાર નહીં થાય
- એકવાર ગુણ અપલોડ કરવામાં આવ્યા બાદ તેમાં કોઈ ફેરફાર કરી શકાશે નહીં
સેન્ટ્રલ બોર્ડ ઓફ્ સેકન્ડરી એજ્યુકેશન (CBSE) દ્વારા આગામી 1લી જાન્યુઆરીથી શરૂ થનાર ધોરણ-10 અને 12ની પ્રેક્ટિકલ પરીક્ષાને લઈ ગાઈડ લાઈન પ્રસિદ્ધ કરવામાં આવી છે. બોર્ડે તેની ગાઈડલ લાઈનમાં સ્કૂલોને સ્પષ્ટ સુચના આપી છે કે, પરીક્ષાના દિવસે જ માર્કસ વેબસાઈટ પર અપલોડ કરી દેવાના રહેશે અને એ માટેની અત્યારથી જ તૈયારીઓ કરી લેવી.
બોર્ડે સ્કૂલોને તાકીદ કરી છે કે, એકવાર માર્કસ અપલોડ કર્યા બાદ તેમાં કોઈ ફેરફાર નહી કરી શકાય.CBSE સંલગ્ન શાળાઓએ પ્રાયોગિક પરીક્ષાઓ શરૂ થાય તે પહેલા બોર્ડ દ્વારા જારી કરાયેલ મહત્વપૂર્ણ માર્ગદર્શિકાનું પાલન કરવું પડશે. માર્ગદર્શિકામાં જણાવાયું છે કે, સ્કૂલોએ પ્રાયોગિક પરીક્ષા આયોજિત કરવા માટેની નિર્ધારિત તારીખ પહેલાં શાળામાં પૂરતી સંખ્યામાં પ્રાયોગિક ઉત્તરપત્રો પ્રાપ્ત થાય તેની ખાતરી કરવાની રહેશે. શાળાઓએ વાલીઓ અને વિદ્યાર્થીઓને સમયપત્રક, ફોર્મેટ અને પ્રાયોગિક પરીક્ષાઓની કોઈપણ વિશિષ્ટ જરૂરિયાતો વિશે જાણ કરવી જોઈએ. શાળાઓએ સુનિશ્ચિત કરવાનું રહેશે કે પ્રાયોગિક પરીક્ષાઓ લેવા માટે લેબોરેટરીઓમાં ઈન્ફ્રાસ્ટ્રક્ચર, સાધનો અને સામગ્રી જેવી જરૂરી વ્યવસ્થાઓ ઉપલબ્ધ છે. એકવાર ગુણ અપલોડ કરવામાં આવ્યા બાદ તેમાં કોઈ ફેરફાર કરી શકાશે નહીં. આ ઉપરાંત સ્કૂલોએ પ્રાયોગિક પરીક્ષા પહેલા પુરતી તૈયારીઓ કરવા માટે પણ તાકીદ કરાઈ છે.
