- પંજાબ પ્રાંતમાં સ્થિત મિયાંવલી એરબેઝને નિશાન બનાવ્યું
- આતંકવાદીઓને આશ્રય આપનાર પાકિસ્તાન મુશ્કેલમાં
- બલૂચિસ્તાનમાં આતંકીઓએ સેનાના બે વાહનો પર કર્યો હુમલો
પાકિસ્તાનમાં ફરી એકવાર મોટો આતંકી હુમલો થયો છે. આ વખતે આતંકવાદીઓએ પંજાબ પ્રાંતમાં સ્થિત મિયાંવલી એરબેઝને નિશાન બનાવ્યું છે. આ સિવાય બલૂચિસ્તાનમાં ઘૂસી આવેલા આતંકીઓએ સેનાના બે વાહનો પર પણ હુમલો કર્યો છે. આ હુમલામાં 14 જવાનો શહીદ થયા છે.
આતંકવાદીઓને આશ્રય આપનાર પાકિસ્તાન મુશ્કેલમાં
આતંકવાદીઓને આશ્રય આપનાર પાકિસ્તાન આજે ખુદ હુમલાઓનો સામનો કરી રહ્યું છે. શનિવારે સવારે, ભારે હથિયારોથી સજ્જ આતંકવાદીઓએ પંજાબ પ્રાંતમાં પાકિસ્તાની વાયુસેનાના મિયાંવાલી એરબેઝ પર હુમલો કર્યો. હુમલા દરમિયાન આતંકીઓએ એરબેઝ પર ઉભેલા ત્રણ ફાઈટર પ્લેનને પણ આગ લગાવી દીધી હતી. પાકિસ્તાની સેનાના જણાવ્યા અનુસાર, આતંકી સંગઠન તહરીક-એ-જેહાદ પાકિસ્તાન (TJP)એ આ હુમલાની જવાબદારી લીધી છે.
તહરીક-એ-જેહાદ પાકિસ્તાન (TJP) એ એક નવું ઉભરેલું આતંકવાદી જૂથ છે જે તહરીક-એ-તાલિબાન પાકિસ્તાન (TTP) સાથે જોડાયેલ હોવાનું માનવામાં આવે છે. થોડા મહિના પહેલા આ જ સંગઠને પાકિસ્તાનના બલૂચિસ્તાન રાજ્યના મુસ્લિમ બાગ વિસ્તારમાં એફસી (ફ્રન્ટિયર કોન્સ્ટેબલરી) કેમ્પ પર હુમલાની જવાબદારી પણ લીધી હતી.
આ સંગઠને બલૂચિસ્તાનમાં અનેકવાર હુમલાઓ કર્યા
સંગઠન અંગે કહેવામાં આવી રહ્યું છે કે પાકિસ્તાન માટે તે નવું છે. આ સંગઠને પ્રથમ વખત બલૂચિસ્તાનના ચમનમાં થયેલા આતંકી હુમલાની જવાબદારી લીધી હતી. આશ્ચર્યની વાત એ છે કે પાકિસ્તાનની જાસૂસી સંસ્થા પણ હજુ સુધી આ સંગઠન વિશે વધુ માહિતી એકઠી કરી શકી નથી. પાકિસ્તાની ગુપ્તચર એજન્સી પાસે પણ સંગઠનના પ્રવક્તા અને ચીફના નામ સાથે જોડાયેલી માહિતી નથી. આ લોકોએ ભૂતકાળમાં શું કર્યું અને તેઓ કઈ સંસ્થા સાથે સંકળાયેલા હતા તે પણ જાણી શકાયું નથી. સંગઠનના પ્રવક્તાનું નામ મુલ્લા મોહમ્મદ કાસિમ હોવાનું કહેવાય છે. કાસિમ હજુ સુધી ન તો મીડિયા સામે દેખાયો અને ન તો કોઈની સાથે વાત કરી. જ્યારે સંગઠન દ્વારા હુમલા કરવામાં આવે છે, ત્યારે કાસિમ લેખિત સંદેશ મોકલીને જવાબદારી લે છે.
તહરીક-એ-તાલિબાન સાથે સંબંધો હોઈ શકે છે
આ સંગઠને મિયાંવાલી એરબેઝ સહિત કેટલાક હુમલાની જવાબદારી લીધી છે. આ હુમલાઓમાં ખૈબર પખ્તુનખ્વાના સ્વાત જિલ્લામાં આતંકવાદી હુમલો પણ સામેલ છે, જેમાં કુલ 17 લોકો માર્યા ગયા હતા. કેટલાક લોકો માને છે કે સંગઠન તહરીક-એ-તાલિબાન પાકિસ્તાન અથવા અલ-કાયદા સાથે સંબંધ ધરાવે છે, જે પાકિસ્તાનમાં ગેરકાયદેસર જાહેર કરાયેલ સંગઠન છે, પરંતુ તેના નેતા ક્યાં રહે છે અને તે પહેલા શું કરતો હતો તે વિશે કોઈ માહિતી નથી.
સૈનિકોના વાહન પર ઓચિંતો હુમલો
એરબેઝ પર હુમલા ઉપરાંત, આતંકવાદીઓએ બલૂચિસ્તાનમાં સુરક્ષા દળોના બે વાહનો પર પણ હુમલો કર્યો હતો, જેમાં ઓછામાં ઓછા 14 સૈનિકો માર્યા ગયા હતા. બલૂચિસ્તાનમાં આ હુમલાને અત્યાર સુધીનો સૌથી મોટો આતંકી હુમલો માનવામાં આવી રહ્યો છે કારણ કે આ હુમલામાં સૌથી વધુ પાકિસ્તાની સૈનિકો માર્યા ગયા છે. પાકિસ્તાની સેના દ્વારા જારી કરવામાં આવેલા નિવેદન અનુસાર, આતંકવાદીઓએ આ હુમલો એવા સમયે કર્યો જ્યારે સૈનિકો બે વાહનોમાં પસનીથી ગ્વાદર જિલ્લાના ઓરમારા વિસ્તારમાં જઈ રહ્યા હતા.
