- ધુમ્મસને કારણે દિલ્હી એરપોર્ટ પરથી 8 ફ્લાઇટ્સ ડાયવર્ટ કરાઇ
- 11 રાજ્યોમાં ધુમ્મસને કારણે રોડ, રેલ અને એરટ્રાફિકને અસર
- જમ્મુ-કાશ્મીરમાં ઘણી જગ્યાએ પારો શૂન્યથી નીચે ગયો
ઉત્તર ભારતમાં વાતાવરણમાં મોટો ફેરફાર થઈ ગયો છે. ગાઢ ધુમ્મસને કારણે લોકોની મુશ્કેલીઓ વધી ગઈ છે. મંગળવારે સવારે દિલ્હી-NCRમાં ઠંડીની સાથે સાથે રસ્તાઓ પર હળવું ધુમ્મસ પણ જોવા મળ્યું હતું. સવારે યમુના કિનારે ધુમ્મસના સ્તર જોવા મળ્યા હતા.
ધુમ્મસના કારણે થંભી ગઈ ટ્રેનો
ઠંડીના કારણે ટ્રેનોની મહત્તમ સ્પીડ ઘટીને 15 થી 20 કિલોમીટર થઈ ગઈ છે. પંજાબ, હરિયાણા, ઉત્તર પ્રદેશ અને પૂર્વ મધ્ય પ્રદેશમાં ગાઢ ધુમ્મસ છવાયું રહ્યું. ઓડિશામાં હળવું ધુમ્મસ અને ત્રિપુરામાં મધ્યમ ધુમ્મસ હતું.
પંજાબના અમૃતસર, લુધિયાણા અને પટિયાલા, હરિયાણાના અંબાલા, હિસાર, કરનાલમાં સવારે 8.30 વાગ્યાની આસપાસ વિઝિબિલિટી 200 મીટરથી ઓછી હતી. ભિવાનીમાં 50, રોહતકમાં 200, દિલ્હીના પાલમમાં 50, સફદરજંગમાં 200, ઉત્તર પ્રદેશના ઝાંસી અને વારાણસીમાં 25, મેરઠ અને લખનૌમાં 50, બરેલીમાં 200 વિઝિબિલિટી હતી. IGI એરપોર્ટ પાલમ પર સવારે ગાઢ ધુમ્મસ છવાયેલું રહ્યું. સામાન્ય વિઝિબિલિટી 50 મીટર રહી હતી અને મોટાભાગના એરપોર્ટ RVR મર્યાદામાં હતા.
11 રાજ્યોમાં ધુમ્મસને કારણે ઝડપ ઘટી ગઈ
ગઈકાલે, દિલ્હી અને કાશ્મીરથી લઈને દક્ષિણમાં તેલંગાણા અને દક્ષિણ-પૂર્વમાં ઓડિશા સુધીના 11 રાજ્યોમાં ધુમ્મસને કારણે ઝડપ ઘટી ગઈ હતી. વિઝિબિલિટીમાં ભારે ઘટાડો થવાને કારણે રોડ, રેલવે અને એર ટ્રાફિકને ખરાબ રીતે અસર થઈ હતી. દિલ્હીથી 8 ફ્લાઈટ ડાયવર્ટ કરવામાં આવી છે. ઉત્તર પ્રદેશ, હરિયાણા, પંજાબ, રાજસ્થાન અને તેલંગાણામાં માર્ગ અકસ્માતમાં 19 લોકોએ જીવ ગુમાવ્યા. જમ્મુ-કાશ્મીરમાં ઘણી જગ્યાએ પારો શૂન્યથી નીચે ગયો હતો. પહેલગામ સૌથી ઠંડું રહ્યું હતું.
