TRP કાંડ બાદ તંત્ર જાગૃત બન્યું : દરેક સ્ટોલ ધારકોને CCTV રાખવા પડશે અને 3૦ દિવસનું બેકઅપ ફરજીયાત
નાના સ્ટોલધારકોને ફાયરનો એક બાટલો અને આઇસ્ક્રીમ સહિત મોટા સ્ટોલ, રાઇડસ માટે બે મોટા બાટલા રાખવા પડશે
રાજકોટ લોકમેળા અમલીકરણ સમિતિ દ્વારા દ્વારા રાજકોટ શહેરમાં રેસકોર્સ મેદાન ખાતે તા. ૨૪થી ૨૮ ઓગસ્ટ દરમિયાન જન્માષ્ટમી લોકમેળાનું આયોજન કરવામાં આવ્યું છે. આ લોકમેળામાં સ્ટોલ ધારકોએ સીસીટીવી કેમેરા રાખવાનું આ વખતે ફરજિયાત કરાયુ છે. અને તેના ફૂટેજ 3૦ દિવસ સુધી રાખવાના રહેશે. લોકમેળા ઉપરાંત ખાનગી મેળા માટે પણ આ નિયમ ફરજિયાત રહેશે.
લોકમેળામાં રમકડા, ખાણીપીણીથી માંડી તમામ પ્રકારના સ્ટોલ તેમજ યાંત્રિક રાઇડસના ધંધાર્થીઓ માટે લોકમેળા અમલીકરણ સમિતિના અધ્યક્ષ તથા નાયબ કલેક્ટર રાજકોટ-૧ દ્વારા સૂચના જારી કરવામાં આવી છે. જેમાં જણાવાયું છે કે, લોકમેળાના દરેક સ્ટોલ ધારકે ફરજીયાત સીસીટીવી કેમેરા લગાવવાના રહેશે અને તેનું રેકોર્ડિંગ ૩૦ દિવસ સુધી સાચવવાનું રહેશે. લોકમેળાના દરેક નાના સ્ટોલ/પ્લોટ ધારકે એક ફાયર એક્સ્ટિંગ્યુશર અને મોટા રાઇડ્સ, સ્ટોલ/ પ્લોટ ધારકે બે ફાયર એક્સ્ટિંગ્યુશર લગાવવાના રહેશે.
આ ઉપરાંત યાંત્રિક રાઈડસધારકોએ કોઈ અનિચ્છનિય બનાવ ના બને તે માટે વીમો લેવાનો રહેશે. યાંત્રિક રાઈડ્સધારકોએ ફિટનેસ સર્ટિફિકેટ મેળવવાના રહેશે. યાંત્રિક રાઇડસ ધારકોને ટેસ્ટ રિપોર્ટ મેળવ્યા બાદ જ વીજજોડાણ આપવામાં આવશે. તમામ રાઇડસ ધારકોએ ઈ.એલ.સી.બી. લગાવવાના રહેશે.
લોકમેળામાં સિંગલ યુઝ પ્લાસ્ટિક વપરાશ પર પ્રતિબંધ હોવાથી સિંગલ યૂઝ પ્લાસ્ટિક વાપરી શકાશે નહીં. દરેક સ્ટોલધારકોએ ફાળવેલી જગ્યા પાસે એક ડસ્ટબીન ફરજીયાત પણે મુકવાની રહેશે. લોકમેળા દરમિયાન પણ આ ડસ્ટબિનમાંથી કચરો એકઠો કરી મોટી કચરાપેટીમાં લઈને નિકાલ માટે વ્યવસ્થા કરવાની રહેશે. લોકમેળાના દરેક સ્ટોલ-પ્લોટ ધારકોએ સરકારના પ્રવર્તમાન ધારાધોરણ મુજબ, જીએસટી ભરવાનો રહેશે. ઉપરાંત કોઈ અનિચ્છનિય બનાવ ના બને તે માટે સરકારના પ્રવર્તમાન એસ.ઓ.પી.– નિયમો તથા સૂચનાઓનું પાલન કરવાનું રહેશે.
સોમવારથી ફોર્મ વિતરણ
રાજકોટમાં લોકમેળામાં આ વખતે ૩૦ ટકા એટલે કે,અંદાજે ૧૦૮ સ્ટોલ ઘટાડાશે. ભીડ નિયંત્રિત કરવા માટે આ નિર્ણય લેવામા આવ્યો છે. મેળાનો નવો લે-આઉટ પ્લાન ફાઇનલ કરી લેવાયો છે. સોમવારથી સંભવતઃ મેળાના સ્ટોલના ફોર્મનું સીટી પ્રાંત-૧ દ્વારા વિતરણ શરૂ કરી દેવાશે. સ્ટોલના ભાડા વધારવા અંગે કલેકટરે જણાવેલ કે તે અંગે હવે નિર્ણય લેવાશે.
