દર વર્ષના છેલ્લા મહિનામાં, ગૂગલ પોતાનો સર્ચ રિપોર્ટ બહાર પાડે છે, જેમાં જણાવવામાં આવે છે કે છેલ્લા 12 મહિનામાં લોકોએ સર્ચ એન્જિન પર કોને સૌથી વધુ સર્ચ કર્યા છે. આશ્ચર્યજનક રીતે, 2025 માં ગૂગલ પર સૌથી વધુ સર્ચ કરાયેલા ટોપના 10 ભારતીય ક્રિકેટરોની યાદીમાંથી બંને સ્ટાર્સ, રોહિત શર્મા અને વિરાટ કોહલીના નામ ગાયબ છે.
2025 માં ગુગલ પર સૌથી વધુ સર્ચ કરાયેલા ભારતીય ક્રિકેટરો
વૈભવ સૂર્યવંશી
IPL 2025 દરમિયાન પ્રસિદ્ધિ મેળવનાર વૈભવ સૂર્યવંશી T20 ઇતિહાસમાં સદી ફટકારનાર સૌથી યુવા ખેલાડી બન્યો અને અંડર-19 એશિયા કપમાં રેકોર્ડબ્રેક 171 રન બનાવ્યા. તે એકંદરે સૌથી વધુ સર્ચ કરાયેલ ભારતીય છે અને આ વર્ષે રોહિત શર્મા અને વિરાટ કોહલીને પાછળ છોડીને વિશ્વભરમાં છઠ્ઠા ક્રમે છે.
પ્રિયાંશ આર્ય
દિલ્હી પ્રીમિયર લીગ દરમિયાન એક ઓવરમાં 6 છગ્ગા ફટકાર્યા બાદ પ્રિયાંશ આર્યએ ધ્યાન ખેંચ્યું હતું , અને ત્યારબાદ પંજાબ કિંગ્સ માટે શાનદાર IPL સીઝન રહી હતી. આના કારણે તે સૌથી વધુ સર્ચ કરાયેલા ભારતીય ક્રિકેટરોની યાદીમાં બીજા સ્થાને પહોંચી ગયો છે.
અભિષેક શર્મા
અભિષેક શર્માએ આ વર્ષે ટીમ ઈન્ડિયાના ટોપના વિસ્ફોટક ઓપનર તરીકે પોતાનું સ્થાન મજબૂત બનાવ્યું. તે વિશ્વનો નંબર 1 T20 આંતરરાષ્ટ્રીય બેટ્સમેન બન્યો અને આ વર્ષે પાકિસ્તાનમાં સૌથી વધુ સર્ચ કરાયેલ ખેલાડી પણ બન્યો. અભિષેકે આ વર્ષે ભારતને ઘણી મેચ જીતવામાં મદદ કરી છે.
શૈખ રશીદ
શેખ રશીદ એક યુવા ભારતીય પ્રતિભા છે જેણે આ વર્ષે ચેન્નાઈ સુપર કિંગ્સ માટે ઇન્ડિયન પ્રીમિયર લીગમાં પ્રવેશ કર્યો હતો. નાણાકીય મુશ્કેલીઓ હોવા છતાં, તેણે વ્યાવસાયિક ક્રિકેટમાં પ્રવેશ કર્યો. તેની પ્રેરણાદાયી વાર્તાએ તેને આ વર્ષની સર્ચ લિસ્ટમાં ચોથા ક્રમે મૂક્યો છે.
જેમિમાહ રોડ્રિગ્સ
જેમીમા રોડ્રિગ્સે આ વર્ષે ચેમ્પિયન પ્રદર્શન કર્યું. મહિલા વર્લ્ડ કપ 2025ની સેમિફાઇનલમાં તેણે ઓસ્ટ્રેલિયા સામે મેચ વિજેતા સદી ફટકારી, ભારતીય ક્રિકેટ ફેન્સના હૃદયમાં સ્થાન મેળવ્યું. આ પ્રદર્શનથી ભારતને પહેલીવાર ODI મહિલા વર્લ્ડ ચેમ્પિયન બનવામાં મદદ મળી.
આયુષ મ્હાત્રે
આયુષ મ્હાત્રેએ આ વર્ષે મુંબઈ માટે ઘરેલુ ક્રિકેટમાં સારું પ્રદર્શન કર્યું છે. 18 વર્ષીય ખેલાડીને 2025ની IPL સીઝનમાં ચેન્નાઈ સુપર કિંગ્સ તરફથી રમવાની પહેલી તક મળી, જ્યાં તેણે પોતાની પ્રતિભા દર્શાવી. તેણે અંડર-19 એડિશા કપમાં યુવા ભારતીય ટીમનું નેતૃત્વ પણ કર્યું.
સ્મૃતિ મંધાના
સ્મૃતિ મંધાનાને કોઈ પરિચયની જરૂર નથી, છતાં આ વર્ષે તે આ યાદીમાં 7મા ક્રમે છે. આખા વર્ષ દરમિયાન તેણે રેકોર્ડબ્રેક બેટિંગ દર્શાવી. વધુમાં, તેની સગાઈ અને તૂટેલા લગ્નની ચર્ચાઓને કારણે સમાચારમાં રહી.
કરુણ નાયર
ભારત માટે ટેસ્ટ ક્રિકેટમાં 300 રન બનાવી ચૂકેલા, તેમણે 2025માં રણજી ટ્રોફી અને વિજય હજારે ટ્રોફીમાં સતત સદીઓ ફટકારી. તેઓ ભારતીય ટેસ્ટ ટીમમાં પાછા ફર્યા અને વારંવાર ગુગલ પર સર્ચ કરનારા બન્યા.
ઉર્વિલ પટેલ
360ડિગ્રી હિટર તરીકે જાણીતા ઉર્વિલ પટેલ સ્થાનિક T20 ટુર્નામેન્ટમાં પોતાની ફિનિશિંગ ક્ષમતા માટે પ્રખ્યાત બન્યા છે. ક્રિકેટ ફેન્સે તેમની સરખામણી દક્ષિણ આફ્રિકાના દિગ્ગજ બોલર એબી ડી વિલિયર્સ સાથે પણ કરી છે.
વિગ્નેશ પુથુર
આ યાદીમાં 10મા ક્રમે વિગ્નેશ પુથુર છે, જે પોતાની અનોખી લેફ્ટ હેન્ડની કાંડા સ્પિન બોલિંગ એક્શન અને શાનદાર IPL સીઝનના કારણે વાયરલ સેન્સેશન બન્યો હતો. તે ગુગલ પર સૌથી વધુ સર્ચ કરાયેલ ખેલાડી બન્યો.
