140 કરોડ ભારતીય ફેન્સના દિલ તૂટી ગયા છે. વિરાટ કોહલીએ અચાનક પોતાના મનપસંદ ફોર્મેટને અલવિદા કહી દીધું છે. વિરાટ કોહલીએ તેની 14 વર્ષની લાંબી કારકિર્દી પર પૂર્ણવિરામ મૂકી દીધો છે.
વિરાટે તેના ઈન્સ્ટાગ્રામ એકાઉન્ટ પર એક ઈમોશનલ પોસ્ટ શેર કરી. પરતુ એક ટેસ્ટ બેટ્સમેન અને કેપ્ટન તરીકે, વિરાટ કોહલીએ દરેક મોટી સિદ્ધિ હાંસલ કરી છે જેનું એક ખેલાડી સ્વપ્ન જુએ છે. બેટિંગની સાથે સાથે, વિરાટે પોતાની કેપ્ટનશીપ હેઠળ ઈંગ્લેન્ડ, ઓસ્ટ્રેલિયા જેવી મોટી ટીમોના ઘરમાં પ્રવેશ કર્યો અને ટેસ્ટ સિરીઝ જીતી. હવે વિરાટની નિવૃત્તિ પર ટીમ ઈન્ડિયાના મુખ્ય કોચ ગૌતમ ગંભીરની પ્રતિક્રિયા સામે આવી છે.
વિરાટ કોહલીની નિવૃત્તિ પર ગંભીરે શું કહ્યું?
વિરાટ કોહલીના ટેસ્ટ ક્રિકેટમાંથી નિવૃત્તિ બાદ, ગૌતમ ગંભીરે તેના સોશિયલ મીડિયા એકાઉન્ટ પર સ્ટાર બેટ્સમેન માટે એક પોસ્ટ લખી. ગંભીરે લખ્યું છે કે “સિંહ જેવો આત્મા ધરાવતો માણસ. અમને તમારી ખૂબ યાદ આવશે. ચિક્સ.” ગંભીરની દેખરેખ હેઠળ ટીમ ઈન્ડિયાએ આ વર્ષે ફેબ્રુઆરીમાં ચેમ્પિયન્સ ટ્રોફીનો ખિતાબ જીત્યો હતો.
આ ટુર્નામેન્ટમાં કોહલીનું બેટ જોરથી બોલ્યું. કોહલીએ 5 મેચમાં 218 રન બનાવ્યા. પરંતુ વિરાટ લાંબા સમયથી ટેસ્ટમાં ફોર્મ સાથે સંઘર્ષ કરી રહ્યો હતો. ન્યુઝીલેન્ડ સામે રમાયેલી ઘરઆંગણેની સિરીઝમાં કોહલી મોટો ફ્લોપ રહ્યો હતો. બોર્ડર-ગાવસ્કર ટ્રોફીમાં પણ વિરાટનું બેટ સંપૂર્ણપણે શાંત રહ્યું.
કોહલીએ ઈમોશનલ પોસ્ટ સાથે લીધી નિવૃત્તિ
વિરાટ કોહલીએ પોતાના ઈન્સ્ટાગ્રામ પર એક ઈમોશનલ પોસ્ટ લખી. તેને લખ્યું છે કે “મેં 14 વર્ષ પહેલાં ટેસ્ટ ક્રિકેટમાં આ જર્સી પહેરી હતી. પ્રામાણિકપણે, મેં ક્યારેય વિચાર્યું ન હતું કે આ ફોર્મેટ મને આટલી ઊંચાઈએ લઈ જશે. આ ફોર્મેટે મારી કસોટી કરી, મારી કારકિર્દીને આકાર આપ્યો અને મને ઘણા પાઠ શીખવ્યા જે હું મારા ભવિષ્યના જીવનમાં યાદ રાખીશ. વ્હાઈટ જર્સીમાં રમવું મારા માટે વ્યક્તિગત રીતે ખૂબ જ ખાસ રહ્યું છે. શાંતિથી સખત મહેનત કરવી, લાંબા દિવસો, નાની ક્ષણો જે કોઈ જોતું નથી, પરંતુ તે હંમેશા તમારી સાથે રહે છે.”
કોહલીએ આગળ લખ્યું છે કે “હું આ ફોર્મેટથી દૂર થઈ રહ્યો છું અને તે મારા માટે સરળ નથી. પરંતુ આ સમયે તે યોગ્ય લાગે છે. મેં આ ફોર્મેટમાં મારી પાસે જે કંઈ હતું તે બધું આપ્યું અને બદલામાં મને આ ફોર્મેટમાંથી ઘણું બધું મળ્યું, જેની મને કદાચ અપેક્ષા પણ ન હતી. હું આ ફોર્મેટને અલવિદા કહી રહ્યો છું, પરંતુ મારું દિલ કૃતજ્ઞતાથી ભરેલું છે. આ રમતનો અને જેમની સાથે મેં મેદાન શેર કર્યું છે તે લોકોનો, તેમજ આ માર્ગ પર મારી સાથે ચાલનારા બધાનો આભાર. હું હંમેશા મારા ટેસ્ટ કારકિર્દીને સ્મિત સાથે જોઈશ.”
