- દિલ્હીમાં વધી રહ્યું છે પ્રદૂષણ
- પર્યાવરણમંત્રી ગોપાલ રાયે યુપી-હરિયાણાને ઠેરવ્યા જવાબદાર
- GRAP-4 હેઠળના નિયંત્રણો ચાલુ જ રહેશે
દિવાળી પર રાજધાનીમાં ફટાકડા ફોડવાને કારણે પ્રદૂષણમાં અચાનક વધારો થયા બાદ પર્યાવરણ મંત્રી ગોપાલ રાયે સોમવારે દિલ્હી સચિવાલયમાં અધિકારીઓ સાથે બેઠક યોજી હતી. બેઠક બાદ મીડિયા સાથે વાત કરતા ગોપાલ રાયે પડોશી રાજ્યો હરિયાણા અને ઉત્તર પ્રદેશ પર વધતા પ્રદૂષણને જવાબદાર ઠેરવ્યું હતું. મીડિયા સાથે વાત કરતા પર્યાવરણ મંત્રીએ કહ્યું કે દિલ્હી-એનસીઆરમાં ગ્રીડ રિસ્પોન્સ એક્શન પ્લાન-4 (GRAP-4) હેઠળના નિયંત્રણો ચાલુ રહેશે.
18 નવેમ્બર સુધી શાળા બંધ
દિલ્હીમાં એન્ટી ડસ્ટ અભિયાન આગામી 15 દિવસ સુધી લંબાવવામાં આવ્યું છે. 18મી નવેમ્બર સુધી શાળાઓ બંધ રહેશે. બાળકોની રજાઓ વધારવા અંગે હજુ સુધી કોઈ નિર્ણય લેવામાં આવ્યો નથી. ગોપાલ રાયે જણાવ્યું હતું કે, GRAP-4 નિયમો હેઠળ પ્રદૂષણ વિરોધી પગલાં CAQM (કમિશન ફોર એર ક્વોલિટી મેનેજમેન્ટ) ના આગામી આદેશો સુધી દિલ્હીમાં અમલમાં રહેશે. આ અંતર્ગત BS-III પેટ્રોલ વાહનો અને BS-IV ડીઝલ વાહનો પર પ્રતિબંધ રહેશે. આવશ્યક ચીજવસ્તુઓનું વહન કરતી ટ્રકો અને આવશ્યક સેવાઓ સાથે જોડાયેલી ટ્રકો સિવાય, અન્ય તમામ ટ્રકો દિલ્હીમાં પ્રતિબંધિત રહેશે.
પ્રદૂષણ માટે જવાબદાર કોણ?
દિવાળી પર દિલ્હીમાં ફટાકડા ફોડવા પર પર્યાવરણ મંત્રીએ કહ્યું કે દિલ્હીમાં ફટાકડાના ઉત્પાદન, સંગ્રહ અને વેચાણ પર પ્રતિબંધ છે. યુપી અને હરિયાણાથી ફટાકડા દિલ્હી લાવવામાં આવ્યા હતા. દિલ્હી, હરિયાણા અને યુપીની પોલીસ ભાજપના નિયંત્રણ હેઠળ છે અને આ ત્રણેય પોલીસ દળોની દેખરેખને કારણે કોઈ સામાન્ય માણસ સરળતાથી ફટાકડા સપ્લાય કરી શકતો નથી.
