બનાસકાંઠા જિલ્લામાંથી પસાર થતા ડીસા-રાધનપુર હાઈવે પર એક ભયાનક માર્ગ અકસ્માતની ઘટના સામે આવી છે, જેમાં એક ટ્રેલરચાલકનું કરુણ મોત નિપજ્યું છે. આ અકસ્માતની સમગ્ર ઘટનાના CCTV ફૂટેજ પણ સામે આવ્યા છે, જેની દ્રશ્યો ચોંકાવનારા છે.
થરા બ્રિજ પર સર્જાઈ દુર્ઘટના
પ્રાપ્ત માહિતી અનુસાર, આ દુર્ઘટના થરા બ્રિજ ઉતરતી વખતે બની હતી. હાઈવે પર આગળ જઈ રહેલા એક ડમ્પરની પાછળ પૂરપાટ ઝડપે આવી રહેલું એક ટ્રેલર ધડાકાભેર ઘૂસી ગયું હતું. અકસ્માત એટલો જોરદાર હતો કે ટ્રેલરના આગળના ભાગનો કચ્ચરઘાણ નીકળી ગયો હતો અને ટ્રેલરચાલક કેબિનમાં ગંભીર રીતે ફસાઈ ગયો હતો. ટ્રેલરચાલકને ગંભીર ઈજાઓ થવાના કારણે તેનું ઘટનાસ્થળે જ કમકમાટીભર્યું મોત નીપજ્યું હતું.
લોકોના ટોળાં ઉમટ્યા, પોલીસ પહોંચી
આ ગમખ્વાર ઘટનાના પગલે આસપાસના લોકોના ટોળેટોળાં ઘટનાસ્થળે ઉમટી પડ્યા હતા. લોકોએ તાત્કાલિક પોલીસને જાણ કરી હતી. અકસ્માતની જાણ થતાં જ પોલીસ ટીમ ઘટનાસ્થળે પહોંચી હતી અને મૃતકના મૃતદેહને બહાર કાઢવાની તેમજ કાયદેસરની કાર્યવાહી હાથ ધરી હતી. પોલીસે અકસ્માત સર્જનાર ડમ્પરચાલક વિરુદ્ધ ગુનો નોંધીને વધુ તપાસ શરૂ કરી છે.
આ પણ વાંચો: વીજવાયર ચોરતી ગેંગ સક્રિય, પોલીસે એક યુવાનને ઝડપી પાડ્યો
