સેમીફાઈનલમાં ડેવિડ મિલરનું ચાલ્યું બેટ, ઓસ્ટ્રેલિયા વિરુદ્ધ ફટકારી શાનદાર સદી

• સેમીફાઈનલ મેચમાં ડેવિડ મિલરે ફટકારી સદી
• મિલરે 116 બોલમાં 101 રનની ઈનિંગ રમી
• બીજો કોઈ બેટ્સમેન 50 રનનો આંકડો પાર ન કરી શક્યો

ઓસ્ટ્રેલિયા સામેની સેમીફાઇનલ મેચમાં ડેવિડ મિલરે શાનદાર સદી ફટકારી છે. ડેવિડ મિલરે 116 બોલમાં 101 રનની ઇનિંગ રમી હતી. તેણે પોતાની ઇનિંગમાં 8 ફોર અને 5 સિક્સ ફટકારી હતી. એક છેડેથી સાઉથ આફ્રિકાના બેટ્સમેનોની વિકેટ પડી રહી હતી, પરંતુ ડેવિડ મિલરે બીજા છેડેથી ઈનિંગ સંભાળી હતી. ડેવિડ મિલર ઉપરાંત સાઉથ આફ્રિકાનો કોઈ બેટ્સમેન પચાસ રન સુધી પહોંચી શક્યો નહોતો. ડેવિડ મિલર પછી હેનરિક ક્લાસને સૌથી વધુ રન બનાવ્યા હતા. હેનરિક ક્લાસને 48 બોલમાં 47 રનનું યોગદાન આપ્યું હતું. સાઉથ આફ્રિકાના 7 બેટ્સમેન ડબલ ડિઝિટ પાર કરવામાં પણ નિષ્ફળ રહ્યા હતા.

સાઉથ આફ્રિકા 212 રનમાં ઓલઆઉટ

ટોસ જીતીને પ્રથમ બેટિંગ કરવા ઉતરેલી સાઉથ આફ્રિકાની ટીમ 49.4 ઓવરમાં 212 રનમાં ઓલઆઉટ થઈ હતી. આ રીતે ઓસ્ટ્રેલિયાને 213 રનનો ટાર્ગેટ મળ્યો છે. પ્રથમ બેટિંગ કરવા આવેલી સાઉથ આફ્રિકાની ટીમની શરૂઆત ખૂબ જ ખરાબ રહી હતી. શાનદાર ફોર્મમાં ચાલી રહેલો ઓપનર ક્વિન્ટન ડી કોક 14 બોલમાં 3 રન બનાવીને આઉટ થયો હતો. સાથે સાઉથ આફ્રિકાનો કેપ્ટન ટેમ્બા બાવુમા શૂન્ય પર આઉટ થયો હતો. સાઉથ આફ્રિકાના 4 બેટ્સમેન 24 રનના સ્કોર પર પેવેલિયન પરત ફર્યા હતા, પરંતુ આ પછી ડેવિડ મિલર અને હેનરિક ક્લાસેન વચ્ચે 95 રનની મહત્વપૂર્ણ પાર્ટનરશિપ થઈ હતી.

ઓસ્ટ્રેલિયન બોલરોની આવી હાલત હતી

ઓસ્ટ્રેલિયાના બોલરોની વાત કરવામાં આવે તો, મિચેલ સ્ટાર્ક ઉપરાંત કેપ્ટન પેટ કમિન્સે 3-3 વિકેટ લીધી હતી. મિચેલ સ્ટાર્કે 10 ઓવરમાં 34 રન આપીને 3 ખેલાડીઓને આઉટ કર્યા હતા, જ્યારે પેટ કમિન્સે 9.4 ઓવરમાં 51 રન આપીને સાઉથ આફ્રિકાના 3 બેટ્સમેનોને પોતાનો શિકાર બનાવ્યા હતા. આ ઉપરાંત જોશ હેઝલવુડ અને ટ્રેવિસ હેડને 2-2 સફળતા મળી હતી. જોશ હેઝલવુડે 8 ઓવરમાં 12 રન આપીને 2 વિકેટ લીધી હતી, જ્યારે ટ્રેવિસ હેડે 5 ઓવરમાં 21 રન આપીને 2 વિકેટ લીધી હતી.