- છેલ્લા આઠ મહિનામાં મારી ઉપર બે વખત હુમલો થયો છેઃ મસ્ક
- સુરક્ષા સેવાના નેતૃત્વએ રાજીનામું આપવું આવશ્યક છે
- અમેરિકાના પૂર્વ રાષ્ટ્રપતિ ડોનાલ્ડ ટ્રમ્પ પર ચૂંટણી રેલી દરમિયાન જીવલેણ હુમલો થયો
અમેરિકાના પૂર્વ રાષ્ટ્રપતિ ડોનાલ્ડ ટ્રમ્પ પર થયેલા જીવણેલ હુમલા બાદ ઈલોન મસ્કે કહ્યું કે, છેલ્લા આઠ મહિનામાં તેમની ઉપર પણ બે વખત હુમલો કરવામાં આવ્યો છે. મસ્કે કહ્યું કે, આવનારો સમય ખુબ જ ખતરનાક હશે. બે લોકો પહેલા જ મને મારી નાખવાનો પ્રયાસ કરી ચૂક્યા છે. ટેસ્લા હેડક્વાર્ટરથી લગભગ 20 મિનિટના અંતરે ટેક્સાસમાં બંદૂકો સાથે તેમની ધરપકડ કરવામાં આવી હતી.
ઈલોન મસ્કે કહ્યું કે હું રાષ્ટ્રપતિ ટ્રમ્પને સંપૂર્ણ સમર્થન આપું છું
અમેરિકાના પૂર્વ રાષ્ટ્રપતિ ડોનાલ્ડ ટ્રમ્પની રેલીમાં ફાયરિંગની ઘટના બાદ ઈલોન મસ્ક સમર્થક તરીકે આગળ આવ્યા છે. આઘાતજનક ગોળીબારના સમાચાર આવ્યાના થોડા સમય બાદ જ મસ્ક આગામી ચૂંટણીમાં ભૂતપૂર્વ રાષ્ટ્રપતિના સમર્થનમાં સોશિયલ મીડિયા પોસ્ટ કરી છે. રેલી દરમિયાન ફાયરિંગની ઘટના બાદ ટ્રમ્પના ચહેરા પર લોહીના ડાઘ જોવા મળ્યા હતા.
સિક્રેટ સર્વિસના વડા અને આ સુરક્ષા ટીમના વડાએ રાજીનામું આપવું જોઈએ
ઈલોન મસ્કે સોશિયલ મીડિયા પોસ્ટમાં કહ્યું, “સિક્રેટ સર્વિસના વડા અને આ સુરક્ષા ટીમના વડાએ રાજીનામું આપવું જોઈએ.” અન્ય ટ્વિટમાં મસ્કે કહ્યું કે, કાં તો આ અસમર્થતા હતી અથવા તે જાણી જોઈને કરવામાં આવેલુ હતું. કોઈપણ રીતે સુરક્ષા સેવાના નેતૃત્વએ રાજીનામું આપવું આવશ્યક છે. ઈલોન મસ્કે કહ્યું કે, હું રાષ્ટ્રપતિ ટ્રમ્પને સંપૂર્ણ સમર્થન આપું છું અને તેઓ ઝડપથી સ્વસ્થ થાય તેવી પ્રાર્થના કરૂ છું.
આ ઘટનાની તપાસ ચાલી રહી છે
ડોનાલ્ડ ટ્રમ્પ પર ફાયરિંગની ઘટનાને ‘હત્યાના પ્રયાસ’ તરીકે જોવામાં આવી રહી છે. આ ઘટના તપાસ ચાલી રહી છે અને સિક્રેટ સર્વિસે ફેડરલ બ્યુરો ઓફ ઈન્વેસ્ટિગેશન (FBI)ને ઔપચારિક રીતે જાણ કરી છે. આ અંગે નિવેદન આપતા FBIએ જણાવ્યું કે, “અમારા કર્મચારીઓ પેન્સિલવેનિયામાં ઘટનાસ્થળ પર છે અને એજન્સી જેમ જેમ તપાસ આગળ વધશે તેમ ગુપ્ત સેવા સાથે મળીને કામ કરવાનું ચાલુ રાખશે.”
