- હેલ્થકેર સિસ્ટમને મજબૂત કરવા 24,253 કરોડ ફંડ આપ્યું
- હેલ્થ સિસ્ટમ પ્રીપેર્ડનેસ પેકેજ હેઠળ UPને સૌથી વધુ રૂ. 2,860 કરોડ ફ્ંડ મળ્યું
- પરિવાર કલ્યાણ મંત્રી મનસુખ માંડવિયાએ આ માહિતી સંસદને આપી હતી
કોરોના મહામારીએ ભારતમાં હેલ્થકેર સિસ્ટમને મજબુત કરવાની જરૂરિયાતને ઉજાગર કરી હતી. કોવિડ બાદ ભારત સરકારે નેશનલ હેલ્થ મિશન (NHM) હેઠળ ઇન્ડિયા કોવિડ-19 ઇમરજન્સી રિસ્પોન્સ એન્ડ હેલ્થ સિસ્ટમ પ્રીપેર્ડનેસ પેકેજ અંતર્ગત દેશના રાજ્યો અને કેન્દ્ર શાસિત પ્રદેશોને 2021-24 દરમિયાન રૂ. 24,253.26 કરોડનું ફ્ંડ આપ્યું છે. આ ફ્ંડમાંથી ગુજરાતને બે તબક્કામાં રૂ. 866 કરોડનું ફ્ંડ અપાયું છે. ગુજરાતના સાંસદ પૂનમ માડમ અને મહારાષ્ટ્રના સાંસદ રામદાસ તડસે પૂછેલા સવાલના જવાબમાં સ્વાસ્થ્ય અને પરિવાર કલ્યાણ મંત્રી મનસુખ માંડવિયાએ આ માહિતી સંસદને આપી હતી.
સંસદમાં રજુ થયેલી માહિતી મુજબ ECRP પેકેજ અને આયુષ્માન ભારત હેલ્થ ઇન્ફ્રાસ્ટ્રક્ચર મિશન હેઠળ રાજ્યો અને કેન્દ્ર શાસિત પ્રદેશોને વર્ષ 2021-2024 દરમિયાન બે તબક્કામાં ફ્ંડ અપાયું છે. સૌથી વધુ રૂ. 2860 કરોડનું ફ્ંડ ઉત્તર પ્રદેશને અપાયું છે. આ ઉપરાંત મહારાષ્ટ્રને રૂ. 2,090 કરોડ અને તમિલનાડુ 1,709 કરોડ અપાયા છે.
મનસુખ માંડવિયાએ જવાબમાં કહ્યું હતું કે, ભાવિ રોગચાળા અને આરોગ્ય કટોકટીનો સામનો કરવા માટે દેશને વધુ સારી રીતે તૈયાર કરવા માટે કેન્દ્ર સરકાર રાજ્યોને તેમની ક્ષમતાઓ વધારવા જરૂરી સહાય પૂરી પાડે છે. નવા રોગોની ઓળખ કરવા અને તેની સામે પ્રાથમિક, માધ્યમ અને વિશેષ આરોગ્ય સવલતો ઉભી કરવા તેમજ કટોકટીની સ્થિતિને પહોચી વળવા દેશને લાંબાગાળા માટે તૈયાર કરવા વિવિધ યોજનાઓ લાગુ કરવામાં આવી છે.
