ભરૂચ જિલ્લામાં સોશિયલ મીડિયા પર રીલ બનાવવાની ઘેલછા યુવાનોમાં જોખમી સ્તરે પહોંચી રહી છે. ભરૂચ બાદ હવે અંકલેશ્વરમાં કાયદો અને વ્યવસ્થાના લીરેલીરા ઉડાવતી એક ઘટના સામે આવી છે. અહીં એક ઓટો ગેરેજના પ્રમોશન માટે પાંચ શખ્સોએ જાહેર રસ્તા પર બેફામ કાર હંકારી હતી અને ટ્રાફિક વચ્ચે અકસ્માત થયો હોવાનો ડ્રામા કરી તોડફોડ કરી હતી. આ શખ્સોએ રીલ બનાવવાના ચક્કરમાં અન્ય વાહનચાલકોના જીવ પણ જોખમમાં મૂક્યા હતા. આ સ્ટંટનો વીડિયો સોશિયલ મીડિયા પર વાયરલ થતા જ અંકલેશ્વર શહેર એ-ડિવિઝન પોલીસ હરકતમાં આવી હતી.
કાયદાના ભંગ બદલ 5 લોકોની પોલીસે કરી ધરપકડ
પોલીસે જાહેર જનતાની સુરક્ષા જોખમાવવા અને કાયદાના ભંગ બદલ ગુનો નોંધી ઘટનામાં સામેલ તમામ ૫ લોકોની ધરપકડ કરી લીધી છે. નોંધનીય છે કે હજુ ગત સોમવારે જ ભરૂચ એ-ડિવિઝન પોલીસે પણ ટ્રાફિકમાં અકસ્માતનો ડ્રામા કરનાર પાંચ યુવકોને જેલના સળિયા પાછળ ધકેલ્યા હતા. સતત બીજા દિવસે અંકલેશ્વરમાં આવી કાર્યવાહી થતા સ્ટંટબાજોમાં ફફડાટ વ્યાપી ગયો છે. પોલીસ દ્વારા સ્પષ્ટ ચેતવણી આપવામાં આવી છે કે સોશિયલ મીડિયાના વળગણમાં જાહેર વ્યવસ્થા ખોરવનારાઓને બક્ષવામાં આવશે નહીં.
