દિવાળીમાં કુરિયર કંપનીઓ રાજ્યમાં રોજ છથી સાત લાખ પાર્સલની ડિલિવરી કરે છે

• ગ્રિટિંગ કાર્ડનું ચલણ ગયું અને કોર્પોરેટ ગિફ્ટિંગનું ચલણ વધ્યું
• સ્ટાર્ટઅપ્સ, બેન્કિંગ, IT, ફર્માસ્યૂટિકલ કંપનીઓ તરફ્થી પાર્સલના બલ્ક બુકિંગ
  
• કોર્પોરેટ ગિફ્ટિંગ પાર્સલ્સમાં ડ્રાયફ્રૂટ અને મીઠાઈનું પ્રમાણ સૌથી વધુ
  

દિવાળી આવે એટલે કુરિયર કંપનીઓનું કામ વધી જાય છે. લોકો તેમજ કંપનીઓ પોતાની સગા-સંબંધીઓ અને ગ્રાહકોને ભેટ મોકલતા હોય છે, ખાસ કરીને દિવાળી પૂર્વેના એક સપ્તાહમાં કુરિયરના બુકિંગ અને ડિલિવરીમાં 15-25% જેવો ઉછાળો આવે છે. લોજિસ્ટિક કંપનીઓના જણાવ્યા પ્રમાણે હાલ તહેવારોના કારણે આખા દેશમાં 35-40 લાખ અને ગુજરાતમાં 6-7 લાખ પાર્સલની ડિલિવરી થઇ રહી છે. કોર્પોરેટ ગિફ્ટિંગ પાર્સલ્સમાં ડ્રાયફ્રૂટ અને મીઠાઈનું પ્રમાણ સૌથી વધુ છે. આ ઉપરાંત પર્સનલાઈઝ ગિફ્ટ પણ સારા પ્રમાણમાં મોકલવામાં આવી રહી છે. સામાન્ય દિવસોમાં નેશનલ ડિલિવરી 30 લાખ પાર્સલ આસપાસ અને ગુજરાતમાં 4.50-5 લાખ પાર્સલ આસપાસ રહેતી હોય છે.

કુરિયર અને લોજિસ્ટિક કંપનીઓના કહેવા પ્રમાણે, અગાઉ દિવાળી પર ગ્રિટિંગ કાર્ડ્સ મોકલવાનું ચલણ હતું પણ હવે કોર્પોરેટ ગિફ્ટ સૌથી વધુ આવે છે. આ સાથે જ ઈ-કોમર્સનો વ્યાપ વધવાથી ઓનલાઈન શોપિંગ થયેલી વસ્તુઓની ડિલિવરી પણ અત્યારે વધુ થઇ રહી છે. કંપનીઓ માને છે કે, ગુજરાત સહિત દેશભરમાં રોડ અને રેલ નેટવર્ક ઘણું સારું થયું હોવાથી ડિલિવરી ટાઈમ સરેરાશ 24-48 કલાકનો રહે છે જે અગાઉ તહેવારોના સમયમાં લગભગ બમણો હતો. સેક્ટરની વાત કરીએ તો બેન્કસ, સ્ટાર્ટઅપ્સ, ઇન્ફેર્મેશન ટેક્નોલોજી (IT), ફર્માસ્યૂટિકલ અને ટાઈલ્સ કંપનીઓ તરફ્થી તેમના પ્રીમિયમ કસ્ટમર્સને તહેવારોની ભેટ વધુ મોકલવામાં આવે છે. આ ઉપરાંત ઘણા લોકો પોતાના નજીકના સંબંધીઓને મીઠાઈ પણ મોકલે છે.

કોર્પોરેટ્સમાં ગિફ્ટિંગનું વધતું પ્રમાણ

એક અગ્રણી કુરિયર કંપનીના જણાવ્યા અનુસાર દિવાળીના તહેવારોમાં પહેલા ગ્રીટિંગ કાર્ડ મોકલવામાં આવતા હતા. પરંતુ, ઈ-મેઈલ, સોશિયલ મીડિયા અને મેસેન્જર સર્વિસીસ આવતા હવે કોઈ કાર્ડ્સ મોકલતા નથી, તેનું સ્થાન કોર્પોરેટ અને પર્સનલ ગિફ્ટિંગે લઇ લીધું છે. ફર્માસ્યુટિકલ, ટાઈલ્સ, IT કંપનીઓ અને સ્ટાર્ટઅપ્સ તહેવારોમાં નેટવર્કિંગ અને સંબંધો વિકસાવવા માટે ગિફ્ટ મોકલે છે. કોવિડ પહેલાની સરખામણીએ તહેવારોમાં કુરીયારનો બિઝનેસ લગભગ બમણો થયો છે. ખાસ કરીને કોર્પોરેટ ગિફ્ટિંગ માટેના બુકિંગમાં દર વર્ષે 20-25% જેવો વધારો થઇ રહ્યો છે.

તહેવારોના બુકિંગમાં વાર્ષિક 15-18% વધારો

અન્ય એક કુરિયર કંપનીએ કહ્યું કે, દર વર્ષે તહેવારોના બુકિંગમાં 15-18% વધારો થાય છે. હાલમાં જે બુકિંગ થઇ રહ્યા છે તેમાં 60% પાર્સલ અને 40% ડોક્યુમેન્ટ્સ હોય છે. જેમ જેમ દિવાળી નીક આવશે તેમ તેમ પાર્સલની ટકાવારી વધશે. કોર્પોરેટ ગિફ્ટિંગ પાર્સલ્સમાં ડ્રાયફ્રુટ અને મીઠાઈનું પ્રમાણ સૌથી વધુ છે. આ ઉપરાંત લોકો અત્યારે ઓનલાઈન ખરીદી વધુ કરે છે તેના કારણે ઈ-કોમર્સ કંપનીઓના બુકિંગ પણ વધુ રહે છે. સારા બુકિંગ હોવા છતાં લોજિસ્ટિક અને કુરિયર કંપનીઓએ કોઈભાવ વધારો કર્યો નથી. મોટાભાગના પાર્સલ જે તે ડિલીવરી સેન્ટર પર બાય રોડ મોકલવામાં આવે છે.

તહેવારોને ધ્યાને રાખી આગોતરી તૈયારી કરવી પડી

દિવાળીના તહેવારોમાં કામ વધશે તેને ધ્યાનમાં લઈને કુરિયર કંપનીઓએ અગાઉથી જ તૈયારીઓ કરી હતી. કુરિયર કંપનીઓએ પોતાના બુકિંગ પોઈન્ટ્સ પર સ્ટાફ્ની સંખ્યા વધારી છે. આ સાથે જ મોટી લોજિસ્ટિક કંપનીઓએ પોતાના વેરહાઉસમાં પાર્સલના શોર્ટિંગ અને લોડિંગ-અનલોડિંગ માટે રોબોટ્સ પણ વસાવ્યા છે. આ ઉપરાંત બલ્ક બુકિંગ હોય તો જે તે પાર્ટી પાસેથી તેમના ઘર કે ઓફ્સિથી જ પાર્સલનું કલેક્શન કરવામાં આવે છે. કુરિયર કંપનીઓએ જણાવ્યું હતું કે, કોવિડ પહેલાની સરખામણીએ આ વર્ષે દિવાળી પર 100% વધારે બુકિંગ છે. બુકિંગની સાથે સાથે ટ્રાન્સપોર્ટેશનની પણ વ્યવસ્થા પહેલાથી ગોઠવી લેવામાં આવે છે જેથી લોકોને સમયસર પાર્સલ મળી શકે.