નિવાસી અધિક કલેકટર ચેતન ગાંધીએ કહ્યુ આ બાબત ટેકનિકલ છે, તેની અલગથી ચકાસણી થશે
રાજકોટના લોકમેળામાં સરકારના નવા એસ.ઓ.પી.(નિયમોની ગાઇડલાઇન) મુજબ સિમેન્ટ-કોંક્રિટના ફાઉન્ડેશન પર જ ઉભી કરવાની વાત હતી. આ મામલે વર્ષોથી રાઇડસનો કોન્ટ્રાક્ટ લેતા ધંધાર્થીઓ અને તંત્ર વિરોધ ચાલેલા વિરોધ બાદ રાઇડસના કાયમી સંચાલકોએ ભાગ લીધો ન હતો અને ખાનગી મેળાના રાઇડસના ધંધાર્થીઓને કોન્ટ્રાક્ટ આપ્યા બાદ નવા એસ.ઓ.પી.ને અભેરાઇએ ચડાવી દેવામા આવી છે. લાકડાના ડટ્ટા પર નટ-બોલ્ટ ફીટ કરીને રાઇડસનો માચડો ખડકાઇ રહ્યો છે ત્યારે આજે મેળાની તૈયારીની ચકાસણી કરવા આવેલા એન.આઇ.ડી.એમ.(નેશનલ ઇન્ડિયન ડિઝાસ્ટર મેનેજમેન્ટ)ના નિવાસી અધિક કલેકટર ચેતન ગાંધીએ એવો ઉડાઉ જવાબ આપ્યો હતો કે, રાઇડસ બાબત ટેકનિકલ વિષય છે. તેની અલગથી ચકાસણી થશે.
રેસકોર્સમાં લોકમેળાની તડામાર તૈયારીઓ ચાલી રહી છે. સ્ટોલ ઉભા થઇ રહ્યા છે સાથે રાઇડસ નાખવાનું કામ ચાલુ છે. જ્યારે આકસ્મિક કે માનવસર્જિત આગ જેવી દૂઘર્ટના સામે મેળામાં સલામતી માટેની શું વ્યવસ્થા છે? સરકારની નવી ગાઇડલાઇનું પાલન થયુ છે કે કેમ? અન્ડર ગ્રાઉન્ડ કેબલનું નેટવર્ક કઇ રીતે નખાયુ છે? એન્ટ્રી-એકઝિટ ગેટ કેટલા છે? એ સહિતની ચકાસણી માટે એન.આઇ.ડી.એમ.ની ટીમ રેસકોર્સ મેળાના મેદાનમાં આવી હતી.
આ તકે પત્રકારોએ એવુ પુછયુ હતુ કે, ડિઝાસ્ટર માટેની સલામતીની બાબત તો છે જ પણ જે મુખ્ય પ્રશ્ન એ છે કે, સરકારની એવી સ્પષ્ટ નવી ગાઇડલાઇન છે કે, યાંત્રિક રાઇડ્સ સિમેન્ટ-કોંક્રિટના ફાઉન્ડેશનમાં ઉભી કરવી ફરજિયાત છે ત્યારે અહીં તો લાકડાના ડટ્ટા પર નટ-બોલ્ટ ફીટ કરીને રાઇડ્સનો માચડો ઉભો થઇ રહ્યો છે એ બાબતે શું કહેવુ છે? આ સવાલ સામે નિવાસી અધિક કલેકટર ચેતન ગાંધીએ એવો જવાબ આપ્યો હતો કે, આ ટેકનીકલ બાબત છે. તેની ચકાસણી અલગથી થશે.
