વિરાટને આઉટ કરવો એ મારા ડાબા હાથનો ખેલ, જાણો કોણે આવું કહ્યું

• મિશેલ જહોન્સનનો મોટો દાવો
  
• કોહલીને આઉટ કરવો મારા માટે એકદમ સરળ
  
• મિશેલ ઓસ્ટ્રેલિયા માટે રમી ચૂક્યો છે
  

ટીમ ઈન્ડિયાનો ખેલાડી વિરાટ કોહલી જેણે પોતાની બેટિંગથી મોટા બોલરોને ધૂળ ચટાવી દીધી છે. આ રન મશીનને પેવેલિયનમાં મોકલવા માટે, બોલરોએ અનેક પાપડો વણવા પડે છે, પછી ભલે તે ફોર્મેટ ગમે તે હોય. પરંતુ ઓસ્ટ્રેલિયાના પૂર્વ ઝડપી બોલર મિચેલ જોન્સને વનડેમાં સદીનો રેકોર્ડ બનાવનાર વિરાટની વિકેટ લેવાને સૌથી સરળ ગણાવી છે. વાસ્તવમાં મિશેલ એ જ બોલર છે જેની સાથે ટેસ્ટ મેચમાં મેદાનની વચ્ચે વિરાટે ઉગ્ર બોલાચાલી કરી હતી.

વિરાટ અને મિશેલ જોન્સન વચ્ચેની દુશ્મનાવટની કહાની વર્ષ 2014થી શરૂ થાય છે, જ્યારે ટીમ ઈન્ડિયા ઓસ્ટ્રેલિયાના પ્રવાસ પર ટેસ્ટ શ્રેણી રમી રહી હતી. આ સિરીઝમાં વિરાટ કોહલી પોતાની ટોચ પર જોવા મળ્યો હતો. ટેસ્ટ મેચ દરમિયાન વિરાટ મિશેલ પર પ્રભુત્વ જમાવતો જોવા મળ્યો હતો. મેચની વચ્ચે વિરાટે મિશેલના બોલ પર શોટ રમ્યો અને બોલ મિશેલના હાથમાં ગયો. બોલ પકડતાની સાથે જ ફાસ્ટ બોલરે વિરાટ તરફ ઝડપી થ્રો ફેંક્યો હતો. બોલ તેના શરીર પર વાગતાની સાથે જ કોહલી પડી ગયો હતો. આ ઘટના બાદ બંને ખેલાડીઓ વચ્ચે ઉગ્ર બોલાચાલી થઈ હતી. તેનો વીડિયો ઘણીવાર સોશિયલ મીડિયા પર વાયરલ થયો છે. તે જ સમયે, હવે ઇન્સ્ટાગ્રામ પર મિશેલ જોન્સનની એક ટિપ્પણી વાયરલ થઈ રહી છે, જેને જોયા પછી એવું લાગે છે કે ભૂતપૂર્વ બોલરે તે આ વિવાદને વધુ હવા આપી દીધી છે. મિશેલની એક પોસ્ટ પર એક પ્રશંસકે લખ્યું, ‘તમે વિરાટના ફેવરિટ બોલર છો.’ જેના જવાબમાં જોન્સને લખ્યું. ‘તે મારી સૌથી સરળ વિકેટ હતી.’

મિશેલ જોન્સને 2015ના વર્લ્ડ કપમાં વિરાટ કોહલી સામે શાનદાર બોલિંગ કરી હતી. તેણે માત્ર 1ના સ્કોર પર વિરાટને પેવેલિયનનો રસ્તો બતાવ્યો હતો. કાંગારૂ ટીમે નોકઆઉટ મેચમાં ભારતને કારમી હાર આપી હતી. જોન્સને તેની કારકિર્દીમાં 4 વખત વિરાટને આઉટ કર્યો છે જેમાંથી તેણે ટેસ્ટમાં 3 વખત વિરાટને આઉટ કર્યો છે. મિશેલ જ્હોન્સને 2018 માં નિવૃતિ લીધી. તે જ સમયે, વિરાટ કોહલી હજુ પણ એક્શનમાં જોવા મળી રહ્યો છે. તાજેતરમાં જ વિરાટે વર્લ્ડ કપમાં ઘણા રેકોર્ડ તોડ્યા અને ટૂર્નામેન્ટમાં સૌથી વધુ રન બનાવનાર ખેલાડી સાબિત થયો.