કોંગ્રેસનું કામ માત્ર હિન્દુત્વનું અપમાન કરવાનું: અનુરાગ ઠાકુર

• કોંગ્રેસની હાર પર કેન્દ્રીય મંત્રી અનુરાગ ઠાકુરની પ્રતિક્રિયા
• કોંગ્રેસ દુર્વ્યવહાર કરવા પર ઉતરી આવી: અનુરાગ ઠાકુર 
• કોંગ્રેસ હારના કારણો નથી જોતી, સનાતનને નિશાન બનાવે છે 

પાંચ રાજ્યોની વિધાનસભા ચૂંટણીના પરિણામોમાં કોંગ્રેસને ચાર રાજ્યોમાં હારનો સામનો કરવો પડ્યો હતો. માત્ર તેલંગાણામાં કોંગ્રેસ બહુમતી સાથે પોતાની સરકાર બનાવવામાં સફળ રહી. કોંગ્રેસની હાર બાદ કેન્દ્રીય મંત્રી અનુરાગ ઠાકુરે પ્રતિક્રિયા આપી છે. તેમણે કહ્યું કે હાર બાદ કોંગ્રેસ દુર્વ્યવહાર કરવા પર ઉતરી આવી છે.

કોંગ્રેસ પર આરોપ લગાવતા અનુરાગ ઠાકુરે કહ્યું, ‘કોંગ્રેસની વિચારસરણી સ્પષ્ટ છે. તેઓ દેશની સંસ્કૃતિ અને ઓળખને ખતમ કરવા માંગે છે. કેટલાક લોકો ટુકડે ટુકડે ગેંગ સાથે ઉભા છે. પરંતુ અમે દેશના ભાગલા નહીં થવા દઈએ. તેમની વિચારસરણી માત્ર હિન્દુત્વ અને સનાતન ધર્મનું અપમાન કરવાની છે. કોંગ્રેસ અને તેના સાથી પક્ષો સનાતન ધર્મને બદનામ કરતાં રહે છે.

તેલંગાણાના નવા સીએમ રેવંત રેડ્ડી પર નિશાન સાધતા અનુરાગ ઠાકુરે કહ્યું કે, ‘તેલંગાણાના આવનારા સીએમએ એક નિવેદન આપ્યું હતું જેમાં તેમણે કહ્યું હતું કે તેલંગાણાનું ડીએનએ બિહારના ડીએનએ કરતાં વધુ સારું છે. સનાતન ધર્મ, હિંદુઓ અને હિન્દીભાષી લોકો વિરુદ્ધ DMK નેતાઓનું ષડયંત્ર જાણીતું છે.

કેન્દ્રીય મંત્રી અનુરાગ ઠાકુરે કહ્યું કે, ‘દિગ્વિજય સિંહ સહિત ઘણા વિપક્ષી નેતાઓ EVM પર સવાલ ઉઠાવી રહ્યા છે. કોંગ્રેસને બંધારણીય સંસ્થાઓ પર વિશ્વાસ નથી. હાર બાદ કોંગ્રેસ પોતાની હારના કારણોને નથી જોતી. તેઓ માત્ર EVM ને દોષ આપે છે. તેઓ માત્ર હિન્દુઓ અને સનાતન ધર્મને નિશાન બનાવે છે.

જણાવી દઈએ કે, વિધાનસભા ચૂંટણીમાં ભાજપે છત્તીસગઢ, મધ્યપ્રદેશ અને રાજસ્થાનમાં જીત મેળવી હતી. જ્યારે, તેલંગાણામાં કોંગ્રેસ અને મિઝોરમમાં જોરમ પીપલ્સ મૂવમેન્ટ સરકાર બનાવવામાં સફળ રહી.