નફાની લાલચે રોકાણ કરાવ્યું, દંપતી અને સાળા સામે ગોંડલ સિટી બી ડિવિઝનમાં ગુનો
ગોંડલ શહેરમાં એક્સપોર્ટ-ઈમ્પોર્ટના ધંધામાં ઊંચા નફાની લાલચ આપી કોમ્પ્યુટર ઈજનેર યુવક પાસેથી રૂ. 1.37 કરોડની ઠગાઈ થયાનો ગંભીર બનાવ સામે આવ્યો છે. આ મામલે ગોંડલ સિટી બી ડિવિઝન પોલીસમાં ફરિયાદ નોંધાઈ છે.
ગુંદાળા રોડ, જય સરદાર રેસિડન્સીમાં રહેતા 31 વર્ષીય રવિભાઈ કેશવભાઈ રામોલીયાએ નોંધાવેલી ફરિયાદ મુજબ, સોનલબેન જગદીશ દુધાત્રા, તેમના પતિ ઉર્વીષ પટેલ અને ભાઈ ઉત્સવ જગદીશ દુધાત્રાએ મળીને આ છેતરપિંડી આચરી હતી. આરોપીઓએ એક્સપોર્ટ-ઈમ્પોર્ટના ધંધામાં દર મહિને ચાર ટકા નફો આપવાની ખાતરી આપી શરૂઆતમાં નાની રકમ પર નિયમિત નફો ચૂકવ્યો હતો, જેથી વિશ્વાસ બેસી ગયો.
ફરિયાદી છેલ્લા 11 વર્ષથી એક ખાનગી કંપનીમાં નોકરી કરે છે અને સોનલબેન સાથે 2018થી પરિચિત હતા. વર્ષ 2020માં સોનલબેને પોતે અને ભાઈ મળીને ગોંડલમાં એક્સપોર્ટ-ઈમ્પોર્ટનો વ્યવસાય શરૂ કર્યો હોવાનું કહી રોકાણ માટે મનાવ્યા. શરૂઆતમાં રૂ. 1 લાખથી રોકાણ શરૂ થયું અને નિયમિત નફા મળતાં ધીમે ધીમે રોકાણ વધતું ગયું.
આ દરમિયાન આરોપીઓના કહેવાથી ફરિયાદીના પરિવારજનોએ મકાન, શેડ અને પ્લોટ વેચી તેમજ સગાસંબંધી પાસેથી ઉધાર લઈને મોટી રકમ રોકાણમાં મૂકી. વર્ષ 2020થી 2023 દરમિયાન કુલ રૂ. 1,37,48,400નું રોકાણ કરાયું હતું, જેમાંથી નફા તરીકે અંદાજે રૂ. 60 લાખ જેટલી રકમ પરત મળી હતી.
પછી નફો અને મૂળ રકમ આપવાનું બંધ થતાં ફરિયાદીએ પૈસા પરત માંગ્યા, તો માત્ર બે વખત રૂ. 50-50 હજાર જમા કરાવી મામલો ટાળવાનો પ્રયાસ થયો. ફરિયાદ કરવાની વાત કરતાં આરોપીઓએ ધમકી આપ્યાનો પણ આરોપ છે. અંતે છેતરપિંડીની જાણ થતાં ફરિયાદ નોંધાવાઈ છે. પોલીસે છેતરપિંડી સહિતની કલમ હેઠળ ગુનો નોંધી તપાસ શરૂ કરી છે.
આ દંપતીએ અગાઉ ઇરાકના બગદાદ સ્થિત એક વેપારીને પણ એક્સપોર્ટના નામે શિકાર બનાવ્યો હોવાનું સામે આવ્યું છે. મગફળી અને તલના મોટા વેપારની વાત કરી ડોલરમાં મોટી રકમ મેળવી માલ સપ્લાય કર્યા વગર હાથ ઊંચા કરી દીધા હતા. આ અંગે પણ અલગ ફરિયાદ નોંધાઈ હોવાનું જાણવા મળે છે.પોલીસ હવે આરોપીઓની ભૂમિકા, નાણાકીય વ્યવહારો અને અન્ય સંભવિત ભોગ બનનારાઓ અંગે ઊંડાણપૂર્વક તપાસ કરી રહી છે.
