થાઇલેન્ડની રાજધાની બેંગકોકમાં ભૂકંપ બાદ 33 માળની બાંધકામ હેઠળની ઇમારત ધરાશાયી થઈ હતી. જેમાં 17 લોકો માર્યા ગયા હતા અને 83 કામદારો ગુમ થયા હતા. આ ઇમારત ચીન સમર્થિત કંપની દ્વારા બનાવવામાં આવી રહી હતી. જેના કારણે બાંધકામની ગુણવત્તા પર પ્રશ્નો ઉભા થયા હતા. તે જ સમયે, દસ્તાવેજ ચોરીના આરોપસર ચાર ચીની નાગરિકોની ધરપકડ કરવામાં આવી છે.
ઇમારત પત્તાના ઘરની જેમ ધરાશાયી
બેંગકોકમાં ઘણી ગગનચુંબી ઇમારતો છે. પરંતુ ભૂકંપ દરમિયાન ફક્ત આ નિર્માણાધીન ઇમારતને ભારે નુકસાન થયું હતું. આ પ્રોજેક્ટ થાઇલેન્ડના સ્ટેટ ઓડિટ ઓફિસ એટલે કે SAO હેઠળ ચલાવવામાં આવી રહ્યો હતો અને તેની કિંમત 2 અબજ થાઇ બાહ્ટ લગભગ 50 હજાર કરોડ રૂપિયાથી વધુ હતી. આ ઘટના બાદ થાઈલેન્ડના નાયબ વડા પ્રધાન અનુતિન ચાર્નવિરાકુલે તપાસના આદેશ આપ્યા છે. તેમણે કહ્યું કે એક સમિતિની રચના કરવામાં આવી છે. જે ને સાત દિવસમાં રિપોર્ટ સુપરત કરવાનો રહેશે.
દસ્તાવેજોમાં રમાતી રમતો
ઇમારત ધરાશાયી થયા બાદ વધુ એક ચોંકાવનારી ઘટના પ્રકાશમાં આવી. ત્યાંથી 32 મહત્વપૂર્ણ દસ્તાવેજો ચોરવાના આરોપમાં ચાર ચીની નાગરિકોની ધરપકડ કરવામાં આવી છે. બેંગકોકના ગવર્નરે આ સ્થળને આપત્તિજનક વિસ્તાર જાહેર કર્યું છે. જ્યાં ફક્ત અધિકૃત લોકો જ જઈ શકે છે. આ ઇમારતનું નિર્માણ ઇટાલિયન-થાઈ ડેવલપમેન્ટ પીએલસી એટલે કે ITD અને ચાઇના રેલ્વે નંબર 10 લિમિટેડ દ્વારા કરવામાં આવી રહ્યું હતું. આ પ્રોજેક્ટમાં ચીની કંપનીનો 49% હિસ્સો હતો. જે થાઈ કાયદા હેઠળ વિદેશી માલિકી માટેની મહત્તમ મર્યાદા હતી.
સલામતીના ધોરણો પર પ્રશ્નો ઉભા થયા
આ પ્રોજેક્ટ 2026 સુધીમાં પૂર્ણ થવાનો હતો, પરંતુ તે સમયપત્રક કરતાં ઘણો પાછળ ચાલી રહ્યો હતો. થાઇલેન્ડના ડેપ્યુટી ઓડિટર જનરલ સુથિપોંગ બુનીથીના જણાવ્યા અનુસાર, બાંધકામનું કામ ફક્ત 30% પૂર્ણ થયું હતું. થાઇલેન્ડના ભ્રષ્ટાચાર વિરોધી સંગઠનના પ્રમુખ માના નિમિત્તામોંગકોલે જણાવ્યું હતું કે તેમની સંસ્થાએ પણ અગાઉ આ બાંધકામ કાર્ય અંગે ચિંતા વ્યક્ત કરી હતી. તેમણે કહ્યું કે બાંધકામ સ્થળે કામદારોની સંખ્યા જરૂરિયાત કરતાં ઓછી હતી, જેના કારણે વિલંબ થઈ રહ્યો હતો. બાંધકામમાં ઉતાવળને કારણે ધોરણો સાથે ચેડા થવાની ભીતિ છે.
ભૂકંપને કારણે ભારે વિનાશ
આ ભૂકંપની સૌથી વધુ અસર મ્યાનમારમાં થઈ છે, જ્યાં અત્યાર સુધીમાં 2000 થી વધુ લોકો મૃત્યુ પામ્યા છે અને 4000 લોકો ઘાયલ થયા છે. દેશના ઘણા વિસ્તારોમાં કટોકટી જાહેર કરવામાં આવી છે અને હોસ્પિટલો ઘાયલ લોકોથી ભરેલી છે. મંડલે જેવા મોટા શહેરોમાં, ઇમારતો નાશ પામી છે અને માળખાગત સુવિધાઓને ભારે નુકસાન થયું છે. આ વિનાશક ભૂકંપ પછી, ભારતે મ્યાનમારમાં રાહત સામગ્રી મોકલી છે. ભારતે પાંચ લશ્કરી વિમાનો દ્વારા દવાઓ, તબીબી ઉપકરણો અને NDRFની 80 સભ્યોની ટીમ મોકલી છે.
