અમેરિકાના પૂર્વ રાષ્ટ્રપતિ ડોનાલ્ડ ટ્રમ્પનું શાંતિ પુરસ્કાર મેળવવાનું સપનું આખરે સાચું પડ્યું છે. તેમને 2026 ફીફા વર્લ્ડ કપના ડ્રો દરમિયાન પહેલો ‘ફીફા પીસ એવોર્ડ’ આપવામાં આવ્યો છે, જોકે આ નિર્ણયની ભારે આલોચના થઈ રહી છે.
‘ફીફા પીસ એવોર્ડ’ મેળવનાર પ્રથમ વ્યક્તિ
શુક્રવારે અમેરિકાની રાજધાની વોશિંગ્ટન ડીસીના કેનેડી સેન્ટરમાં આયોજિત એક કાર્યક્રમમાં ટ્રમ્પને આ સન્માન આપવામાં આવ્યું હતું, જેમાં તેમને ગોલ્ડ ટ્રોફી અને મેડલ અપાયો. ફીફાએ આ વર્ષથી આ એવોર્ડ શરૂ કર્યો છે, જે દુનિયામાં શાંતિ ફેલાવવામાં અને લોકોને જોડવામાં મહત્વનું યોગદાન આપનાર વ્યક્તિઓને આપવામાં આવે છે. ડોનાલ્ડ ટ્રમ્પ આ એવોર્ડ મેળવનાર પ્રથમ વ્યક્તિ બન્યા છે. ટ્રમ્પ અગાઉ ઘણી વખત જાહેરમાં કહી ચૂક્યા છે કે તેઓ નોબેલ શાંતિ પુરસ્કારના હકદાર છે.
પુરસ્કાર મળ્યા બાદ ટ્રમ્પે શું કહ્યું?
આ સન્માન સ્વીકારતી વખતે ટ્રમ્પે કહ્યું હતું કે “આ ખરેખર મારા જીવનનું એક મહાન સન્માન છે.” તેમણે ઉમેર્યું હતું કે પુરસ્કાર કરતાં વધુ મહત્વનું એ છે કે અમે કરોડો જીવન બચાવ્યા. જણાવી દઈએ કે 2026 ફીફા વર્લ્ડ કપની યજમાની અમેરિકા, કેનેડા અને મેક્સિકો કરી રહ્યા છે.
પુરસ્કાર આપવાના નિર્ણયની આલોચના
ટ્રમ્પને આ એવોર્ડ આપવાના નિર્ણયની અનેક લોકો આલોચના કરી રહ્યા છે. ફીફા અધ્યક્ષ ગિયાની ઇન્ફન્ટિનો અને ટ્રમ્પ વચ્ચે ગાઢ સંબંધો છે. ગિયાનીએ અગાઉ કહ્યું હતું કે તેમને લાગે છે કે ટ્રમ્પે ગાઝામાં યુદ્ધ વિરામના પ્રયાસો માટે નોબેલ જીતવો જોઈતો હતો. આલોચકોનું કહેવું છે કે આ પુરસ્કાર ફીફાના પરંપરાગત ફોકસથી હટીને છે અને આ નિર્ણય ટ્રમ્પ અને ફીફા અધ્યક્ષની નજીકના સંબંધોનું પરિણામ છે.
