- રાજધાનીમાં સવારે ધુમ્મસ અને સાંજે વરસાદના કારણે હાલાકી
- રેલવેની સ્પીડ ઘટી ગઈ તો ફ્લાઇટ ઓપરેશન્સમાં પણ તકલીફ
- 331 ફ્લાઈટ્સ મોડી પડતાં મુસાફરોની તકલીફમાં વધારો થયો
દિલ્હીમાં સવારે ધુમ્મસ અને સાંજે વરસાદના કારણે ટ્રાફિક વ્યવસ્થાને માઠી અસર થઈ હતી. જ્યારે રેલ્વે ટ્રેક પર ટ્રેનોની સ્પીડ પણ ઘટી ગઈ હતી તો એરપોર્ટ રનવે પર ફ્લાઇટ્સના સંચાલનમાં પણ ઘણી મુશ્કેલીઓ પડી હતી. બુધવારે દિલ્હી આવતી 70 થી વધુ ટ્રેનોની અવરજવરને અસર થઈ હતી. ધુમ્મસ અને ખરાબ હવામાને મોટાભાગના વિમાનોને અસર કરી હતી.
ખરાબ હવામાનની ટ્રેન અને ફ્લાઈટ પર અસર
દિલ્હી એરપોર્ટ પરથી ઓપરેટ થતી 331 ફ્લાઈટ્સ ઘણી મોડી પડી હતી. જેમાં 260થી વધુ ડોમેસ્ટિક ફ્લાઇટ્સનો સમાવેશ થાય છે. વરસાદના કારણે સાંજે 5 થી 6 દરમિયાન પ્લેન ઓપરેટ કરવામાં ઘણી મુશ્કેલી પડી હતી. જેના કારણે મુસાફરોને મુશ્કેલીનો સામનો કરવો પડ્યો હતો.
ઉત્તર ભારતમાં ધુમ્મસ અને ઠંડીથી લોકોને રાહત નથી મળી રહી, હવે વરસાદના કારણે ટ્રાફિક વ્યવસ્થા પણ પ્રભાવિત થઈ રહી છે. બુધવારે દિલ્હી એરપોર્ટ પરથી ઘણા વિમાનો 3-4 કલાક મોડા પડ્યા હતા.
શ્રીનગર જતી ફ્લાઈટ SG-8473 સવારે 8 વાગ્યાને બદલે 1:22 વાગ્યે ટેકઓફ કરી શકી હતી. એ જ રીતે, પટના માટે SG-8721 ફ્લાઇટ સવારે 8:30 વાગ્યાને બદલે બપોરે 12 વાગે ઉપાડી હતી. આ ઉપરાંત શ્રીનગર, ગોવા, અમદાવાદ, જયપુર સહિત અનેક સ્થળો માટે ઊપડતી ફ્લાઇટ્સ ઘણા વિલંબ સાથે સંચાલિત થઈ હતી.
ગાઢ ધુમ્મસના કારણે ટ્રેનોની સ્પીડ પણ ઘટી છે. ઉત્તર ભારતમાં મોટાભાગની ટ્રેનો પ્રભાવિત થઈ રહી છે. ભુવનેશ્વર રાજધાની, ડિબ્રુગઢ રાજધાની, રાજેન્દ્ર નગર રાજધાની, સિયાલદાહ રાજધાની સહિત 70 થી વધુ ટ્રેનો કલાકો મોડી તેમના ગંતવ્ય સ્થાને પહોંચી હતી.
આ ઉપરાંત વૈશાલી, સપ્તક્રાંતિ, સત્યાગ્રહ, રીવા, કૈફિયાત, કામાખ્યા-દિલ્હી, હૈદરાબાદ-નવી દિલ્હી, બનારસ-નવી દિલ્હી એક્સપ્રેસ પણ મોડી પડી હતી. જેના કારણે મુસાફરોને ભારે હાલાકીનો સામનો કરવો પડ્યો હતો.
