Dubai Weather: દુબઈમાં વાવાઝોડા બાદ મૂશળધાર વરસાદ ખાબક્યો

રણપ્રદેશ એવા યુએઈમાં છેલ્લા એક મહિનાથી ભારે વરસાદ અને વાવાઝોડાનો કેર યથાવત્ છે. હવામાનની આગાહી પ્રમાણે યુએઈમાં મધરાતથી ભારે વરસાદ પડી રહ્યો છે. દુબઈમાં આજે વહેલી સવારથી વીજળીના ચમકારા સાથે વરસાદ પડ્યો હતો. હવે આગામી 48 કલાક માટે મોટું એલર્ટ જાહેર કરવામાં આવ્યું છે. જો કે, એવું કહેવામાં આવી રહ્યું છે કે આ મહિનાની શરૂઆતમાં દેશમાં થયેલા અભૂતપૂર્વ વરસાદ કરતાં આગામી બે દિવસમાં વરસાદ ઓછો ગંભીર રહેશે. જાહેર જનતાને સાવચેતી રાખવા તાકીદ કરવામાં આવી છે. બાળકોનું શિક્ષણ ઓનલાઈન કરવામાં આવ્યું છે.

યુઈએમાં મૂશળઘાર વરસાદ તેમજ વાવાઝોડાને કારણે ગુરુવારે ઓરેન્જ એલર્ટ જાહેર કરવામાં આવ્યું છે. આ સાથે ડઝનબંધ ફ્લાઈટ્સ કેન્સલ કરવામાં આવી હતી અને ઈન્ટરસિટી બસ સેવાઓ બંધ કરી દેવામાં આવી હતી. ઓફિસમાં કામ કરતા લોકોને તેમના ઘરની બહાર ન નીકળવાની સૂચના આપવામાં આવી હતી. હાલમાં દુબઈમાં ભારે વરસાદ અને વાવાઝોડાએ ત્રાટક્યું છે. દુબઈના તમામ વિસ્તારોમાં ભારે વરસાદ સાથે જોરદાર તોફાન ચાલી રહ્યું છે. જેના કારણે લોકોમાં ભયનો માહોલ ફેલાયો છે. પાર્ક અને બીચ બંધ કરી દેવામાં આવ્યા છે. તેની સાથે એરપોર્ટ અને એરલાઇન્સ પણ આ અસર માટે તૈયાર છે. આજે તાત્કાલિક અસરથી ઘણી ફ્લાઈટ્સ રદ કરવામાં આવી છે. રસ્તાઓ પરની અવરજવર પણ બંધ કરી દેવામાં આવી છે.

દુબઈ એરપોર્ટ પર ખરાબ હવામાનની શક્યતાને ધ્યાનમાં રાખીને ચેતવણી જારી કરવામાં આવી છે. તમને જણાવી દઈએ કે 16 એપ્રિલે ભારે વરસાદને કારણે એરપોર્ટ પર પાણી ભરાઈ ગયું હતું. રસ્તા પર વાહનો તરતા જોવા મળ્યા અને પ્લેન પણ રનવે પર તરતા જોવા મળ્યા. પ્રતિકૂળ હવામાન અંગે પ્રવાસીઓ માટે એડવાઈઝરી પણ જારી કરવામાં આવી છે. સત્તાવાળાઓએ મુસાફરોને તેમની મુસાફરી વહેલી શરૂ કરવા અને સમયસર એરપોર્ટ પહોંચવા વિનંતી કરી છે. ઉલ્લેખનીય છે કે ગયા મહિને 16 એપ્રિલે સંયુક્ત આરબ અમીરાતમાં 75 વર્ષ બાદ આટલો ભારે વરસાદ જોવા મળ્યો હતો.