ટીમ ઈન્ડિયાનો આગામી લીગ મેચ ન્યુઝીલેન્ડ સાથે હશે. પરંતુ આ બંને ટીમો પહેલાથી જ સેમિફાઈનલ માટે ક્વોલિફાય થઈ ગઈ છે અને આ મેચ પોઈન્ટ ટેબલમાં નંબર-1 સ્થાન માટેની લડાઈ માટે હશે. ટીમ ઈન્ડિયા આ મેચ માટે સખત પ્રેક્ટિસ કરી રહી છે.
શુભમન ગિલની ખરાબ તબિયતને કારણે મેચ પહેલા ટીમ ઈન્ડિયાનું ટેન્શન વધી ગયું છે. ભારતીય ટીમનો આગામી મુકાબલો 2 માર્ચે ન્યુઝીલેન્ડ સાથે થશે.
શુભમન ગિલની લથડી તબિયત
બુધવારે પ્રેક્ટિસ સત્ર દરમિયાન કેપ્ટન રોહિત શર્મા અને વાઈસ-કેપ્ટન શુભમન ગિલ બંને ગેરહાજર હતા. ચેમ્પિયન્સ ટ્રોફીમાં પાકિસ્તાન સામેની મેચ દરમિયાન હિટમેનને હેમસ્ટ્રિંગમાં ઈજા થઈ હતી. આ દરમિયાન, ગિલની તબિયત બગડી ગઈ જેના કારણે તેને બુધવારે પ્રેક્ટિસમાં ભાગ લીધો ન હતો.
મીડિયા રિપોર્ટ મુજબ, શુભમન ગિલ ખરાબ તબિયતને કારણે પ્રેક્ટિસ સત્રમાં ભાગ લઈ શક્યો ન હતો. પરંતુ ન્યુઝીલેન્ડ સામેની મેચ પહેલા ગિલ સ્વસ્થ થઈ જશે તેવી અપેક્ષા છે. બીજી તરફ, બીમાર રિષભ પંતે પણ બુધવારે પ્રેક્ટિસ સેશનમાં પરસેવો પાડ્યો હતો. આ સિવાય મોહમ્મદ શમીએ બેટ્સમેનોને જોરદાર બોલિંગ કરી.
ગિલ અદ્ભુત ફોર્મમાં
શુભમન ગિલ ચેમ્પિયન્સ ટ્રોફી 2025માં શાનદાર ફોર્મમાં છે. અત્યાર સુધીમાં ગિલના બેટમાંથી એક સદી આવી છે, જે તેને બાંગ્લાદેશ સાથે રમાયેલી મેચમાં ફટકારી હતી. આ મેચમાં ગિલે 101 રનની અણનમ ઈનિંગ રમી.
આ સિવાય ગિલે પાકિસ્તાન સામે 46 રનની ઈનિંગ રમી હતી. શુભમન ગિલ ટુર્નામેન્ટમાં ભારત તરફથી સૌથી વધુ રન બનાવનાર ખેલાડી છે, તેને અત્યાર સુધીમાં બે મેચમાં 147 રન બનાવ્યા છે. આ પરિસ્થિતિમાં, ટીમ ઈન્ડિયા અને ફેન્સ ઈચ્છશે કે ગિલ સંપૂર્ણપણે ફિટ અને ફોર્મમાં રહે.
