- ઉત્તર કોરિયાના પરમાણુ મિસાઈલ કાર્યક્રમથી દુનિયામાં ફફડાટ
- અમેરિકા, દક્ષિણ કોરિયા અને જાપાનના રાષ્ટ્રીય સુરક્ષા સલાહકારોએ બેઠક યોજી
- પરમાણુ કાર્યક્રમો અને તેના શાસક કિમ જોંગ ઉનને કોઈપણ રીતે રોકવા જોઈએ:જાપાન
ઉત્તર કોરિયાના પરમાણુ મિસાઈલ કાર્યક્રમે અમેરિકા અને તેના મિત્ર દેશોને ચિંતામાં મૂકી દીધા છે. આ જ કારણ છે કે તેના વધતા પ્રભાવને ધ્યાનમાં રાખીને અમેરિકા, દક્ષિણ કોરિયા અને જાપાનના રાષ્ટ્રીય સુરક્ષા સલાહકારોએ બેઠક યોજી હતી. આ બેઠકમાં જાપાને તેના સૈન્ય સહયોગી યુએસએ અને બાકીના વિશ્વને ઉત્તર કોરિયાના પરમાણુ કાર્યક્રમોને કોઈપણ રીતે રોકવાની અપીલ કરી હતી.
જાપાને કહ્યું હતું કે, તેના પરમાણુ કાર્યક્રમો અને તેના શાસક કિમ જોંગ ઉનને કોઈપણ રીતે રોકવા જોઈએ. આ પરિક્ષણની વચ્ચે પોતાના મિસાઈલ પરીક્ષણ કાર્યક્રમમાં વધારો કરીને અમેરિકા અને તેના મિત્ર દેશોએ સંદેશ આપવાનો પ્રયાસ કર્યો છે કે આવું કરવું શક્ય નથી. ઉત્તર કોરિયાના આ જવાબ બાદ યોજાયેલી બેઠકમાં ત્રણેય દેશોના NSAએ ચિંતા વ્યક્ત કરી હતી.
ઉત્તર કોરિયાએ મિસાઈલ કાર્યક્રમ વધાર્યો
તમામ વૈશ્વિક દબાણો છતાં ઉત્તર કોરિયા તેના મિસાઈલ કાર્યક્રમને ઝડપથી વિસ્તરણ કરી રહ્યું છે. અમેરિકાનો આરોપ છે કે રશિયા અને ચીન આ બે દેશો ઉત્તર કોરિયાના મિસાઈલ કાર્યક્રમને પ્રોત્સાહન આપવા માટે ટેક્નોલોજી ટ્રાન્સફરમાં મદદ કરી રહ્યા છે જેના કારણે ઉત્તર કોરિયા આવું કરી રહ્યું છે. આ દરમિયાન રશિયા અને યુક્રેન વચ્ચે ચાલી રહેલા યુદ્ધ વચ્ચે કિમ અને પુતિન વચ્ચેની બેઠક બાદ તમામ દેશો ચિંતામાં છે.
દક્ષિણ કોરિયાની ગુપ્તચર એજન્સીઓએ કહ્યું હતું કે ઉત્તર કોરિયા યુક્રેન યુદ્ધમાં રશિયાને હથિયારો આપી રહ્યું છે જે રશિયાને ઘણી મદદ કરી રહ્યું છે. દક્ષિણ કોરિયાની એજન્સીઓએ એવો પણ દાવો કર્યો હતો કે યુક્રેનમાં વિવિધ મોરચે કામ કરવા માટે રશિયાને ઘણાં હથિયારોની જરૂર છે. જેને ઉત્તર કોરિયા પ્રમાણમાં સસ્તા દરે ઉપલબ્ધ કરાવી રહ્યું છે.
