- DMKએ પોતાના બે સહયોગીઓને એક-એક બેઠકો આપી
- સીટ શેરિંગ બેઠકમાં રાજ્યસભાને લઈને ન થઈ કોઈ ચર્ચા
- સીટ શેરિંગને લઈને કોંગ્રેસ અને ડાબેરીઓ સાથે ચર્ચા બાકી
તમિલનાડુમાં સત્તાધારી દ્રમુકે શનિવારે પોતાના બે સહયોગી પક્ષોને એક-એક લોકસભા બેઠકો આપી છે. DMK વિપક્ષી ગઠબંધન ‘INDIA’નો ભાગ છે. એપ્રિલ-મેમાં યોજાનારી લોકસભા ચૂંટણી માટે સાથી પક્ષો સાથે બેઠક-વહેંચણીની વાટાઘાટો શરૂ કર્યાના અઠવાડિયા બાદ DMK પ્રમુખ અને સીએમ એમકે સ્ટાલિન અને સહયોગી પક્ષોના નેતાઓએ અહીં પક્ષના મુખ્યાલય ‘અન્ના અરિવલયમ’ ખાતે સીટ શેરિંગ કરાર પર હસ્તાક્ષર કર્યા. મુખ્ય વિપક્ષી પાર્ટીઓ AIADMK અને BJPએ હજુ સુધી તેમના સાથી પક્ષોની જાહેરાત કરી નથી.
IUML અને KMDKને મળી 1-1 બેઠક
DMKના લાંબા સમયથી સહયોગી રહેલ ભારતીય યુનિયન મુસ્લિમ લીગ (IUML) ને દક્ષિણ તમિલનાડુમાં રામનાથપુરમ બેઠક ફાળવવામાં આવી છે, જ્યારે કોંગુનાડુ મક્કલ દેસિયા કાચી (KMDK) ને નમાક્કલ બેઠક આપવામાં આવી છે. IUML ના રાષ્ટ્રીય અધ્યક્ષ કે. એમ. કાદર મોહિદ્દીને કહ્યું કે તેમની પાર્ટીના રામનાથપુરમથી વર્તમાન સાંસદ નવાસ કાનીને લોકસભા ચૂંટણી લડવા માટે ફરીથી ઉમેદવાર બનાવવામાં આવશે.
રાજ્યસભા બેઠક પર ન થઈ કોઈ ચર્ચા
મોહિદીને પત્રકારોને જણાવ્યું હતું કે તેમની પાર્ટીએ સીટ શેરિંગની ચર્ચા દરમિયાન DMK પાસેથી રાજ્યસભાની એક બેઠકની વિનંતી કરી હતી. જો કે, DMK એ કહ્યું કે સીટ શેરિંગની કવાયત લોકસભા ચૂંટણી સુધી મર્યાદિત છે અને રાજ્યસભાની ચૂંટણી સંબંધિત પ્રશ્નો પછીથી યોગ્ય સમયે ઉઠાવી શકાય છે. IUML અને KMDK બંનેને 2019ની લોકસભા ચૂંટણીમાં આપવામાં આવી હતી તે જ બેઠકો ફાળવવામાં આવી છે.
કોંગ્રેસ અને ડાબેરી પક્ષો સાથે બાકી છે ચર્ચા
KMDKના જનરલ સેક્રેટરી ઇશ્વરને જણાવ્યું હતું કે તેમની પાર્ટી દ્વારા નામાંકિત ઉમેદવાર DMKના ચૂંટણી ચિન્હ ‘રાઇઝિંગ સન’ પર ચૂંટણી લડશે. એવી આશા છે કે DMK ટૂંક સમયમાં કોંગ્રેસ, VCK અને ડાબેરી પક્ષો સહિત અન્ય સહયોગીઓ સાથે બેઠકોની વહેંચણીને અંતિમ સ્વરૂપ આપશે.
કોંગ્રેસે ઉત્તર ભારતમાં અખિલેશ યાદવની સમાજવાદી પાર્ટી અને અરવિંદ કેજરીવાલની આમ આદમી પાર્ટી સાથે સમજૂતી કરી છે. પશ્ચિમ બંગાળમાં મમતા બેનર્જી સાથે કોંગ્રેસની પણ વાત થઈ ગઈ છે. આ રાજ્યોમાં સીટ વહેંચણીની ચર્ચાને લઈને વિપક્ષી ગઠબંધન વધુ મજબૂત થઈ રહ્યું છે. આ શાસક એનડીએ ગઠબંધનને પડકાર આપી શકે છે.
