દ્વારકામાં દર્શને આવતા શ્રધ્ધાળુઓને નશીલુ પીણુ પીવડાવતી લૂંટતી ગેંગ પકડાઇ
ભાવનગરના બે શખ્સો રૂ.3.૧૪ લાખના મુદ્દામાલ સાથે લોકલ ક્રાઇમ બ્રાંચે દબોચી લીધા
અગ્ર ગુજરાત, દ્વારકા
જગત મંદિર દ્વારકાના દર્શનાર્થે આવતા ભોળા ભક્તોને વિશ્વાસમાં લઈ, તેમને નશીલું પીણું પીવડાવી લૂંટી લેતી એક શાતિર ટોળકીનો દેવભૂમિ દ્વારકા લોકલ ક્રાઈમ બ્રાન્ચ (LCB)એ પર્દાફાશ કર્યો છે. ભાવનગર જિલ્લાના બે શખસને રૂ. 3.14 લાખના મુદ્દામાલ સાથે ઝડપી પાડી પોલીસે યાત્રિકોની સુરક્ષા સુનિશ્ચિત કરી છે.
આરોપીઓ ખાસ કરીને વૃદ્ધ અને નિર્દોષ દર્શનાર્થીઓને નિશાન બનાવતા હતા. સૌથી પહેલા આરોપીઓ ભક્તો સાથે મીઠી વાતો કરી તેમનો વિશ્વાસ જીતતા. ત્યાર બાદ તેમને એકાંત સ્થળે લઈ જઈ શેરડીના રસ કે ઠંડા પીણામાં ધતુરાનો પાવડર ભેળવી પીવડાવી દેતા. પીણું પીતા જ ભક્તો બેભાન થઈ જતા, જેનો લાભ ઉઠાવી આરોપીઓ તેમના શરીર પરના સોનાના દાગીના અને રોકડ લૂંટીને ફરાર થઈ જતા હતા.
તાજેતરમાં હોળી-ધુળેટીના ફૂલડોલ ઉત્સવ દરમિયાન જામજોધપુર પંથકથી આવેલા બે દર્શનાર્થીને આ ટોળકીએ નિશાન બનાવ્યા હતા. તેમને શેરડીના રસમાં ધતુરો પીવડાવી સોનાના ઠોરીયા અને રોકડની લૂંટ ચલાવી હતી. આ અંગે દ્વારકા પોલીસ મથકે ગુનો નોંધાતાં પોલીસ એક્શનમાં આવી હતી.
જિલ્લા પોલીસવડા જયરાજસિંહ વાળાની સૂચનાથી LCB પીઆઈ બી.જે. સરવૈયાની ટીમે ટેકનિકલ સર્વેલન્સ અને બાતમીદારોની મદદથી તપાસ તેજ કરી હતી. ખંભાળિયા-પોરબંદર હાઈવે પર રેલવે ફાટક પાસે વોચ ગોઠવી પોલીસે બે આરોપીને દબોચી લીધા હતા. કાળુ અમરસી વાઘેલા (રહે. ઉમરાળા, જિ. ભાવનગર) – જેની સામે અગાઉ અમદાવાદ અને ભાવનગરમાં 6 ગુના નોંધાયેલા છે. હરેશ ઉર્ફે હકલો બાબુ માતાચોળીયા (રહે. માયધર, તા. પાલીતાણા) – જેનો પણ ગુનાહિત ઇતિહાસ છે.
જપ્ત કરાયેલો મુદ્દામાલમાં સોનાના ઠોરીયા (6 નંગ) રૂ. 3,05,000, મોબાઈલ ફોન (2 નંગ) રૂ. 6,000, રોકડ રકમ: રૂ. 3,000 સહિત કુલ રૂ. 3,14,000નો મુદામાલ જપ્ત કરાયો છે.
