- ગાંધીનગર ડેપોમાં સુવિધાની ખાતરી સુરક્ષા નહીં! CCTV શોભાના ગાંઠિયા બન્યા
- પોલીસના અનેક પ્રયત્નો થતાં મુસાફરોની ભીડમાં ચોરીને કરીને મુસાફરો બની
- ગઠીયા 2 લાખના પાંચ મોબાઈલ સરકાવી ગયા છે
ગાંધીનગર એસટી ડેપોમાં બસમાં ચઢતા સમયે મોબાઈલ કે કિંમત સામાન ચોરી થવાની ઘટના છાશવારે બને છે. પોલીસના અનેક પ્રયત્નો થતાં મુસાફરોની ભીડમાં ચોરીને કરીને મુસાફરો બનીને છૂ થઈ જતાં ગઠીયા હાથમાં આવતા નથી. ત્યારે બે દિવસ દરમિયાન સે-7 પોલીસ સ્ટેશનના ચોપડે ડેપો ખાતેથી મોબાઈલ ચોરીની પાંચ ઘટના નોંધાઈ છે. જેમાં ગઠીયા 2 લાખના પાંચ મોબાઈલ સરકાવી ગયા છે. જેને પગલે પોલીસને ડેપો ખાતે પીસીઆર ગોઠવવાની ફરજ પડી હતી. જેમાં સિવિલ ડ્રેસમાં પોલીસ જવાનો ભીડ પર નજર રાખતા જોવા મળ્યા હતા.
એસટી નિગમ દ્વારા ગાંધીનગર ડેપો ખાતે વધારે બસો, સ્વચ્છતાં સહિતની સુવિધાની ખાતરી આપે છે. જોકે બસમાં ચઢતા સમયે કિંમતી સામાન કે મોબાઈલ ચોરાય તેની કોઈ ખાતરી નથી. કારણ કે ડેપો ખાતે રહેલાં મોટાભાગના સીસીટીવી બંધ હાલતમાં હોવાનું કહેવાય છે. જેને પગલે તસ્કરોને અહીં મોકળું મેદાન મળી ગયું છે. જેમાં આંતરેદિવસે કોઈને કોઈ મુસાફરનો મોબાઈલ ગઠીયા સરકાવી જાય છે. સામાન્ય લાગતી આ ઘટનામાં મહિનાની ગણતરી કરીએ તો ગઠીયા લાખોની ચોરીને અંજામ આપે છે. સેક્ટર-7 પોલીસ સ્ટેશનના ચોપડે બીજી અને ત્રીજી ફેબ્રુ.ના બે દિવસમાં ચોરીની પાંચ જેટલી ઘટના નોંધાઈ છે. જેમાં ગઠીયા 2 લાખાના પાંચ મોબાઈલ સરકાવી ગયા છે. ત્યારે અત્યાર સુધી ગઠીયાઓ કુલ કેટલી કિંમતના ફોન સરકાવી ગયા હશે તેનો વિચારવું જ રહ્યું.વધેલી ચોરીઓને પગલે પોલીસ પણ દોડતી થઈ છે, જેમાં ડેપો ખાતે જ પીસીઆર વાન મુકીને પોલીસ જવાનો ભીડ પર નજર રાખતા જોવા મળ્યા હતા. જોકે પોલીસ હાજર હોય ત્યાં સુધી જ ગઠીયા શાંત રહે છે, પોલીસ અન્ય કેસ કે કોલમાં નીકળે તરત જ ચોરીને અંજામ આપતા હોવાનું કહેવાય છે. ડેપોમાં પોલીસ ચોકી ઉભી કરવા માટે વર્ષો જૂની માંગણી છે. જોકે ચોકી ઉભી કરવા માટે પોલીસને જગ્યા આપવામાં ન આવતી હોવાનું કહેવાય છે. એટલું જ નહીં સીસીટીવી પણ શોભાના ગાંઠીયા સમાન હોવાને પગલે તસ્કરો જલ્દી હાથમાં આવતા નથી.
બે દિવસમાં પોલીસ ચોપડે ચઢેલી પાંચ ઘટના
સે-7 શ્યામજી કૃષ્ણવર્મા પાર્ક ખાતે રહેતો 33 વર્ષીય યુવક જીજ્ઞેશ મંડલી પ્રાઈવેટ કંપનીમાં મેનેજર છે.1 ફેબ્રુઆરી સવારે 8:10 કલાકે સરખેજ જતી બસમાં ચઢતાં સમયે ખિસ્સામાં 30 હજારનો ફોન ગયો.
છત્રાલ રહેતાં ઈંદુબેન સોલંકી પોતાની 3 વર્ષની દીકરીને લઈને 30જાન્યુ.ના રોજ ગાંધીનગર સિવિલ ફિઝિયોથેરાપીસ્ટની સારવાર માટે આવ્યા હતા.પરત ફરતાં સમયે બપોરે દોઢ કલાકે ગાંધીનગર-બેચરાજી બસમાં બેસતા સમયે 10 હજારનો ફોન ગઠીયો કાઢી ગયો હતો.
સે-15 એલડીઆરપી કોલેજ હોસ્ટેલમાં રહેતો 22 વર્ષીય નિહાર કનુભાઈ પરમાર 28 જાન્યુ.ના રોજ અમદાવાદ સંબંધીના ઘરે જવા નીકળ્યો હતો. ગાંધીનગર-સરખેજની બસમાં બેસતા સમયે જ રૂ.30 હજારનો ફોન ચોરાયો હતો.
20 વર્ષીય યુવક તક્ષ રાજુભાઈ પટેલ ખેરવા ગણપત યુનિ.ખાતે રહી અભ્યાસ કરે છે. 28 જાન્યુ.ના રોજ સરગાસણ મિત્રને મળવા આવેલો યુવક સાંજે 4:45 કલાકે ગાંધીનગર-ઈડર જતી બસમાં બેઠો ત્યારે 40 હજારનો આઇફોન-13 ચોરાયો હતો.
19 વર્ષીય રાજ જગદીશકુમાર પ્રણામી સ્વર્ણીમ યુનિ. ખાતે અભ્યાસ કરે છે. 23 જાન્યુ.ના રોજ યુવક કોલેજ જવા બસની રાહ જોતો હતો. આ સમયે 8:50 કલાકે ગાંધીનગર-સરખેજની બસ આવતા યુવક તેમાં બેઠો ત્યારે 90 હજારનો આઈફોન-11 પ્રો મેક્સ ફોન ચોરાયો હતો.
