- આયોવા કોક્સના પરિણામોમાં મેળવી જીત
- બાઈડેનને ફરી એકવાર ડોનાલ્ડ ટ્રમ્પના પડકારનો સામનો કરવો પડશે
- હવે ન્યૂ હેમ્પશાયર કોક્સ પર રહેશે નજર
અમેરિકાના પૂર્વ રાષ્ટ્રપતિ ડોનાલ્ડ ટ્રમ્પે રિપબ્લિકન પાર્ટી તરફથી રાષ્ટ્રપતિ પદની ઉમેદવારી માટેની પ્રથમ રેસ જીતી લીધી છે. 15 જાન્યુઆરીના રોજ આયોવા રાજ્યમાં રિપબ્લિકન પાર્ટીની પ્રથમ કોકસનું આયોજન કરવામાં આવ્યું હતું. આ કોકસના પરિણામોમાં ડોનાલ્ડ ટ્રમ્પનો વિજય થયો છે. આ જીતથી એવી અટકળોને વધુ મજબૂતી મળી છે કે જો બાઈડેનને ફરી એકવાર ડોનાલ્ડ ટ્રમ્પના પડકારનો સામનો કરવો પડશે.
રિપબ્લિકન પાર્ટીના નેતા વિવેક રામાસ્વામી રાષ્ટ્રપતિ પદની ઉમેદવારીની રેસમાંથી બહાર
અમેરિકાના ભૂતપૂર્વ રાષ્ટ્રપતિ ડોનાલ્ડ ટ્રમ્પને આયોવા કોકસમાંથી ઉમેદવાર બનાવવામાં આવ્યા છે. આ પછી જ રિપબ્લિકન પાર્ટીના નેતા વિવેક રામાસ્વામી રાષ્ટ્રપતિ પદની ઉમેદવારીની રેસમાંથી બહાર થઈ ગયા છે.રામાસ્વામીએ જાહેરાત કરી છે કે હવે તેઓ ટ્રમ્પને સમર્થન આપશે. જ્યારે તેમણે ચૂંટણીમાંથી બહાર નીકળવાની જાહેરાત કરી, ત્યારે એક મહિલાએ ભીડ પર બૂમો પાડી અને તેમને આમ ન કરવા કહ્યું. વિવેકે કહ્યું, “તે ક્યાંય નથી જઈ રહ્યા પરંતુ તે બધાની સાથે રહેશે અને ટ્રમ્પને પોતાનું સમર્થન આપશે.”
આયોવા કોકસ શા માટે મહત્વપૂર્ણ છે?
આયોવામાં 1600 થી વધુ સ્થળોએ મતદાન થયું, જેમાં ડોનાલ્ડ ટ્રમ્પને વિજેતા જાહેર કરવામાં આવ્યા. જો કે ડોનાલ્ડ ટ્રમ્પના સૌથી નજીકના હરીફ કોણ છે તે હજુ સુધી જાણી શકાયું નથી. દક્ષિણ કેરોલિનાના ભૂતપૂર્વ ગવર્નર નિક્કી હેલી અથવા ફ્લોરિડાના ગવર્નર રોન ડીસેન્ટિસ બીજા સ્થાને રહેવાની ધારણા છે. આયોવા પછી ન્યુ હેમ્પશાયર, નેવાડા અને દક્ષિણ કેરોલિનામાં પણ કોકસ યોજાશે. જો કે પ્રથમ કોકસ હોવાથી બધાની નજર આયોવા પર હતી, કારણ કે અહીંની જીત આગળના પડકારો માટે ઉત્સાહ વધારશે. આ ઉપરાંત આ જીતથી એ પણ સ્પષ્ટ થઈ ગયું છે કે રિપબ્લિકન પાર્ટીના મતદારો હજુ પણ ટ્રમ્પને જોરદાર સમર્થન આપી રહ્યા છે.
આયોવા કોકસ શું છે
અમેરિકામાં બે મુખ્ય પક્ષો ડેમોક્રેટ્સ અને રિપબ્લિકન છે. રાષ્ટ્રપતિની ચૂંટણી પહેલા, બંને પક્ષો દેશના દરેક રાજ્યમાં પક્ષના ઉમેદવારને પસંદ કરવા માટે આંતર-પક્ષીય મતદાન કરે છે. જેને કોકસ કહેવાય છે. તમામ રાજ્યોમાં મતદાન થયા પછી મતદાનમાં વિજેતા ઉમેદવારને બંને પક્ષોના રાષ્ટ્રીય અધિવેશનમાં પક્ષના રાષ્ટ્રપતિ પદના ઉમેદવાર જાહેર કરવામાં આવે છે.
રિપબ્લિકન પાર્ટીની પ્રથમ કોકસ આયોવા રાજ્યમાં યોજાઈ હતી. આ કોકસમાં રિપબ્લિકન પાર્ટીના 1,600 થી વધુ નોંધાયેલા સમર્થકો પુસ્તકાલયો, શાળાઓ અથવા રમતના મેદાન જેવા સ્થળોએ ભેગા થયા હતા અને ગુપ્ત મતદાનમાં પક્ષના પ્રમુખપદના ઉમેદવારોમાંથી એકની પસંદગી કરી હતી. આને આયોવા કોક્સ કહેવામાં આવી રહ્યું છે અને આમાં ડોનાલ્ડ ટ્રમ્પે અન્ય ઉમેદવારો નિક્કી હેલી, રોન ડીસેન્ટિસ અને વિવેક રામાસ્વામીને પાછળ છોડીને જીત મેળવી છે. હવે અન્ય રાજ્યોમાં અલગ-અલગ તારીખે સમાન કોકસનું આયોજન કરવામાં આવશે, ત્યારબાદ જુલાઈમાં રિપબ્લિકન પાર્ટીના સંમેલનમાં રાષ્ટ્રપતિ પદના ઉમેદવારના નામની સત્તાવાર જાહેરાત કરવામાં આવશે.
