ટ્રમ્પ વહીવટીતંત્રે યુ.એસ.માં સરકાર દ્વારા ફંડિંગ પૂરું પાડવામાં આવતી ઘણી મીડિયા સંસ્થાઓમાં મોટો કાપ મૂક્યો છે. આના વિરોધમાં, વોઈસ ઓફ અમેરિકા (VOA) ના તમામ કર્મચારીઓ પેઈડ લીવ પર ઉતરી ગયા છે. રાષ્ટ્રપતિ ડોનાલ્ડ ટ્રમ્પ દ્વારા યુએસ એજન્સી ફોર ગ્લોબલ મીડિયા હેઠળની એજન્સીઓની કામગીરીમાં કાપ મૂકવાના આદેશ બાદ આ પગલું લેવામાં આવ્યું છે.
કોંગ્રેસે તેના લેટેસ્ટ ફંડિંગ બિલને મંજૂરી આપ્યા પછી કરવામાં આવેલા નાણાકીય કાપની અસર રેડિયો ફ્રી યુરોપ/રેડિયો લિબર્ટી, રેડિયો ફ્રી એશિયા અને રેડિયો માર્ટી પર પણ પડી. તેઓ ચીન, રશિયા અને ક્યુબા જેવા દેશોને સ્વતંત્ર સમાચાર પૂરા પાડે છે.
લિંક્ડઈન પર પોસ્ટ કરાયેલા એક નિવેદનમાં VOA ના ડિરેક્ટર માઈકલ અબ્રામોવિટ્ઝે કાપની પુષ્ટિ કરતા કહ્યું કે “મને ખૂબ જ દુઃખ છે કે 83 વર્ષમાં પહેલીવાર, વોઈસ ઓફ અમેરિકાને ચૂપ કરવામાં આવી રહ્યું છે.”
1300થી વધુ VOA પત્રકારોને થશે અસર
તેમને કહ્યું કે 1300 થી વધુ પત્રકારો, નિર્માતાઓ અને સહાયક સ્ટાફને રજા પર ઉતારી દેવામાં આવ્યા છે. “VOA અમેરિકાની વાર્તા બતાવીને અને સંતુલિત સમાચાર અને માહિતી પૂરી પાડીને ખાસ કરીને જુલમ હેઠળ જીવતા લોકો માટે, વિશ્વભરમાં સ્વતંત્રતા અને લોકશાહીને પ્રોત્સાહન આપે છે.”
માઇકલે વધુમાં કહ્યું કે તેમાંથી ઘણા સરમુખત્યારશાહી દેશોમાંથી અમેરિકા આવ્યા હતા, જ્યાં તેઓ મુક્તપણે પત્રકારત્વનો અભ્યાસ કરી શકતા ન હતા.
કેરી લેકએ કાપનો આપ્યો સંકેત
ટ્રમ્પના તાજેતરમાં નિયુક્ત થયેલા વરિષ્ઠ સલાહકાર કેરી લેકએ શનિવારે સવારે એક્સ પર એક પોસ્ટ દ્વારા કર્મચારીઓને તેમના ઈમેઈલ તપાસવા વિનંતી કરીને કાપનો સંકેત આપ્યો હતો.
થોડા સમય પછી, કર્મચારીઓને સત્તાવાર સૂચનાઓ મળી જેમાં તેમને પેઈડ વહીવટી રજા પર મૂકવામાં આવ્યા અને તેમને સરકાર દ્વારા જાહેર કરાયેલા તેમના સાધનો પરત કરવાનો નિર્દેશ આપવામાં આવ્યો.
રિપોર્ટર્સ વિધાઉટ બોર્ડર્સે આ નિર્ણયની નિંદા કરી અને તેને “મુક્ત માહિતીના રક્ષક તરીકે અમેરિકાની ઐતિહાસિક ભૂમિકાથી વિદાય” ગણાવી. રેડિયો ફ્રી યુરોપ/રેડિયો લિબર્ટીના પ્રમુખ અને સીઈઓ સ્ટીફન કેપસે ચેતવણી આપી હતી કે આ નેટવર્ક્સ માટે ફંડિંગ રદ કરવું એ “અમેરિકાના દુશ્મનો માટે એક મોટી ભેટ” હશે.
મીડિયા સંગઠનોએ ટ્રમ્પ સરકારના નિર્ણયની કરી નિંદા
શીત યુદ્ધ પછી, VOA અને તેના ભાગીદાર સંગઠનો USAID સહિત સરમુખત્યારશાહી પ્રચારનો સામનો કરવામાં મહત્વપૂર્ણ રહ્યા છે, જે વિશ્વભરમાં આશરે 427 મિલિયન લોકો સુધી પહોંચે છે.
રેડિયો ફ્રી યુરોપ/રેડિયો લિબર્ટીના ભૂતપૂર્વ વડા થોમસ કેન્ટે ચેતવણી આપી હતી કે આ પ્લેટફોર્મને દૂર કરવાથી અમેરિકા વિશેની વૈશ્વિક વાર્તા તેના વિરોધીઓના હાથમાં જઈ શકે છે.
ટ્રમ્પ વહીવટીતંત્રે અગાઉ VOA પર વધુ નિયંત્રણની માંગ કરી છે. એપી જેવી સ્વતંત્ર સમાચાર એજન્સીઓ સાથેના કરાર રદ કર્યા અને મીડિયા પૂલ સુધી પહોંચ પ્રતિબંધિત કરી. પરંતુ તેમને પત્રકારો અથવા VOA ના વ્યાપક મિશન પર તેની અસરનો કોઈ ઉલ્લેખ કર્યો નથી. હાલમાં, VOA કર્મચારીઓ પેઈડ લીવ પર છે.
