દુબઈના ક્રાઉન પ્રિન્સ શેખ હમદાન બિન મોહમ્મદ બિન રાશિદ અલ મક્તૂમ ભારતની મુલાકાતે છે. આ દરમિયાન બંને દેશો વચ્ચે અનેક કરારો પર હસ્તાક્ષર કરવામાં આવ્યા હતા. જેમાં કોચી અને વાડીનારમાં જહાજ સમારકામ ક્લસ્ટર સ્થાપવા અને દુબઈમાં IIM અમદાવાદ કેમ્પસ ખોલવાનો સમાવેશ થાય છે. પ્રધાનમંત્રી મોદી, સંરક્ષણ મંત્રી રાજનાથ સિંહ, વિદેશ મંત્રી એસ.જયશંકર અને વાણિજ્ય મંત્રી પીયૂષ ગોયલ સાથે અલ મક્તૂમની વિવિધ મુદ્દે બેઠક યોજાઇ અને બાદ આ નિર્ણયોની જાહેરાત કરવામાં આવી હતી.
મહત્વપૂર્ણ કરારો પર હસ્તાક્ષર
દુબઈના ક્રાઉન પ્રિન્સ શેખ હમદાન બિન મોહમ્મદ અલ મક્તૂમાના ભારત સાથે મહત્ત્વના કરારો થયા છે. ભારત-યુએઈ ફ્રેન્ડશીપ હોસ્પિટલ માટે પણ જમીન ફાળવવામાં આવી છે. વિદેશ મંત્રાલયે જણાવ્યુ હતુ કે, ઇન્ડિયન ઇન્સ્ટિટ્યૂટ ઓફ ફોરેન ટ્રેડ એટલે કે IIFTનું પ્રથમ વિદેશી કેમ્પસ દુબઈમાં સ્થાપિત કરવામાં આવશે. આ ઉપરાંત, દુબઈમાં ભારત-યુએઈ ફ્રેન્ડશીપ હોસ્પિટલના નિર્માણ માટે જમીન ફાળવવામાં આવશે. વિદેશ મંત્રાલયે જણાવ્યું હતું કે ભારત માર્ટના નિર્માણ કાર્ય શરૂ કરવા અને ભારત માર્ટ સંકુલના 3-ડી રેન્ડરિંગ શરૂ કરવા માટે એક કરાર થયો છે. પીએમ મોદી સાથેની મુલાકાત દરમિયાન, દુબઈના ક્રાઉન પ્રિન્સે પ્રધાનમંત્રીને તેમના દાદા શેખ રશીદના બિશ્તની પ્રતિકૃતિ ભેટમાં આપી, જે બંને દેશો વચ્ચે ઐતિહાસિક અને પેઢીગત રાજકીય મિત્રતાનું પ્રતીક છે. બંને નેતાઓએ ભારત-યુએઈ વ્યાપક વ્યૂહાત્મક ભાગીદારી અને મજબૂત સાંસ્કૃતિક અને લોકો-થી-લોકોના સંબંધોને મજબૂત બનાવવાની રીતો પર પણ ચર્ચા કરી હતી.
પીએમ મોદીએ શું કહ્યું?
ક્રાઉન પ્રિન્સ યુએઈના નાયબ વડા પ્રધાન અને સંરક્ષણ પ્રધાન પણ છે. તેઓ મંગળવારે સવારે ભારતની બે દિવસની મુલાકાતે રાષ્ટ્રીય રાજધાની પહોંચ્યા હતા. સાંજે તે મુંબઈ જવા રવાના થયા હતા. પીએમ મોદીએ લોક કલ્યાણ માર્ગ પરના તેમના નિવાસસ્થાને ક્રાઉન પ્રિન્સ માટે વર્કિંગ લંચનું આયોજન કર્યું હતું. સોશિયલ મીડિયા પર એક પોસ્ટમાં, પીએમ મોદીએ કહ્યું કે દુબઈએ ભારત-યુએઈ વ્યાપક વ્યૂહાત્મક ભાગીદારીને આગળ વધારવામાં મહત્વપૂર્ણ ભૂમિકા ભજવી છે. તેમણે કહ્યું કે, દુબઈના ક્રાઉન પ્રિન્સ, મહામહિમ શેખ હમદાન બિન મોહમ્મદ બિન રશીદ અલ મક્તૂમને મળીને આનંદ થયો. આ ખાસ મુલાકાત આપણી ઊંડી મિત્રતાને પુનઃપુષ્ટિ આપે છે અને ભવિષ્યમાં વધુ મજબૂત સહયોગનો માર્ગ મોકળો કરે છે. રાજનાથ સિંહ અને અલ મક્તોમ વચ્ચેની બેઠકમાં, બંને પક્ષોએ બંને દેશો વચ્ચે વ્યૂહાત્મક સંરક્ષણ અને સુરક્ષા ભાગીદારીને વધુ મજબૂત બનાવવાના માર્ગો પર ચર્ચા કરી. વિદેશ મંત્રાલયે જણાવ્યું હતું કે દુબઈમાં IIM-અમદાવાદ અને IIFTના પ્રસ્તાવિત વિદેશી કેમ્પસ બંને દેશો વચ્ચે શૈક્ષણિક સહયોગને વધુ મજબૂત બનાવશે. તે દુબઈ અને યુએઈને પ્રતિષ્ઠિત ભારતીય શૈક્ષણિક સંસ્થાઓ માટે એક અગ્રણી પ્રાદેશિક અને વૈશ્વિક સ્થળ તરીકે પણ સ્થાપિત કરશે. વિદેશ મંત્રાલયે એક નિવેદનમાં જણાવ્યું હતું કે, આ પહેલથી યુએઈમાં રહેતા 4.3 મિલિયન ભારતીય પ્રવાસીઓ અને ગલ્ફ ક્ષેત્રમાં રહેતા લગભગ 9 મિલિયન ભારતીય પ્રવાસીઓને ફાયદો થશે.
અબુ ધાબીમાં IIT કેમ્પસ
વર્ષ 2024માં મધ્ય પૂર્વમાં IITના પ્રથમ કેમ્પસનું ઉદ્ઘાટન અબુ ધાબીમાં થયું હતું. IIT દિલ્હીનું કેમ્પસ અહીં ખુલ્યું હતું. પ્રતિષ્ઠિત IIT દિલ્હીએ અબુ ધાબી કેમ્પસના ઉદ્ઘાટન સાથે તેની વૈશ્વિક હાજરીનો વિસ્તાર કર્યો. યુએઈમાં શૈક્ષણિક તકોના વિસ્તરણ તરફ આ એક મહત્વપૂર્ણ પગલું હતું. IIT દિલ્હી કેમ્પસ ઉપરાંત, UAEના શૈક્ષણિક લેન્ડસ્કેપને પણ તાજેતરમાં દુબઈમાં CBSE પ્રાદેશિક કાર્યાલયની સ્થાપનાથી ફાયદો થઈ રહ્યો છે.
