- પાલિકાને દેવાના બોજમાંથી ઉગારવાને બદલે કોન્ટ્રોક્ટરને જલસા કરાવી રહ્યા છે
- નગરપાલિકાના માથે પાણી પુરવઠા વિભાગનું રૂ. 30 કરોડનું
- વીજ તંત્રનું આશરે અઢી કરોડ રૂપિયાના દેવાનો ભાર
પાલનપુર પાલિકામાં આર્થિક ભારણને કારણે દિનપ્રતિદિન દેવામાં વધારો થઈ રહ્યો છે. એક તરફ પાણી પુરવઠાનુ રૂ.30 કરોડનુ દેવુ બાકી છે. તે ઉપરાંત વીજતંત્રના આશરે અઢી કરોડનું દેવુ છે. તે દેવુ ભરપાઈ કરવાને બદલે કોન્ટ્રાકટરોને જલસા કરાવવામાં કેમ રસ દાખવવામાં આવી રહ્યો છે? જે અંગે નગરપાલિકાના વિપક્ષ નેતાએ સવાલ ઉઠાવ્યા છે.
પાલનપુર પાલિકામાં શહેરની સફાઈ માટે સફાઈ કામદારોનુ મંજુર મહેકમ દ્વારા કામગીરી કરવામાં આવે છે. આમ છતા યેનકેન પ્રકારે દરકે કામને કોન્ટ્રાક્ટ પધ્ધતિથી કરાવી અને કર્મચારીઓને આધેડ વયે છુટા કરી દેવાતા તેમના પરિવારોની હાલત કફોડી બની છે અને તેના કરતાં વધુ નાણાં ખર્ચીને કોન્ટ્રાક્ટ આપી અને પાલિકાને આર્થિક ભારણ વધારી વધુ દેવાદાર બનાવવાની નીતિને કારણે કોનો અંગત લાભ છુપાયેલો છે? તેવા સવાલ સાથે વિપક્ષ નેતાએ પાલિકાના સત્તાધીશોની નીતિ સામે સવાલ ઉઠાવ્યા છે. અત્રે ઉલ્લેખનીય છે કે ગત વર્ષે ડોર ટુ ડોરનો કોન્ટ્રાક્ટ ઘર દીઠ રૂપિયા ર4 લેખે આપવામાં આવેલ તેમાં પણ મોંઘુ કહેવાતુ હતુ. ત્યારે આ વખતે તો ઘર દીઠ રૂ. 44 ચૂકવીને કોન્ટ્રાક્ટ આપી દેવાયો. આમ લગભગ બમણી રકમ ચૂકવી અને ડોર ટુ ડોરનો કોન્ટ્રાક્ટ આપવામાં આવ્યો છે. તેમ છતાં પણ શહેરમાં અનેક સોસાયટીઓમાંથી કચરો લેવા માટે ગાડી જતી જ નહોવાની રાવ ઉઠી છે અને જ્યાં જાય છે. ત્યાં ઘેરથી કચરો લઈ જવાના બદલે સોસાયટીની વચ્ચે બે ચાર મીનીટ ગાડી ઉભી રહે છે અને લોકો કચરો નાખવા રીતસરના દોડતા જાય છે. પરંતું ત્યાં સુધીમાં ગાડી નીકળી જાય છે. આમ લોકોએ કચરાની ગાડીની ખબર રાખવી પડે તેવી હાલત થઈ છે. વળી ખરેખર વાહનો અને સ્ટાફ પુરતા પ્રમાણમાં છે કે કેમ? તે અંગે પણ ખરાઈ કરવી આવશ્યક છે.
શહેરમાં કચરો ઉપાડવા માટે પાલિકા દ્વારા વર્ષે રૂપિયા ત્રણ કરોડનો ખર્ચ કરાશે
પાલનપુર શહેરમાં અગાઉ 53 હજાર પ્રોપર્ટી હતી. આ વખતે 64 હજાર પ્રોપર્ટી છે. આમ એક જ વર્ષમાં 10 હજાર કરતાં વધુ પ્રોપર્ટીનો લાભ નવા કોન્ટ્રાક્ટરને મળી ગયો. આમ એક જ મહીનામાં કોન્ટ્રાક્ટર બદલાતા વધારાની પ્રોપર્ટી આવતા દર મહીને કચરો લઈ જવા માટે વર્ષે રૂ. ત્રણ કરોડનો ખર્ચ કરવામાં આવશે અને રસ્તાની સફાઈ માટે વધારના બે કરોડનો ખર્ચ થશે. આમ પાલનપુર નગરપાલિકાના શાસકોએ કર્મચારીઓની ભરતી કરવાની પ્રક્રિયાને બદલે કોન્ટ્રકાટરોને લાભ કરાવવવા પાછળ શું આશય હોઈ શકે? તેવી લોકોમાં ચર્ચા એરણે ચડી છે.
શહેરીજનોના પરસેવાની કમાણીમાંથી ભરાતો ટેક્સ ગેરવલ્લે જઈ રહ્યો છે
નગરપાલિકાના વિપક્ષ નેતા અંકિતા ઠાકોરે જણાવ્યુ હતુ કે પાલનપુર નગરપાલિકા એક તરફ દેવામાં ડુબેલી છે અને બીજી તરફ વધારાના ખર્ચા કરીને પાલિકાનુ દેવુ વધારવામાં આવી રહ્યુ છે. જે કામ 24 રૂપિયામાં અગાઉ કરાતુ હતુ. તે આ વખતે 44 રૂપિયામાં આપવામાં કોને રસ છે? અને તેનાથી વિશેષ તો એ છે કોન્ટ્રાક્ટરને એવી જ નગરપાલિકાઓમાં રસ છે. જ્યાં ચીફ ઓફીસર તરીકે હાલના ચીફ ઓફીસર જ્યાં જાય ત્યાં આ કોન્ટ્રાક્ટર પણ પહોંચી જાય છે.
ખરેખર તો લોકોએ ગાડીમાં કચરો નાંખવા જવું પડે : ચીફ ઓફિસર
આ અંગે નગરપાલિકાના ચીફ ઓફીસરનો સંપર્ક કરતાં તેમણે જણાવ્યુ હતુ કે આ વખતે પ્રોસેસીંગ કરવા સાથેના ભાવ હોવાથી અને પ્રોપર્ટી વધી છે અને કચરો લોકોએ નાખવા જવુ પડે. કદાચ કયાંક કોઈએ ટેવ પાડી હશે. પરંતુ ખરેખર તો લોકોએ જ ગાડીમાં કચરો નાંખવા જવુ પડે.
