હિન્દુ ધાર્મિક ગ્રંથ રામાયણ પર વિશ્વભરમાં ઘણા બધા કન્ટેન્ટ બનાવવામાં આવી રહ્યા છે. તેમાં કોઈ શંકા નથી કે રામાનંદ સાગરની રામાયણ તેમાંથી સૌથી શ્રેષ્ઠ માનવામાં આવે છે. પરંતુ આ સિવાય ઘણા એવા શો છે જે રામાયણ પર આધારિત છે. આમાં એક જાપાની-ભારતીય એનિમેટેડ ફિલ્મનો પણ સમાવેશ થાય છે. હવે આ ફિલ્મ સંસદમાં બતાવવામાં આવશે. આ એનિમેટેડ ફિલ્મ વિશે વાત કરીએ તો તે 32 વર્ષ પહેલા 1993માં રિલીઝ થઈ હતી. હવે ફિલ્મના પ્રોડક્શન હાઉસ ગીક પિક્ચર્સે આ અંગે ખુશી વ્યક્ત કરી છે અને પ્રતિક્રિયા આપી છે.
આ ફિલ્મ આપણા દેશની સમૃદ્ધ સંસ્કૃતિનો પુરાવો
ગીક પિક્ચર્સના સહ-સ્થાપક અર્જુન અગ્રવાલે આ સ્ક્રીનિંગ પર ખુશી વ્યક્ત કરી અને કહ્યું – ભારતની સંસદના આ પગલાથી અમે ખૂબ જ સન્માનિત અનુભવી રહ્યા છીએ. અમારા કાર્યને આટલા મોટા સ્તરે માન્યતા મળી રહી છે તે જોઈને સારું લાગે છે. આ સ્ક્રીનીંગ ફક્ત એક ફિલ્મનું સ્ક્રીનીંગ નથી પરંતુ તે આપણા દેશની સમૃદ્ધ સંસ્કૃતિનો પુરાવો છે, જેમાં રામાયણની કાલાતીત વાર્તા દર્શાવવામાં આવી છે.
1993માં ફિલ્મ રિલિઝ થઈ હતી
આ ફિલ્મ વિશે વાત કરીએ તો તે 1993માં રિલિઝ થઈ હતી. તેનું દિગ્દર્શન યુગો સાકો, રામ મોહન અને કોઈચી સાસાકી દ્વારા સંયુક્ત રીતે કરવામાં આવ્યું હતું. આ એક જાપાની ફિલ્મ હતી. તે 1993માં રિલીઝ થઈ હતી, પરંતુ આ ફિલ્મ ભારતીય સિનેમાઘરોમાં રિલીઝ થઈ ન હતી. તે 1993માં ભારતીય આંતરરાષ્ટ્રીય ફિલ્મ મહોત્સવમાં દર્શાવવામાં આવ્યું હતું. આ પછી જ્યારે વર્ષ 2000 પછી તે ટીવી પર બતાવવામાં આવ્યું, ત્યારે તે દર્શકોમાં વધુ લોકપ્રિય બન્યું હતું.
ભારતમાં અનેક ભાષાઓમાં રિલિઝ થઈ ફિલ્મ
આ ફિલ્મના હિન્દી વર્ઝનમાં અરુણ ગોવિલે રામનો અવાજ આપ્યો હતો, જ્યારે અમરીશ પુરીએ રાવણનો અવાજ આપ્યો હતો. નમ્રતાએ સીતાનો અવાજ આપ્યો. આમાં, બોલીવુડના દિગ્ગજ અભિનેતા શત્રુઘ્ન સિંહાએ વાર્તાકારની ભૂમિકા ભજવી હતી. હવે 32 વર્ષ પછી આ ફિલ્મનું સ્ક્રીનિંગ સંસદમાં કરવામાં આવશે. 24 જાન્યુઆરી 2025ના રોજ આ ફિલ્મ ભારતમાં હિન્દી, તમિલ, તેલુગુ અને અન્ય ભાષાઓમાં 4K ફોર્મેટમાં રિલિઝ થઈ છે.
