- ઇલેક્ટ્રિક વાહનની બેટરી અને સ્માર્ટફોન બનાવવા માટેખનીજની શોધમાં ડ્રેગન
- અફઘાનિસ્તાનની લિથિયમ, તાંબાની ખાણો પર નિયંત્રણ મેળવવા માંગે છે ચીન
- માર્ચ મહિનામાં ચીન અને તાલિબાની વિદેશ મંત્રીઓ વચ્ચે થઈ ચૂકી છે મુલાકાત
ચીનને ઇલેક્ટ્રિક વાહનની બેટરી અને સ્માર્ટફોન બનાવવા માટે જરૂરી ખનિજોની જરૂર છે. એવામાં, ચીન અફઘાનિસ્તાનની લિથિયમ અને તાંબાની ખાણો પર નિયંત્રણ મેળવવાની દિશામાં કામ કરી રહ્યું છે. આ અંગે ચીનની કાર્યવાહી સતત જોવા મળી રહી છે.
અહેવાલો અનુસાર, થોડા મહિના પહેલા ચીનના વિદેશ મંત્રી વાંગ યીએ તાલિબાનના વિદેશ મંત્રી અમીર ખાન મુત્તાકી સાથે કાબુલમાં મુલાકાત કરી હતી. અફઘાનિસ્તાનમાં તાલિબાને સત્તા હાથમાં લીધા બાદ ચીન અને તાલિબાન શાસન વચ્ચે આ પ્રથમ ઉચ્ચ સ્તરીય બેઠક હતી. આ સમય દરમિયાન, વાંગ યીએ મુત્તાકીને 30 અને 31 માર્ચે તુન્ક્સી, અનહુઇમાં પડોશી અફઘાનિસ્તાનના દેશોના વિદેશ મંત્રીઓની ત્રીજી બેઠક માટે પણ આમંત્રણ આપ્યું હતું.
વિશ્વભરમાં ખનિજોની શોધ કરી રહ્યું છે ચીન
અહેવાલો અનુસાર, ચીન 2021થી તાલિબાનના નજીકના સંપર્કમાં છે અને તેની લિથિયમ અને તાંબાની ખાણો પર નજર રાખી રહ્યું છે. મીડિયાના અહેવાલ મુજબ ચીન માત્ર અફઘાનિસ્તાનમાં જ નહીં પરંતુ સમગ્ર વિશ્વમાં ખનિજ ભંડાર શોધી રહ્યું છે. અહેવાલમાં કહેવામાં આવ્યું છે કે માર્ચમાં યોજાનારી બેઠકમાં આશા છે કે “અફઘાનિસ્તાનની ખાણોમાં ચીનના રોકાણ પર ચર્ચા સાથે શરૂ થશે.” આ વાત અફઘાનિસ્તાનના રાજકીય વિશ્લેષક અહેમદ મુનીબ રસાએ એક મીડિયા હાઉસ સાથે વાતચીત કરતાં કહી હતી.
અફઘાનિસ્તાનમાં છે તાંબાનો ભંડાર
વિશ્વના સૌથી મોટા તાંબાના ભંડારો પૈકીનું એક કાબુલના દક્ષિણપૂર્વમાં મેસ અયનાકમાં આવેલો છે. મીડિયા અહેવાલો મુજબ, બેજિંગમાં વાતચીત દરમિયાન મુત્તાકી અને વાંગ યી વચ્ચે કોપર રિઝર્વ પર પણ ચર્ચા કરવામાં આવશે. અહેવાલ છે કે ચીનની એક ટીમે તાંબુ અને લિથિયમ તેમજ અન્ય ખનિજો માટે અફઘાનિસ્તાનના નાંગરહાર અને લઘમાન પ્રાંતની મુલાકાત લીધી છે.
એક અહેવાલ મુજબ, ચીન અને તાલિબાન વચ્ચેના સંબંધોને જોયા બાદ જાણવા મળે છે કે ચીન અફઘાનિસ્તાન સાથે સંબંધો બનાવવામાં સતત વ્યસ્ત છે. જ્યારથી, તાલિબાને અફઘાનિસ્તાન પર કબજો મેળવ્યો છે ત્યારથી ચીને પોતાનું અભિયાન તેજ કરી દીધું છે. આ પહેલા ગલ્ફ અને મિડલ ઈસ્ટના મુસ્લિમ બહુમતી ધરાવતા દેશોમાં ચીનની વિસ્તરણવાદી માનસિકતાનો સતત વિરોધ થઈ રહ્યો હતો.
