માણાવદર પંથકના બે સગા ભાઈઓની દીકરીઓ ઇઝરાયલની આર્મીમાં ઓફ્સિર

• 1200ની વસ્તી ધરાવતા કોઠડી ગામના અનેક યુવાનો ઇઝરાયેલમાં
• હાલ ગુજરાતી લોકો સલામત હોવાના સમાચાર
  
• યુધ્ધની સ્થિતિએ પણ બંને બહેનો ફરજ બજાવી રહી છે
  

ઇઝરાયલ પર હમાસ અને હિઝબુલ્લાના હુમલા સામે લડનાર ઇઝરાયલ આર્મીમાં માણાવદરના નાના એવા એક ગામના પરિવારની બે દીકરીઓ પણ ફરજ બજાવી રહી હોવાનું સામે આવ્યું છે.

માણાવદર તાલુકાના 1200 ની વસ્તી ધરાવતા કોઠડી ગામમાં રહેતા ભરતભાઈ મુળિયાસીયાએ કહ્યું કે, તેમના બે કાકા જીવાભાઈ મુળિયાસીયા વર્ષ 1989 માં અને તેના નાના કાકા સવદાસભાઈ મુળિયાસીયા 1996 માં ઇઝરાયલ જતા રહ્યા છે, ત્યાં તેઓને સરકારે ઇઝરાયલનું નાગરિત્વ મળ્યું છે, તે બંને ભાઈઓની એક-એક દીકરી હાલ ઇઝરાયલ આર્મીમાં ઓફ્સિર તરીકે ફરજ બજાવે છે. હાલની યુધ્ધની સ્થિતિએ પણ બંને બહેનો ફરજ બજાવી રહી છે. ત્યાનો નિયમ છે, કે એક ઘરમાંથી એક વ્યક્તિ આર્મીમાં જોડાવાનું હોય છે, ત્યારે જીવાભાઈ અને સવદાસભાઈની દીકરીઓ આર્મીમાં છે, તેઓ સુરક્ષિત છે, પરિવાર સાથે વાતચીત કરતા જાણવા મળ્યું કે, જયારે મિસાઈલ મારો કરવામાં આવે તે પહેલા સાયરન વાગે અને ત્યાં દરેક ઘરમાં બંકર હોય છે, તેમાં નાગરિકો જતા રહે છે. હાલની સ્થિતિ એવી છે, કે ત્યાં ઇઝરાયલ બોર્ડર ઉપર ગંભીર સ્થિતિ છે, પરંતુ સેન્ટ્રલ વિસ્તારમાં કોઈ તકલીફ્ નથી. ઇઝરાયલમાં ગુજરાતી લોકો ઘણા છે, ગામના સરપંચ ભરમીબેનના પતિ રામદેભાઈ મુળિયાસીયાએ જણાવ્યું કે, તેમના કોઠડી ગામમાંથી અનેક યુવાનો 30-35 વર્ષથી કામધંધા માટે ગયેલા છે, અને તેમની સાથે વાતચીત કરતા તેઓ સલામત અને સુરક્ષિત છે.