સુરતમાથી ડુપ્લિકેટ ચલણી નોટ છાપવાનું કારખાનું ઝડપાયું

ન્યુઝ ચેનલ અને સાપ્તાહિક માલિકનું કરતૂત; ત્રણની અટકાયત

લીંબાયત વિસ્તારમાં એસઓજી-પીસીબીના દરોડા: ૧૪ લાખની નકલી નોટો છાપી હતી

 સુરતના લીંબાયત મદીના મસ્જીદ પાછળ માર્કેન્ડેય મંદિરની સામે સરદારનગરમાં આવેલી સુરત હેરાલ્ડ સાપ્તાહિક અને એસએચ ન્યુઝ 24 બાય 7 ચેનલની ઓફિસમાં એસઓજી-પીસીબીની ટીમે દરોડો પાડ્યો હતો. જેમાં નકલી ચલણી નોટો છાપવાનું કારખાનું જડપાયું હતું.પોલીસે રૂ.9.36 લાખની મત્તાની 500 અને 200 ના દરની નકલી ચલણી નોટો સાથે સાપ્તાહિક અખબાર અને ન્યુઝ ચેનલના માલિક સહીત ત્રણની અટકાયત કરી હતી. ઉપરાંત નોટ છાપવા માટે ઉપયોગમાં લીધેલા 3110 નંગ પેપર, કલર પ્રિન્ટર, બે કટર મશીન, લીલા રંગની શાહી વાળી બોલપેન અને ઇન્ક બોટલ, ન્યુઝ ચેનલનુ પ્રેસ આઈ.કાર્ડ, ઇન્ટરવ્યુના ચાર માઈક વિગેરે જપ્ત કરી અને આગળની કાર્યવાહી હાથ ધરી છે.

એસઓજી-પીસીબીના સૂત્રો દ્વારા પ્રાપ્ત થતી વિગતો મુજબ એસઓજીના એએસઆઈ ઇમ્તિયાઝ ફકરૂમોહમદને બાતમી મળી હતી કે લીંબાયત વિસ્તારમાં રહેતો અને લોકલ ચેનલ ચલાવતો એક વ્યક્તિ તેના સાગરીતો સાથે મળી પોતાની ઓફિસમાં 500 અને 200 ના દરની બોગસ ચલણી નોટો છાપીને કોઈને શંકા નહીં જાય તે માટે લીંબાયત વિસ્તારમાં જ શાકભાજીની લારી, પાનના ગલ્લાઓ ઉપર વટાવે છે.આથી એસઓજી અને પીસીબીની જુદીજુદી ટીમો બનાવી પોલીસે વેશપલટો કરી લીંબાયત વિસ્તારમાં ફેરીયાઓ બની શાકભાજીની લારી, કપડાની લારી, ફૃટની લારી, નાસ્તાની લારીઓ ઉપર તે વ્યક્તિની ઓફીસની આજુબાજુના વિસ્તારમાં ફરી છેલ્લા બે મહિનાથી વોચ રાખી હતી.છેવટે ચોક્કસ હકીકત ના આધારે એસઓજી-પીસીબીની ટીમે ગતસાંજે લીંબાયત મારુતિનગર પાસે મદીના મસ્જીદની પાછળ માર્કેન્ડેય મંદિરની સામે સરદારનગર પ્લોટ નં.15 ના પહેલા માળે ઓફિસ નં.2 માં આવેલી સુરત હેરાલ્ડ સાપ્તાહિક અને એસએચ ન્યુઝ 24 * 7 ચેનલની ઓફિસમાં રેઇડ કરી હતી.

એસઓજી-પીસીબીએ ત્યાંથી સાપ્તાહિક અખબાર અને ન્યુઝ ચેનલના માલિક ફિરોજ સુપડુ શાહ ( ઉ.વ.46, રહે.ઘર નં.7, પ્લોટ નં.63, ઇબ્રાહિમભાઈના મકાનમાં ભાડેથી, ગલી નં.3, શાસ્ત્રીનગર સોસાયટી, મદીના મસ્જીદની પાછળ, લીંબાયત, સુરત. મુળ રહે.ચાંદશાહ વલીની દરગાહની બાજુમાં, પીપરલા ગામ, તા.ભુસાવળ, જી.જલગાંવ, મહારાષ્ટ્ર ), બાબુલાલ ગંગારામ કપાસીયા ( ઉ.વ.41, રહે.ઘર નં.49, સેમલીયાબીબી ગામ, તા.ઘટ્ટીયા, જી.ઉજ્જૈન, મધ્યપ્રદેશ ) અને સફીકખાન ઇસ્માઈલખાન ( ઉ.વ.53, રહે.સુમખેડાખાન ગામ, જી.દેવાસ, મધ્યપ્રદેશ ) ને ઝડપી લીધા હતા.એસઓજી-પીસીબીને ઓફીસમાંથી 500 અને 200 ના ડરની બનાવટી ચલણી નોટો છાપવાના મીની કારખાનુ મળી આવ્યું હતું, એસઓજી-પીસીબીએ ત્યાંથી રૂ.9,36,100 ની મત્તાની બનાવટી ચલણી નોટો ઉપરાંત નોટ છાપવા માટે ઉપયોગમાં લીધેલા 3110 નંગ પેપર, કલર પ્રિન્ટર, બે કટર મશીન, લીલા રંગની શાહી વાળી બોલપેન અને ઇન્ક બોટલ, ન્યુઝ ચેનલનુ પ્રેસ આઈ.કાર્ડ, ઇન્ટરવ્યુના ચાર માઈક વિગેરે કબજે કર્યા હતા.

ત્રણેયની પુછપરછમાં જાણવા મળ્યું હતું કે દેવું ચૂકતે કરવા ફિરોજ શાહને બાબુલાલ અને સફીકખાને બનાવટી ચલણી નોટ છાપવાનો આઈડીયા આપ્યો હતો.તેમજ બંનેએ સુરત આવી નોટો છાપવામાં તેમજ બજારમાં ફરતી કરવા ગ્રાહકો શોધવામાં મદદ કરશે તેમ જણાવતા ફિરોજે યુ-ટ્યુબ ઉપર નોટો કેવી રીતે છાપવી તેના વિડીયો જોઈને તેમજ ઉછીના પૈસા લઈ કલર પ્રિન્ટર, શાહી, નોટો છાપવા માટે તેને ભળતા આવતા કાગળો વિગેરે ખરીદી બે મહિનાથી પોતાની ન્યુઝ ચેનલની ઓફીસમાં ચલણી નોટો છાપવાનુ શરૂ કર્યું હતું.ગતરોજ બાબુલાલ અને સફીકખાન કાગળો અને શાહી મધ્યપ્રદેશથી લઈને આપવા આવ્યા ત્યારે જ એસઓજી-પીસીબીએ તેમને ઝડપી લીધા હતા.એસઓજીએ આ અંગે ગુનો નોંધી વધુ કાર્યવાહી હાથ ધરી છે.

જાલી નોટ શાકભાજીની ખરીદી કરવા, પાનના ગલ્લા પર વાપરતા

ફિરોજ શાહ જે બોગસ ચલણી નોટો બનાવતો હતો તેમાં સિક્યુરિટી થ્રેડને બદલે તે લીલા રંગની શાહી વાળી જરીવાળી બોલપેનથી થ્રેડ બનાવતા હતા.તે કોઈપણ મોટી દુકાન કે પેટ્રોલ પંપ જેવી જગ્યાએ સરળતાથી પકડાઈ જાય તેમ હોય તેઓ કોઈને શંકા ન જાય તે માટે બનાવટી નોટો લીંબાયતમાં શાકભાજીની લારી, પાનના ગલ્લાઓ ઉપર જ વટાવતા હતા.તેઓ રૂ.500 ની નોટ આપી રૂ.50 થી 100 ની ખરીદી કરતા હતા.જયારે રૂ.200 ની નોટ આપી નાની વસ્તુ ખરીદતા હતા.પોલીસે ફિરોજ સુધી પહોંચવા માટે બે મહિના સુધી વેશપલટો કરી નાના ફેરીયા બની વોચ ગોઠવી હતી.