ડોનાલ્ડ ટ્રંપ રાષ્ટ્રપતિ પદ સંભાળતા જ એક્શન મોડમાં આવી ગયા છે. આ સાથે જ કેન્દ્રીય વિદેશમંત્રી એસ.જયશંકર સાથે અમેરિકાના વિદેશમંત્રી માર્કો રુબિયોએ પ્રથમ બેઠક યોજી હતી. આ બેઠક દરમિયાન કેન્દ્રીય વિદેશમંત્રી એસ.જયશંકરે જણાવ્યુ હતુ કે, અમેરિકા સાથે કામ કરવા તેઓ તત્પર છે.
બીજીવાર ડોનાલ્ડ ટ્રંપ અમેરિકાના રાષ્ટ્રપતિ તરીકે શપથ લઇ ચુક્યા છે. ટ્રંપ સરકારે કાર્યભાર સંભાળતા જ ભારત માટે પોતાનું મહત્ત્વ દર્શાવ્યુ છે. અમેરિકાના વિદેશમંત્રી માર્કો રુબિયો અને રાષ્ટ્રીય સુરક્ષા સલાહકાર માઇક વોલ્જે ભારતના કેન્દ્રીય વિદેશમંત્રી એસ.જયશંકર સાથે પોતાની પ્રથમ દ્વીપક્ષીય આંતરરાષ્ટ્રીય બેઠક યોજી હતી. કેન્દ્રીય વિદેશમંત્રી એસ.જયશંકર રાષ્ટ્રપતિ ડોનાલ્ડ ટ્રંપના શપથવિધિ સમારોહમાં ઉપસ્થિત રહેવા માટે અમેરિકા પહોંચ્યા હતા.
એસ.જયશંકર શપથવિધિ સમારોહમાં રહ્યા હાજર
દુનિયાના બે સૌથી જુના અને સૌથી મોટા લોકતંત્રનુ પ્રતિનિધિત્વ કરનાર બે મુખ્ય રાજનેતાઓ વચ્ચેની આ બેઠક, અમેરિકાના વિદેશી વિભાગના ફોગી બોટમ મુખ્યાલયમાં યોજાઇ હતી. દ્વીપક્ષીય બેઠક અગાઉ ડોનાલ્ડ ટ્રંપના રાષ્ટ્રપતિ બન્યા બાદ આ પ્રથમ બેઠક યોજવામાં આવી હતી.
ટ્રંપના બીજા શાસનકાળની શરૂઆતની સાથે જ ભારતની પ્રથમ બેઠક
સામાન્ય રીતે અમેરિકામાં રાષ્ટ્રપતિએ કાર્યભાર સંભાળ્યા બાદ પ્રથમ બેઠક પોતાના પાડોશી દેશ કેનેડા અથવા મેક્સિકો સાથે બેઠક યોજાય છે. પરંતુ આ વખતે આ પ્રથમ ભારત સાથે કરવામાં આવી છે. ડોનાલ્ડ ટ્રંપના બીજા શાસનકાળની શરૂઆત થયાના ગણતરીના જ કલાકમાં બંને દેશના વિદેશમંત્રીઓ વચ્ચે મુલાકાત થઇ હતી. બંને દેશના નેતાઓ વચ્ચે ભારત-અમેરિકાની રણનિતી મુદ્દે મહત્વપૂર્ણ ચર્ચા કરવામાં આવી હતી. એક કલાક કરતા પણ વધુ સમય હાથ ધરાયેલી આ બેઠકમાં અમેરિકામાં ભારતના રાજદૂત વિનય કાત્રા પણ ઉપસ્થિત રહ્યા હતા.
કેન્દ્રીય વિદેશમંત્રી એસ.જયશંકરે લખી પોસ્ટ
બંને દેશના વિદેશમંત્રીઓ વચ્ચેની બેઠક પૂર્ણ થયા બાદ, સચિવ રુબિયો અને વિદેશમંત્રી એસ.જયશંકરે સંયુક્ત આંતરરાષ્ટ્રીય પત્રકાર પરિષદ સંબોધી હતી. આ આંતરરાષ્ટ્રીય પત્રકાર પરિષદ દરમિયાન બંને નેતાઓ વચ્ચે મહત્વપૂર્ણ ભાગીદારી જોવા મળી હતી. બેઠક અને આંતરરાષ્ટ્રીય પત્રકાર પરિષદ બાદ કેન્દ્રીય વિદેશમંત્રી એસ.જયશંકરે એક્સ પર પોસ્ટ લખી હતી. જેમાં જણાવ્યુ હતુ કે, વિદેશમંત્રીના રૂપમાં કાર્યભાર સંભાળ્યા બાદ માર્કો રુબિયો સાથે તેઓની આ પ્રથમ દ્રીપક્ષીય બેઠક હતી. આ બેઠક દરમિયાન માર્કો રુબિયોને મળીને પ્રસન્નતા થઇ છે. દ્રીપક્ષીય ભાગીદારીની ચર્ચામાં માર્કો રુબિયો ભારતના પ્રબળ સમર્થક તરીકે જોવા મળ્યા હતા. આ ઉપરાંત વૈશ્વિક મુદ્દાઓની વિસ્તૃત ચર્ચામાં પણ વિચારોનુ આદાન-પ્રદાન કરવામાં આવ્યુ હતુ.
