પાકિસ્તાનની અર્થવ્યવસ્થા ડિફોલ્ટની કગાર ઉપર છે ત્યારે વૈશ્વિક રીતે તેને આર્થિક સહાય કે લોન મળ્યા કરે છે. જોવાનું એ છે કે આ કંગાળ દેશ પોતાના દેશના લોકોના વિકાસમાં રકમ વાપરવાના બદલે જૂની બાકી લોન ચૂકવવામાં ખર્ચ કરે છે.
આંતરરાષ્ટ્રીય સંસ્થાઓ પાકિસ્તાનને વારંવાર લોન આપે છે. જોકે તેને દરવખતે બેલઆઉટ પેકેજ આપે છે. અત્યાર સુધી આંતરરાષ્ટ્રીય મોનીટરીંગ ફંડ IMF દ્વારા 23 વખત લોન સહાય કરવામાં આવી છે. જેમાંથી કેટલીય લોન પરત ચૂકવવાની બાકી છે.
વિદેશી મુદ્રા ભંડાર લગભગ ખતમ
ભારતના પાડોશી કરતાં દુશ્મન દેશ તરીકે વધુ ઓળખાતા પાકિસ્તાનમાં મોંઘવારી ચરમસીમાએ છે. વિદેશી મુદ્રા ભંડાર લગભગ ખતમ થઈ ગયો છે. તેમ છતાં વિદેશી સંસ્થાઓ તેને કર્જ પેટે લોન આપી રહી છે. ખાસ તો IMF, વિશ્વબેન્ક અને એશિયન ડેવેલોપેમેન્ટ બેન્ક અરબો ડોલરની લોન આપે છે.
રાજનીતિ અને કૂટનીતિના લીધે ફાયદો
શા માટે આટલી મોટી રકમની લોન મળતી હોય છે. તેના જવાબમાં વિદેશી સંસ્થાઓ અને દેશોની રાજનીતિ અને કૂટનીતિ હોવાનું સમજાય છે. પાકિસ્તાનની ભૌગોલિક સ્થિતિ મુજબ ભારત, ચીન અને અફઘાનિસ્તાનની સરહદો જોડાયેલી છે તેથી અમેરિકા અને પશ્ચિમી દેશો કટ્ટરપંથીઓ, આતંકી નેટવર્ક અને ચીનના પ્રભાવ વિરોધી મુદ્દો હોવાને લીધે રકમ આપે છે.
અસ્થિરતાથી આતંકવાદમાં વધારો થવાની ભીતિ
IMF અને અન્ય સંસ્થાઓ એમ માને છે કે, પાકિસ્તાનમાં સામાજિક અને રાજકીય અસ્થિરતા ફેલાઈ જાય તેમ છે. પરિણામે આતંકવાદને પ્રોત્સાહન મળી શકે છે. તેથી કેટલોક સમય ચલાવી રાખવું જોઈએ એમ સમજીને લોન ચાલુ રાખવામાં આવે છે.
