આચારસંહિતા લાગુ થતાં રાજકોટમાં કડક સુરક્ષા વ્યવસ્થા: લાઇસન્સધારકોને હથિયાર જમા કરવાનો આદેશ
ચૂંટણીને નિર્ભય બનાવવા પોલીસની ‘ઝીરો ટોલરન્સ’ નીતિ, સંવેદનશીલ વિસ્તારોમાં સતત પેટ્રોલિંગ
અગ્ર ગુજરાત, રાજકોટ
સ્થાનિક સ્વરાજ્યની ચૂંટણીની જાહેરાત સાથે જ રાજકોટ શહેરમાં આચારસંહિતા અમલમાં આવી છે અને તેની સાથે પોલીસ તંત્ર સંપૂર્ણ સજ્જ થઈ ગયું છે. લોકશાહીના આ મહત્વપૂર્ણ તબક્કામાં શાંતિપૂર્ણ અને નિર્ભય વાતાવરણમાં મતદાન થાય તે માટે શહેર પોલીસ દ્વારા કડક પગલાં લેવામાં આવી રહ્યા છે.
ચૂંટણી જાહેર થતાં જ પોલીસ દ્વારા જાહેરનામું બહાર પાડી તમામ લાઇસન્સધારકોને પોતાના હથિયારો તાત્કાલિક નજીકના પોલીસ મથકે જમા કરાવવા સૂચના આપવામાં આવી છે. ચૂંટણી પ્રક્રિયા પૂર્ણ ન થાય ત્યાં સુધી કોઈપણ પ્રકારની હથિયાર હેરફેર પર સંપૂર્ણ પ્રતિબંધ મુકવામાં આવ્યો છે. પોલીસ તંત્રએ સ્પષ્ટ કર્યું છે કે ચૂંટણી દરમિયાન કોઈપણ પ્રકારની અશાંતિ અથવા ગેરકાયદે પ્રવૃત્તિ સહન કરવામાં આવશે નહીં. આ માટે ‘ઝીરો ટોલરન્સ’ નીતિ અપનાવવામાં આવી છે, જેના અંતર્ગત અસામાજિક તત્ત્વો સામે કડક કાર્યવાહી હાથ ધરવામાં આવશે.
ચૂંટણીને ધ્યાને રાખીને ગુનેગારો પર ખાસ નજર રાખવામાં આવી રહી છે. પેરોલ પર રહેલા અથવા પેરોલ માટે અરજી કરનારા ગુનેગારોને મુક્તિ આપવામાં નહીં આવે. ઉપરાંત, નાસતા ફરતા આરોપીઓની શોધખોળ વધુ તેજ કરવામાં આવી છે. શહેરમાં ગેરકાયદે દારૂના ઉત્પાદન અને વેચાણ પર પણ પોલીસની ચાંપતી નજર રહેશે. આવા ધંધાઓ પર તાત્કાલિક દરોડા પાડીને કાર્યવાહી કરવામાં આવશે. સુરક્ષા વ્યવસ્થાના ભાગરૂપે શહેરના સંવેદનશીલ અને અતિસંવેદનશીલ વિસ્તારોમાં પોલીસ દ્વારા સતત પેટ્રોલિંગ કરવામાં આવશે. દિવસ-રાત રાઉન્ડ ધ ક્લોક પેટ્રોલિંગ દ્વારા શાંતિ જળવાઈ રહે તે માટે ખાસ આયોજન કરવામાં આવ્યું છે.
મતદાનના ત્રણ દિવસ અગાઉથી ચેકિંગ પ્રક્રિયા વધુ કડક બનાવવામાં આવશે. શહેરના પ્રવેશદ્વારો પર ચેકપોસ્ટ ઉભા કરી બહારથી આવતા શંકાસ્પદ તત્ત્વો પર નજર રાખવામાં આવશે, જેથી કોઈપણ રીતે ચૂંટણી પ્રક્રિયામાં વિઘ્ન ન ઊભું થાય. આ ઉપરાંત, બૂથ કેપ્ચરિંગ અથવા મતદારોને ધાક-ધમકી આપવાના પ્રયાસો સામે પણ સખત સુરક્ષા કવચ ઊભું કરવામાં આવશે. રાજકીય પક્ષો અથવા નાગરિકો તરફથી મળતી ફરિયાદો પર તાત્કાલિક એક્શન લેવામાં આવશે. આ રીતે રાજકોટ પોલીસ દ્વારા ચૂંટણીને નિર્ભય, નિષ્પક્ષ અને શાંતિપૂર્ણ બનાવવા માટે સર્વગ્રાહી આયોજન કરવામાં આવ્યું છે.
