કટારિયા ચોકડી બ્રિજ, સર્વેશ્વર ચોક સહિતના સ્થળે મ્યુનિ.કમિશનર તુષાર સુમેરાએ કરી સાઇઝ વીઝીટ
કટારિયા ચોકડીએ ડાયવર્ઝનની કામગીરી પુર્ણતાના આરે, કમિશનરે ન્યારી-૧ ડેમની પણ લીધી મુલાકાત
અગ્ર ગુજરાત, રાજકોટ
રિપોર્ટર: જયેશ રાઠોડ
રાજકોટના પ્રવેશદ્વાર કાલાવડ રોડ પર કટારિયા ચોકડીએ શરૂ થયેલા મલ્ટીલેયર ફ્લાયઓવર બ્રિજ(ડબલ ડેકર કેબલ બ્રિજ)ના ચાલતા કામની સમીક્ષા કરવા મ્યુનિ.કમિશનર સંબંધિત અધિકારીઓની ટીમને સાથે રાખીને સ્થળ વિઝીટ કરવા ગયા હતા. આ ઉપરાંત યાજ્ઞિક રોડ સર્વેશ્વર ચોક ખાતે બની રહેલ વોંકળાની કામગીરી અંગે સ્થળ મુલાકાત કરી હતી. ચોમાસાને ધ્યાનમાં રાખીને પ્રિ-મોન્સુન અંતર્ગત ન્યારી-૧ ડેમની વિઝિટ કરી હતી. કટારીયા ચોકડી ખાતે ડાયવર્ઝન રૂટ પૂર્ણતાના આરે છે તેમજ સર્વેશ્વર ચોક ખાતેના વોંકળાની કામગીરી ઝડપી પૂર્ણ કરવા મ્યુનિસિપલ કમિશનરશએ સંબંધિત અધિકારી અને એજન્સીના પ્રતિનિધિને સુચના આપી હતી.
આગામી સમયમાં ચોમાસાને ધ્યાનમાં રાખીને ન્યારી-૧ ડેમ ખાતે સાઈટ વિઝિટ કરી મ્યુનિસિપલ કમિશનર તુષાર સુમેરાએ ડેમનું નિરીક્ષણ કર્યું હતું. કટારીયા ચોકડી ખાતે દૈનિક હજારોની સંખ્યામાં પસાર થતાં વાહનોના પરિવહનને સમગ્ર પ્રોજેકટ દરમિયાન અસર ના થાય તે અંગેનું આગોતરું આયોજન કરી તેના રૂટ ડાયવર્ઝનની કામગીરી પૂર્ણતાને આરે છે બ્રિજના પિઅરની કામગીરી શરૂ થાય તે પહેલા ડાયવર્ઝન રૂટ પર વાહનોની અવર જવર રાબેતા મુજબ થઈ શકે તેવું આયોજન રાજકોટ મહાનગરપાલિકા દ્વારા કરવામાં આવ્યું છે. કટારીયા ચોકડી ખાતે મ્યુનિસિપલ કમિશનરશ્રીએ ચાલતી રૂટની કામગીરી અંગે પ્રોગ્રેસ રિપોર્ટ મેળવ્યો હતો. સર્વેશ્વર ચોક ખાતે ચાલી રહેલ વોંકળાની કામગીરી અંગે મ્યુનિસિપલ કમિશનરે ચાલુ કામગીરી નિહાળી સંબંધિત અધિકારી અને એજન્સીના પ્રતિનિધિને કામગીરી ઝડપી પૂર્ણ કરવા સુચના આપી હતી. મ્યુનિસિપલ કમિશનરની વિઝિટ દરમ્યાન નાયબ મ્યુનિસિપલ કમિશનર મનીષ ગુરવાની, ચેતન નંદાણી, હર્ષદ પટેલ, સિટી એન્જી. કે.પી. દેથારીયા, અતુલ રાવલ, કુંતેશ મેતા, નાયબ પર્યાવરણ ઈજનેર દિગ્વિજયસિંહ તુવર તેમજ સંબંધિત એજન્સીના પ્રતિનિધિ વગેરે ઉપસ્થિત રહ્યા હતા.
