વર્ષ 2025માં વિશ્વ કુદરતી આફતોથી હચમચી ગયું હતું. ભૂકંપ, સુનામી, ચક્રવાત અને પૂરે હજારો લોકોના જીવ લીધા હતા અને ઘણા દેશોમાં તબાહી મચાવી હતી. આ આફતોએ હજારો લોકોના જીવ લીધા અને કરોડોની સંપત્તિને નુકસાન પહોંચાડ્યું. ઘણી જગ્યાએ, શહેરો તબાહ થઈ ગયા, લોકો બેઘર થઈ ગયા અને સામાન્ય જનજીવન ભારે ખોરવાઈ ગયું. ત્યારે આ અહેવાલમાં વાત એ ઘટનાઓની જેને દેશને હતપ્રભ કરી દીધો હતો.
અફઘાનિસ્તાનમાં બે ગોઝારા ભૂકંપ
વર્ષ 2025માં, અફઘાનિસ્તાનના બે અલગ અલગ વિસ્તારોમાં બે ગંભીર ભૂકંપ આવ્યા હતા, જેમાં આશરે 2000 લોકો માર્યા ગયા હતા. આ ભૂકંપની તીવ્રતા આશરે 6.0 હતી. પહેલો ભૂકંપ કુનાર પ્રાંતમાં આવ્યો હતો, અને તેના થોડા સમય પછી, ઉત્તર અફઘાનિસ્તાનના બલ્ખ પ્રાંતમાં 6.2 ની તીવ્રતાનો બીજો ભૂકંપ આવ્યો, જેના કારણે વ્યાપક વિનાશ સર્જાયો હતો.
મ્યાનમારમાં નોંધાયો વિનાશક ભૂકંપ
મ્યાનમારના લોકો પણ વિનાશક ભૂકંપનો ભોગ બન્યા હતા. 28 માર્ચ, 2025ના રોજ મ્યાનમારના સાગાઈંગ પ્રદેશમાં 7.7 થી 7.9ની તીવ્રતાનો વિનાશક ભૂકંપ આવ્યો હતો. આ ભૂકંપ એટલો શક્તિશાળી હતો કે તેની અસર થાઇલેન્ડ, વિયેતનામ અને ચીન જેવા પડોશી દેશો સુધી અનુભવાઈ હતી. આ આપદામાં હજારો લોકો મૃત્યુ પામ્યા અને શહેરોના શહેરો તબાહ થઈ ગયા હતા.
US બન્યું મેલિસા વાવાઝોડાનું શિકાર
2025 માં યુનાઇટેડ સ્ટેટ્સમાં ત્રાટકેલું વાવાઝોડું મેલિસા એટલું શક્તિશાળી હતું કે તેના આંચકા ભૂગર્ભમાં ઊંડા અનુભવાયા હતા. તે તેની તીવ્રતા અને વિનાશકતા માટે વિશ્વભરમાં ચર્ચાનો વિષય બન્યું હતું. આ વાવઝોડાએ સ્થાનિકોનું જીવન વેરવિખેર કરી નાંખ્યું હતું.
ભારતે ભયંકર પૂરનો કર્યો સામનો
ભારતને 2025માં ભયંકર પૂરનો સામનો કરવો પડ્યો હતો, જેમાં પંજાબ, હરિયાણા અને હિમાચલ પ્રદેશ જેવા રાજ્યો ખરાબ રીતે પ્રભાવિત થયા હતા. સતલજ અને બિયાસ નદીઓ પરના બંધ તૂટવાથી સેંકડો ગામો પૂરના પાણીમાં ડૂબી ગયા હતા. હજારો વિઘા જમીનમાં ખેડૂતોના ઉભા પાકનો નાશ થયો હતો અને પશુધનને ભારે અસર પહોંચી હતી. આ પૂરમાં સૌથી વધુ જગતના તાતને નુકસાન સહન કરવું પડ્યું હતું.
ચક્રવાત ડિટવાહે ભારતમાં મચાવી તબાહી
ભારતમાં, 2025ના અંતમાં શ્રીલંકા અને દક્ષિણ ભારતના રાજ્યો જેવા કે તમિલનાડુ અને આંધ્રપ્રદેશમાં ચક્રવાત ડિટવાહે વિનાશ વેર્યો હતો. ભારે વરસાદ અને પૂરને કારણે અહીં લાખો લોકો તેમના ઘર છોડીને બેઘર થયા હતા. અહીં પણ જગતના તાતને ભારે નુકસાન સહન કરવાનો વારો આવ્યો હતો.
રશિયામાં સમુદ્ર નજીક શક્તિશાળી ભૂકંપ
રશિયાના કામચટકા દ્વીપકલ્પ નજીક સમુદ્રમાં 8.8 ની તીવ્રતાનો ભૂકંપ આવ્યો, જે 2011 પછીનો સૌથી શક્તિશાળી માનવામાં આવે છે. ભૂકંપથી આસપાસના વિસ્તારમાં ધ્રુજારી આવી ગઈ હતી અને સુનામીની ચેતવણી જારી કરવામાં આવી હતી. કેટલીક જગ્યાએ દરિયામાં 3 થી 4 મીટર ઊંચા મોજા ઉછળ્યા હતા, જેનાથી દરિયાકાંઠાના વિસ્તારો માટે મોટું જોખમ સર્જાયું હતું.
