– સૌથી વધુ રકમ નાણાંકીય સેવા ક્ષેત્ર તથા વીજ ઉત્પાદન કંપનીઓ દ્વારા ઊભી કરાઈ
– ગત નાણાં વર્ષના પ્રથમ ૬ માસમાં રૂ. ૪૦૨૨ કરોડની સરખામણીએ વર્તમાન નાણાં વર્ષના પ્રથમ ૬ મહિનામાં દેશની કુલ રૂપિયા ૧૮૪૪૩ કરોડ ઊભા કર્યા
Updated: Oct 5th, 2023
મુંબઈ : વર્તમાન નાણાં વર્ષના પ્રથમ ૬ મહિનામાં ભારતીય કંપનીઓ દ્વારા કવાલિફાઈડ ઈન્સ્ટિટયૂશનલ પ્લેસમેન્ટ (કયુઆઈપી) ચેનલ મારફત ગયા નાણાં વર્ષના પ્રથમ ૬ મહિનાની સરખામણીએ ૪.૬૦ ગણી વધુ મૂડી ઊભી કરાઈ છે. નાણાં વર્ષ ૨૦૨૩ના પ્રથમ ૬ મહિનામાં રૂપિયા ૪૦૨૨ કરોડની સરખામણીએ વર્તમાન નાણાં વર્ષના પ્રથમ ૬ મહિનામાં દેશની વીસ કંપનીઓએ કુલ રૂપિયા ૧૮૪૪૩ કરોડ ઊભા કર્યા છે એમ એક રિસર્ચ રિપોર્ટમાં જણાવાયું હતું.
નાણાંકીય સેવા ક્ષેત્ર તથા વીજ ઉત્પાદન ક્ષેત્રની કંપનીઓ દ્વારા કયુઆઈપી ચેનલનો વધુ ઉપયોગ કરવામાં આવ્યો છે. ઊભી કરાયેલી કુલ રકમમાંથી ૭૦ ટકા અથવા તો રૂપિયા ૧૨૮૯૦ કરોડ આ બે ક્ષેત્રની કંપનીઓ દ્વારા ઊભા કરવામાં આવ્યા છે.
આજ રીતે પ્રથમ ૬ મહિનામાં ઈક્વિટીઝના વેચાણ મારફત રૂપિયા ૭૩૭૪૭ કરોડ ઊભા કરાયા છે, જે વાર્ષિક ધોરણે ૬૯ ટકા વધુ છે. ઈક્વિટી મારફત ઊભી કરાયેલી રકમમાં નવી મૂડીનો હિસ્સો ૫૬ ટકા અથવા તો રૂપિયા ૪૧૪૮૫ કરોડ રહ્યા છે, જે મજબૂત મૂડી રચના સૂચવે છે.
નાના તથા મધ્યમ ઉપક્રમો દ્વારા પણ ઈક્વિટી વેચાણ પ્રવૃત્તિમાં વધારો જોવા મળ્યો છે. અંદાજે ૯૭ જેટલા એસએમઈ આઈપીઓ મારફત રૂપિયા ૨૭૩૧ કરોડ ઊભા કરાયા છે, જે પાછલા નાણાં વર્ષના પ્રથમ ૬ મહિનામાં ૬૩ એસએમઈ આઈપીઓ મારફત ઊભા કરાયેલા રૂપિયા ૧૧૩૭ કરોડની સરખામણીએ ૨.૪૦ ગણા છે.
આવનારા મહિનાઓમાં પણ પ્રાઈમરી બજારને લઈને રિપોર્ટમાં આશાવાદ વ્યકત કરવામાં આવ્યો છે. ૨૮ જેટલી કંપનીઓએ રૂપિયા ૩૮૦૦૦ કરોડ જેટલી રકમ ઊભી કરવા સેબીની મંજુરી મેળવી લીધી છે. આ ઉપરાંત બીજી ૪૧ કંપનીઓ જે રૂપિયા ૪૪૦૦૦ કરોડ ઊભા કરવા ધારે છે, તે સેબીની મંજુરીની રાહ જોઈ રહી છે.
લોકસભાની ચૂંટણીને ધ્યાનમાં રાખી આવતા વર્ષે આઈપીઓ માર્કેટ ધીમી પડવાની શકયતા નકારાતી નથી.
