- ભારત અને ઈંગ્લેન્ડ વચ્ચે ત્રીજી ટેસ્ટ મેચ રાજકોટના સ્ટેડિયમ ખાતે રમાશે
- ભારત અને ઈંગ્લેન્ડના ખેલાડીઓને બ્રેક આપવામાં આવ્યો
- BCCIએ કેપ્ટન રોહિત શર્મા સહિત તમામ ખેલાડીઓને આદેશ આપ્યો
ભારત અને ઈંગ્લેન્ડ વચ્ચે પાંચ મેચોની સિરીઝની ત્રીજી ટેસ્ટ મેચ 15 ફેબ્રુઆરીથી રાજકોટના સૌરાષ્ટ્ર ક્રિકેટ એસોસિએશન સ્ટેડિયમ ખાતે રમાશે. સિરીઝની બીજી ટેસ્ટ મેચ 5 ફેબ્રુઆરીએ સમાપ્ત થઈ હતી. બીજી ટેસ્ટ મેચ 2 થી 6 ફેબ્રુઆરી વચ્ચે યોજાવાની હતી, પરંતુ ચોથા દિવસે જ ભારતે ઈંગ્લેન્ડ સામે 106 રને જીત મેળવી હતી. સિરીઝ હાલમાં 1-1 થી બરાબર છે. ઈંગ્લેન્ડે હૈદરાબાદ ટેસ્ટ મેચ 28 રને જીતી લીધી હતી.
ભારત અને ઈંગ્લેન્ડના ખેલાડીઓને બ્રેક આપવામાં આવ્યો
વિશાખાપટ્ટનમ ટેસ્ટ અને રાજકોટ ટેસ્ટ વચ્ચે લગભગ 10 દિવસનું અંતર હતું, જેના કારણે ભારત અને ઈંગ્લેન્ડના ખેલાડીઓને બ્રેક આપવામાં આવ્યો છે. ઇંગ્લેન્ડના ખેલાડીઓ તેમના પરિવાર સાથે સમય પસાર કરવા માટે અબુ ધાબી પહોંચી ગયા છે, જ્યારે રોહિત શર્મા અને કંપની પણ થોડા દિવસો માટે બ્રેક પર છે. ભારતીય ક્રિકેટ કંટ્રોલ બોર્ડ (BCCI), જોકે, તમામ ખેલાડીઓને ત્રીજી ટેસ્ટ માટે 11 ફેબ્રુઆરીએ રાજકોટમાં ભેગા થવા જણાવ્યું છે.
BCCIએ આપ્યો આદેશ
બાકીની ત્રણ ટેસ્ટ મેચ માટે પણ આજે ભારતીય ટીમની જાહેરાત થઈ શકે છે. BCCIએ કેપ્ટન રોહિત શર્મા સહિત તમામ ખેલાડીઓને રાજકોટ ટેસ્ટ પહેલા 11મી ફેબ્રુઆરીએ રાજકોટ પહોંચવાનો આદેશ આપ્યો છે. વિરાટ કોહલી સિરીઝની પ્રથમ બે મેચ માટે ટીમનો ભાગ નહોતો, તેણે BCCI પાસેથી બ્રેક માંગ્યો હતો, જ્યારે કેએલ રાહુલ અને રવિન્દ્ર જાડેજા સિરીઝની પ્રથમ ટેસ્ટ દરમિયાન ઈજાગ્રસ્ત થયા હતા.
આ ખેલાડીઓની થઇ શકે છે વાપસી
એવું માનવામાં આવે છે કે કેએલ રાહુલ અને રવિન્દ્ર જાડેજા બંને રાજકોટ ટેસ્ટ માટે ટીમમાં પરત ફરશે, પરંતુ વિરાટ કોહલીને લઈને હજુ પણ સસ્પેન્સ છે. જો કેએલ રાહુલ અને રવીન્દ્ર જાડેજા ટીમમાં પાછા ફરે છે, તો તેનાથી ભારતીય ક્રિકેટ ટીમને મોટો પ્રોત્સાહન મળશે, કારણ કે આ બંનેએ પ્રથમ ટેસ્ટ મેચમાં સારું પ્રદર્શન કર્યું હતું અને આ દિવસોમાં તેઓ સારા ફોર્મમાં પણ છે.
