દિવાળી પહેલા ડિરેક્ટોરેટ ઓફ રેવન્યુ ઈન્ટેલિજન્સ (DRI)એ ગેરકાયદેસર ફટાકડાની દાણચોરી પર મોટી કાર્યવાહી શરૂ કરી છે. ઓપરેશન ફાયર ટ્રેઈલ હેઠળ DRIએ તુતીકોરીન પોર્ટ પર ચીનથી બે કન્ટેનરમાં છુપાયેલા ફટાકડાનો મોટો જથ્થો જપ્ત કર્યો હતો. આ કન્ટેનરમાં 83,520 ચાઈનીઝ ફટાકડા હોવાના અહેવાલ છે, જેને ખોટી રીતે એન્જિનિયરિંગ માલ તરીકે જાહેર કરવામાં આવ્યા હતા.
ફટાકડાઓની કિંમત આશરે 5.01 કરોડ હોવાનો અંદાજ
અહેવાલો મુજબ જપ્ત કરાયેલા ફટાકડાઓની કિંમત આશરે ₹5.01 કરોડ હોવાનો અંદાજ છે. DRIએ કવર કાર્ગો તરીકે છુપાયેલી સિલિકોન સીલંટ ગન પણ જપ્ત કરી છે. DRIએ આ સમગ્ર ઓપરેશનને ઓપરેશન ફાયર ટ્રેઈલ નામ આપ્યું છે. આ કેસના સંદર્ભમાં 4 લોકોની ધરપકડ કરવામાં આવી છે.
આ કેસમાં 4 લોકોની ધરપકડ
14થી 18 ઓક્ટોબર, 2025 સુધી ચાલેલા આ ઓપરેશન દરમિયાન અધિકારીઓએ સૌપ્રથમ તુતીકોરિનમાં આયાતકારની ધરપકડ કરી અને વધુ તપાસ બાદ ચેન્નાઈ અને તુતીકોરિનમાં મુંબઈના બે રહેવાસીઓ સહિત ત્રણ અન્ય લોકોની ધરપકડ કરી. ચારેય આરોપીઓને કોર્ટમાં રજૂ કરવામાં આવ્યા હતા અને તેમને ન્યાયિક કસ્ટડીમાં મોકલવામાં આવ્યા હતા. તમિલનાડુ પોલીસના જણાવ્યા અનુસાર પ્રતિબંધિત ફટાકડા કાર્ગો જહાજ દ્વારા આવેલા કન્ટેનરમાં છુપાવવામાં આવ્યા હતા. પોલીસે જણાવ્યું હતું કે ચાઈનીઝ ફટાકડાની દાણચોરીના સંબંધમાં મુંબઈના અન્ય રહેવાસીની શોધ ચાલી રહી છે.
ભારતમાં ફટાકડાની આયાત પર પ્રતિબંધ
ભારતમાં ફટાકડાની આયાત પર પ્રતિબંધ છે, જેના માટે ફોરેન ટ્રેડ ડિરેક્ટોરેટ જનરલ (DGFT) અને પેટ્રોલિયમ અને વિસ્ફોટકો સલામતી સંગઠન (PESO) પાસેથી ખાસ લાઈસન્સ જરૂરી છે. પરવાનગી વિના આવા વિસ્ફોટક પદાર્થોની દાણચોરી વિદેશી વેપાર કાયદા અને સલામતી નિયમોનું ઉલ્લંઘન કરે છે અને જાહેર સલામતી અને બંદર માળખા માટે નોંધપાત્ર ખતરો ઉભો કરે છે. DRIએ જણાવ્યું છે કે તે રાષ્ટ્રીય સુરક્ષા, જાહેર જીવન અને સંપત્તિનું રક્ષણ અને દાણચોરી સામે કડક પગલાં લેવા માટે સંપૂર્ણપણે પ્રતિબદ્ધ છે.
