- પાકિસ્તાનમાં સુપ્રીમ કોર્ટના આદેશ પર ચૂંટણી પંચે ચૂંટણી કાર્યક્રમ જાહેર કર્યો
- ઉમેદવારોની યાદી 23 ડિસેમ્બરે જાહેર કરવામાં આવશે
- આ અપીલો પર અંતિમ નિર્ણય 10 જાન્યુઆરી સુધીમાં લેવામાં આવશે
પાકિસ્તાનમાં 8 ફેબ્રુઆરીએ ચૂંટણી યોજાવાની છે જેને લઈને સુપ્રીમ કોર્ટના આદેશ પર ચૂંટણી પંચે ચૂંટણી કાર્યક્રમ જાહેર કર્યો છે. શેડ્યૂલ અનુસાર, ઉમેદવારો તેમના ઉમેદવારી ફોર્મ 20થી 22 ડિસેમ્બર સુધી સબમિટ કરી શકે છે.
ચૂંટણી પંચ દ્વારા જાહેર કરવામાં આવેલા કાર્યક્રમ અનુસાર, ઉમેદવારોની યાદી 23 ડિસેમ્બરે જાહેર કરવામાં આવશે ત્યારબાદ 24થી 30 ડિસેમ્બર સુધી ઉમેદવારી પત્રોની ચકાસણી કરવામાં આવશે. જો રિટર્નિંગ ઓફિસરો દ્વારા પેપર્સ નામંજૂર કરવામાં આવે છે તો અપીલ દાખલ કરવા માટે 3 જાન્યુઆરી સુધીનો સમય આપવામાં આવશે જ્યારે આ અપીલો પર અંતિમ નિર્ણય 10 જાન્યુઆરી સુધીમાં લેવામાં આવશે અને અંતિમ યાદી 11 જાન્યુઆરીએ પ્રસિદ્ધ કરવામાં આવશે.
ચૂંટણી કાર્યક્રમમાં પંજાબ, સિંધ, ખૈબર પખ્તુનખ્વા અને બલૂચિસ્તાનની રાષ્ટ્રીય અને પ્રાંતીય એસેમ્બલીઓમાં મહિલાઓ અને બિન-મુસ્લિમો માટે અનામત બેઠકોનો પણ સમાવેશ થાય છે. સુપ્રીમ કોર્ટના આદેશનું પાલન કરીને પંચે મોડી રાત્રે ચૂંટણીનો કાર્યક્રમ જાહેર કર્યો હતો.
PTIએ સમયસર ચૂંટણીની માંગ કરી
લાહોર હાઈકોર્ટે RO અને DROની નિમણૂક માટેના પંચના નોટિફિકેશનને સસ્પેન્ડ કરી દીધું હતું જેના કારણે વોટિંગ પ્રક્રિયામાં અડચણ આવી હતી. કહેવામાં આવી રહ્યું છે કે સુપ્રીમ કોર્ટના આદેશની અવગણના કરીને આ નિર્ણય લેવામાં આવ્યો છે. લાહોર હાઈકોર્ટનો નિર્ણય પાકિસ્તાન તહરીક-એ-ઈન્સાફ (પીટીઆઈ) દ્વારા દાખલ કરવામાં આવેલી અરજી બાદ આવ્યો છે.
PTI એ ઈમરાનનો પક્ષ છે જેણે સુપ્રીમ કોર્ટમાં દાખલ કરેલી અરજીમાં સમયસર ચૂંટણી કરાવવાની વિનંતી કરી હતી. લાહોર હાઈકોર્ટના નિર્ણય બાદ પંચે હાઈકોર્ટના આદેશને રદ્દ કરવા માટે સુપ્રીમ કોર્ટમાં અરજી દાખલ કરી હતી. પાકિસ્તાન સુપ્રીમ કોર્ટે અરજી સ્વીકારી લીધી હતી જેના કારણે ચૂંટણી પ્રક્રિયા પાટા પર આવી ગઈ હતી.
નવા PM બાદ 90 દિવસમાં થવાની હતી ચૂંટણી
અગાઉ પાકિસ્તાનના રાષ્ટ્રપતિ આરિફ અલ્વીએ તત્કાલિન વડા પ્રધાન શાહબાઝ શરીફની સલાહના આધારે તેમનો પાંચ વર્ષનો કાર્યકાળ પૂરો થવાના ત્રણ દિવસ પહેલા નેશનલ એસેમ્બલીનું વિસર્જન કર્યું હતું. અગાઉની સરકાર દ્વારા નીચલા ગૃહના વહેલા વિસર્જનનો હેતુ પાકિસ્તાનના બંધારણ મુજબ 90 દિવસ પછી ચૂંટણીઓ સુનિશ્ચિત કરવાનો હતો.
જો કે, આવું બન્યું ન હતું કારણ કે ECP એ સામાન્ય હિતોની પરિષદ (CCI) દ્વારા 2023ની ડિજિટલ વસ્તી ગણતરીના પરિણામોને મંજૂરી આપ્યા પછી મતવિસ્તારના નવા સીમાંકનની જરૂરિયાતનો ઉલ્લેખ કર્યો હતો. આ કારણે પાકિસ્તાન તહરીક-એ-ઈન્સાફ (પીટીઆઈ) અને અન્ય ઘણા લોકોએ સુપ્રીમ કોર્ટમાં અરજી દાખલ કરીને સમયસર ચૂંટણીની માંગ કરી હતી. આ પછી સુપ્રીમ કોર્ટે ચૂંટણી પંચ અને રાષ્ટ્રપતિને વાતચીત કરવાનો આદેશ આપ્યો અને ત્યારબાદ મતદાન માટે 8મી ફેબ્રુઆરીની તારીખ નક્કી કરવામાં આવી હતી.
